Pas. 21 - BUKO SIPUNENAN

Rapatarek taiokko ibailiu sinanalepda tai Benjamin

¹ Kateteret araparuru tai Israel ka Mizpa, aragalaiat palelengandra kai Tuhan aipoi ta anai katalagatda siobaake tatogatda siokko ibailiu sinanalepda tai Benjamin.

² Kineneiget mei sia ka Betel samba mukuddu mureureu ka matat Tuhan pat soibo. Pusourangan samba musoga,

³ “Oi Tuhan, Taikamanuan Israel, angoi aipuaili kele nene” Suku Benjamin, iate sara katalagat sukumai, goisoat le itata'!”

⁴ Ka mansepnia, bulat simansep, rioakerangan sedda sara kudduat pasibuluat tai Israel, lepa panguruatnakerangan kai Tuhan buluakenen rarangen samba buluakenen paabanan.

⁵ Lepa geti lelekngakerangan katalagat suku bangsa Israel, taleu pa ai sitaieei paruru manindou ka matat Tuhan ka Mizpa siboiki. (Ka teteret nenda amusuppangan sia aipoi sia sitaipasitutut pasogaiat ka Mizpa buita tuukum ukuman simateiakenen.)

⁶ Paamian Israel manuntu bagatda katubut sasaraiananda suku Benjamin; kuarangan, “Gogoi nene atata'an sara suku Israel.

⁷ Kipa tagagalai bule tai Benjamin sipulelegei nene ibara sinanalepda, kalulut amusuppangan sita kai Tuhan aipoi ta taobaake tatogatta taiokko ibailiu sinanalepda tai Benjamin?”

⁸ Iageti lelekngakerangannia taleu pa ai sangarubeiat sibara ka suku bangsa Israel sitaieei paruru ka Mizpa. Samba seserangannia iate sibara ka tai Jabesh ka Gilead, ta anai beri sia sara sieei ka Mizpa.

⁹ Kalulut, kateteret aralelekngake pasisuranan oninda siooi, makoinongnangan ta anai atusese sedda sara sia sibara ka Jabesh.

¹⁰ Kalulut nenda, sia sirimanua siparururu ka Betel nenda masikoiniake pulu rua ngaribu sia simakope gege katalagatda masimateiake senen sirimanua ka Jabesh, tainanalep samba tatoga.

¹¹ Parentaakerangan sia masimateiake sangamberi taimanteu, samba tainanalep sitaiaddeakenen siokko simalina.

¹² Iageti katalagadra sikuddu ka Jabesh nenda, seserangan epat ngotu taiokko peile. Ambitrangan taiokko nenda ka pusapougat ka Silo sikuddu ka tobbo Kanaan.

¹³ Lepa geti sangamberi paamian masikau punu tubu katubutda tai Benjamin sikukuddu ka leleu Bukku ka Rimon masitiddou paabanan.

¹⁴ Oto kalulut nenda toili sia tai Benjamin, lepa kaurangan taiokko nenda tai Israel sitaimamateiakenenda sibara ka Jabesh. Tapoi taddera taiokko nenda ta pei iaaili addeatda tai Benjamin.

¹⁵ Sapaamian Israel manuntu bagatda ka tai Benjamin, kalulut aiparagat si Tuhan pusaraat suku bangsa Israel.

¹⁶ Iageti kuarangan sikebbukat ka paamian nenda, “Kipa tagagalai katubutda sipulelegei nene itugaba sinanalepda? Kalulut ta an anai tainanalep katalagat suku Benjamin.”

¹⁷ Kuarangan minca, “Polak ikepmakenenda situaarau nenda buita mukuddu ka suku Benjamin, bule bui' itata' sara suku katalagat suku Israel.

¹⁸ Tapoi ta momoi takau tatogatta tainanalep ibailiu sinanalepda.” Kalulut amusuppangan tai Israel kisene: “Tupateleiji le sirimanua sipasikakau sinanalepda tai Benjamin.”

¹⁹ Lepa geti kuarangan minca, “Kisene, ai sara enungan, iate ka teteret punen masiabeuake senen rura addeat Tuhan ka Silo.” (Ka isit kaiaman Silo nene ai sedda laggai Betel, samba ka isit ka belekat sulu ai sedda enungan sabeu Betel ka Sikhem, oto ka isit ka barenia ai sedda laggai Lebona.)

²⁰ Iageti sia sikebbukat siparuru ka Betel nenda masikua katubudra tai Benjamin sipulelegei sedda, “Kenan kam mulipput ka monen anggur ka Silo,

²¹ samba lelekngake kam simakolou. Oto ke' bela taiokkora tai Silo muturu ka punen nenda, buita bela kam ka monen anggur nenda. Lepa senemui masilaba sara siokko katalagadra samba ambitmuian sia ka kupkumen laggai Benjamin ibailiu sinanalepmui.

²² Ke moi ukkui ele sasarainania simanteu masituntutnia, kuamuian, “Kutiddou kai, akean le kam sia. Ta' akuala kai sia ka bagat pasaggangan, samba ta anuake kam sia katubumai, ta anupasabau kam palelengan, oto ta masele kam.”

²³ Iageti galaiakerangan tai Benjamin nenda kele sikutda katubutda. Sene senenda masiambit sara siokko sibara katalagatda taiokko sipututuru ka Silo. Lepa geti toili sia bulat ka kupkumen laggaira samba masipaeru minca laggaira samba pukuddurangan sedda.

²⁴ Tai Israel sabagei nenda tuitui leu et. Toili sia ka polak bakkatdra ka kupkumen laggaira sene-senendra, siripot muntogat samba sukutda.

²⁵ Kateteret nenda ta pei anai rimata ka Israel. Sene sirimanua masigalaiake apa simaeru siripot sipinaatunia sarania.