Pas. 3 - BUKO SIPUNENAN

Bangsa-bangsa siturerere mukuddu ka laggai Kanaan

¹ Addeat masisibo tai Israel sitaipasasaggak ka Kanaan, obaakenangan piga pa bangsa si Tuhan mulaggai ka tobbou laggai nenda.

² Aigalai si Tuhan nenda bule senen reddenan Israel ragelai pasaggak, simakokoinia sia sitaipasasaggak.

³ Tai bangsa sipulalaggai peile ka tobbou laggai nenda iate: bangsa sikudduiji ka bagat lima laggaira tai Filistin, sangamberi bangsa Kanaan, Bangsa Sidon samba bangsa Hewi sipulalaggai ka leleu Libanon, barania ka leleu Baal-Hermon sege ka enungan siailiake Hamat.

⁴ Rakuddu sedda bule ibailiu sia bukku siboet ka tai bangsa Israel. Kalulut kele kisedda oinangan ituagai mareddet leu pa bangsa Israel ka parentat siaket Tuhan ka tubut taikebbukatdra sisege kai Mose.

⁵ Nenda te paluluatnia tai Kanaan, Het, Amori, Feris, Hewi samba Jebus riuriu le sia mulaggai ka tobbou laggai nenda sambatda paamian Israel.

⁶ Putalimourangan ka tatogatda tai bangsa nenda, samba tutnakerangan masibuluiji sabulungandra.

Otniel

⁷ Majorangan paamian Israel ka tubut Tuhan, Taikamanuandra. KalipogiranganNia bailiu buluijirangan sabulungan Baal samba Asyera.

⁸ Oto pugolunangan si Tuhan katubutda pamian Israel, samba obaakenangan ikalaake sia Rimata Kusyan-Risyataim sibara ka Mesopotamia. Balu ngarura burunia rimata nenda ipaneinei sia.

⁹ Iageti pusogarangan sapaamian Israel masitiddou paroman kai Tuhan, lepa si Tuhan masikau si Otniel addeat masiujaake sia. (Otniel iate togat Kenas, bagit Kaleb.)

¹⁰ Ketsat Tuhan isopsop si Otniel bailiunangannia ute'ra sapaamian Israel. Ei nia pasaggak, iageti si Tuhan masikau kamanangan ka tubunia aisaggangi rimata Mesopotamia.

¹¹ Oto maabannangan tobbou laggai nenda epat pulu ngarura burunia. Lepa geti tata' si Otniel.

Ehud

¹² Majorangan minca paamian Israel ka tubut Tuhan, pat galainangan si Eglon, rimatadra tai Moab si Tuhan ibailiu makope ron ka Israel.

¹³ Rimata Eglon paruru sia pasamba bangsa Amon samba Amalek, iageti kalaakerangan tai Israel, lepa geti oppurangan laggai Jerikho, laggai kurma nenda.

¹⁴ Pulu balu ngarura burunia pamian Israel aipaoreiji sia si Eglon.

¹⁵ Tapoi kele arapusoga paamian Israel masitiddou paroman ka tubut Tuhan, kaunangan si Ehud addeat masiujaake sia. Si Ehud sara sirimanua sikatsiu; nia togat Gera sibara ka suku Benjamin, samba nia te simatukle masitaroake upeti ka tubut rimata Eglon, luluietdra sia paamian Israel.

¹⁶ Ka sara gogoi galainangan sara palittei si rua mata nantania malegre sitenga meter. Kaunangan palittei nenda ka tengania ka isit kai kattoet ka tei leppeinia,

¹⁷ iageti ei nia masikau upeti sibara ka paamian Israel ka tubut rimata Eglon. Bulat mamo'monia rimata nenda.

¹⁸ Kele ailepa aikau upeti nenda, koiniakenangan sia sipasibabairat bulagat mas nenda si Ehud ratuitui.

¹⁹ Tapoi muari le nia ka sangamberi bukku sipae ka legret Gilgal, samba toili minca katubut rimata. Kuanangan: “Ai potonekat pakeleat siambit tuanku, ale rimata.” Ngangan Eglon: “Pumengmeng boiki!” Iageti sangamberi sirimanua sipuririo ka matania nenda ei sia kauja.

²⁰ Lepa guru' si Ehud masiailiakenia, ainia mukukuddu sarania ka bilit lalep puleppenannia ka isit kapata. Kuangangan si Ehud: “Ai tiboiet Taikamanua siambitku ka tubut tuanku.” Lepa suru' rionia ka kudduatnia.

²¹ Lepa geti totoiakengangan kabei sikatsiunia si Ehut, goloknangan palittei nenda sibara kapukabekat isit kaikattoetnia samba punuakenangannia ka balugut rimata,

²² bailiu tualupnangan sakla samba palittei nenda. Tabe sabbunginangan son palittei nenda, aipoi palittei nenda ta' aioppat ka balugut rimata. Lepa belania ka matat baliu ka teitei.

²³ Iageti belania patpatnakenangan samba lekreakenangan leu matatbaliu bilik nenda,

²⁴ lepa geti tuituinia. Kele araoi sapagugulet rimata samba raitco sangamberi matatbaliu bilik nenda aile tukukunci, rakukua le te rimata ainia ka baga samba ainia ka bilik puraukat.

²⁵ Kele aimaburu rangenania samba rimata ta leu et ibubuka matatbaliu, paingonangan sia lepa geti alarangan kunci samba bukarangan matatbaliu nenda. Itcorangan amateian rimatada aiannia murarappo ka bagat lalep.

²⁶ Aipei le sia masingengena, ai tuituiakean tubunia si Ehud ka Seira masienungi bukku sibara tularat.

²⁷ Sege'na le ka simaleleu ka Efraim, piaunangan trompet masisogai tai Israel mei pasaggak. Iageti oi sia, uteakenangan sia tai Israel baratda ka simaleleu nenda.

²⁸ “Kuanangan katubutda, “Tut kam aku,” Aiakean si Tuhan tai Moab, saggakmui nenda ka kabeimui.” Iageti ka bagat iuteake sia Ehud, gorosot sia tai Israel sibara ka leleu. Oppurangan kudduat putalipokatdra tai Moab ka bagat oinan Jordan. Ta' anai sia sara tai saggak nenda tuobaake mutalipo sipuririmanua.

²⁹ Ka bagat pasaggangan nenda aramateiake pulungaribu saladdu Moab bulat simaeru, ta anai sibebela.

³⁰ Gogoi nenda makala tai Moab katubutda tai Israel, oto maamannangan tobbou laggai nenda balu pulu ngarura burunia.

Samgar

³¹ Siuteake sia minca iate si Samgar togat Anat. Nia leu et apasaggak samba masiarauake tai Israel. Pakeinangan tutura pasialou jaui imateiake enemngotu sia tai Filistin.