Pas. 20 - BUKO SIPUNENAN

Paamian Israel ka bagat pasaggangan

¹ Iageti oi sia sangamberi paamian Israel sibara ka Dan teret ka Bersyeba samba sibara ka Gilead, ka kabelaiat sulu, masitut pasogaiat nenda. Parururangan samba parururangan ka Mizpa ka matat Tuhan.

² Sangamberidra ai sia epat ngotu ribu saladru sipueenung sibara pamatei lanjau. Sangamberi saute ka senen suku bangsa Israel ai leu et sia sedda.

³ Maarepnangan ka muntogat Benjamin, tai Israel ameian sia ka Mizpa. Kaurangan tai Israel: “Pungunguanake le kipa aipuaili pukakatai.”

⁴ Lepa aleginangannia tai Lewi, simateu sinanalep simateiakenen nenda: “Segeaku pasamba sinanalepku kabebe ka Gibea bakkat suku Benjamin addeat mogogoi sedda.

⁵ Lepa geti oi sia tai Gibea kateteret sinoibo masigaba aku. Bokkorangan lalep kudduatku mugogoi bule ramateiake aku, tapoi lepa geti galairangan siobakat bagatda masipajo sinanalepku pat mateinia.

⁶ Iageti alakungan tubunia lepa patippukungannia, lepa kaukungannia katubut pulu rua suku ka bangsatta senen suku pasasangatippu. Akugalaiake kele nene kalulut tai Gibea nenda aragalaiakean sara sikatai samba sipakaila bangsa Israel.

⁷ Kam sangamberimui sibabara sene iate tai Israel. Oto kineneiget kutiddou pinaatumui sangamberimui!”

⁸ Iageti parururangan sangamberitda ka kudduat nenda samba kurangan simakere, “Sangamberitta ta anai sita sitotoili ka sapou ele ka lalep.

⁹ Nene te galaiakenenta: Tagalai le pauktuk masisausau sirimanua sipasisasaggangi tai Gibea.

¹⁰ Tapipili le kam ka sangamberi suku Israel pulu sia ka senen sangotu, sangotu sia ka senen sangaribu, sangaribu sia ka senen pulu ngaribu sipasiaala balutda saladdu. Sabagei geti mei masisaggangi tai Gibea masiukum sia kalulut pukakatai sigalaiakenenda ka talagat paamian Israel.”

¹¹ Kisedda te arapusara paamian Israel rasaggangi tai Gibea.

¹² Kele arakoiniake sirimanua sapaamian Israel ka sangaliot kupkumen laggai suku Benjamin masisegeake katuareman nene: “Aponia pukakatai sipuaaili ka tubumui?

¹³ Ake kam sirimanua sikatai sibara ka Gibea nenda katubumai bule kumateiake kai nia samba kele kisedda tata'akemaian pukakatai nenda katalagat Israel.” Tapoi sia tai Benjamin ta arapuletcei tiboietda tai Israel sabagei.

¹⁴ Tapoi amoi le sia sibara ka sangamberi laggai ka kupkumen laggai Benjamin ka Gibea masisaggangi tai Israel sabagei.

¹⁵ Gogoi nenda tuadde le' igitda muntogaeit Benjamin sibara ka sangamberi laggai bagei nenda: rua pulu enem ngaribu sia sipupamatei lanjau, ta' pei atuguru sipulalaggai ka Gibea, igitda atuadde pitu ngotu sirimanua sipili.

¹⁶ Sibara ka sangamberi saladdu nene ai pitu ngotu sia sipili sikatsiu, samba senenda masipingping ta'anai tusabau teret sangantaili alai.

¹⁷ Ka rubeiat tai Israel sabagei aparuruan epat ngotu ribu saladru silepa gelai.

Pasaggangan masisaggangi tai Benjamin

¹⁸ Iageti ei saladdut paamian Israel nenda ka kudduat parurukat ka Betel, samba parererangan kai Taikamanua, “Oi Tuhan, suku kaipa ka talagamai bulat memei siboiki masisaggangi tai Benjamin?” Aleginangannia si Tuhan, “Suku Jehuda.”

¹⁹ Mancep simanceman tuitui sia samba pusapourangan ka bebet laggai Gibea.

²⁰ Iageti ei tai Israel masisaggangi suku Benjamin, pasikelirangan kudduatda saladdu sipasasaggak rasaggangi sia ka bebet Gibea.

²¹ Iageti bela leu saladdu suku Benjamin masisaggangi samba masimateiake rua pulu rua ribu saladdutda tai Israel ka gogoi nenda leu et.

²² Tapoi saladdutda tai Israel masiruruake sangamberi puroronra, lepa pasikelirangan pueenung pasasaggakda kakudduat arapasikeli tubutda siboiki.

²³ Lepa geti ei sangamberi tai Israel, lepa mosou ka matat Tuhan pat soibo, lepa nenda parererangan kai Tuhan, “Memei pa' kai geti pasaggak masisaggangi muntogat Benjamin sasarainamai nenda?” Aleginangannia si Tuhan: “Kenan le masisaggangi sia.”

²⁴ Addeat sikaruania raei masisaggangi saladdutda tai Benjamin nenda.

²⁵ Samba rua ngaminca leu et tai Benjamin nenda raei pasaggak. Araei nene mateiakerangan saladdutda tai Israel silepa gelai pulu balu ribu sia igitda.

²⁶ Iageti ei sia minca sapaamian Israel ka Betel samba musou ka matat Tuhan. Sedda pupuasorangan pat soibo samba panguruatnakerangan buluakenen paabanan samba buluakenen rarangen katubut Tuhan.

²⁷ Samba parererangan tai Israel katubut Tuhan – Kateteret nenda ai sedda peti pakerekat baga Taikamanua,

²⁸ samba si Pinehas togat Eleazar, togat Harun, sibailiu imam Taikamanua kateteret nenda – kuarangan: “Memei pa' kai minca pasaggak masisaggangi muntogat Benjamin, sasarainamai nenda, ele kuaariakean le kai nenda?” Aleginangan si Tuhan, “Kenan le, aipoi mansep Kuake le geti sia ka kabeimui.”

²⁹ Masiarep alegiat Tuhan nenda, sia tai Israel pagalakrangan saladdutda ka kudduat simalipput ka be'bet Gibea.

³⁰ Iageti ka gogoi sika telunia saggangirangan saladdutda tai Benjamin ka pagalangan saladru simatai ka Gibea kele sigalaiakenendra ka gogoi silelepa.

³¹ Sia tai Benjamin pasaggak leu et, samba kablirangan sia rabela ka laggai. Kele silelepa, taddaakerangan masimateiake tai Israel ka kudduat simabaoi ka gerat laggai sieei ka Betel samba ka enungan sieei ka Gibea. Telu pulu sia tai Israel amatei.

³² Kalulut nenda tai Benjamin masipaatu arakalaakean tai Israel nenda minca kele siboiki. Tapoi saladdutda tai Israel arapatiboijingan rasoksokngake tubutda bule rabela saladdut Benjamin nenda ka enungan sabeu, ramareunan ka laggai.

³³ Kateteret arasoksokngake tubutda saladdutda tai Israel simagege, samba masipasikeli minca kudduat saladru ka Baal-Tamar, sia saaleira sikudduakenen ka be'bet Gibea, bela sia simaola ka kuduat pulippunandra ka gerat laggai.

³⁴ Sia nenda sipili sibara ka sangamberi tai Israel; taddera pulu ngaribu sia. Bara pasaggangan simakope kateteret sipulu ribu sia nenda masisaggangi Gibea. Bulat ta arapaatu le tai Benjamin aipoi ta mabuburu ramakakala.

³⁵ Aikauan si Tuhan kamanangan katubudra tai Israel masisaggangi sia tai Benjamin, bailiu ka gogoi nenda tai Israel masimateiake rua pulu lima ribu sangotu sia saladrudra tai Benjamin.

³⁶ Ia pei te araagainia tai Benjamin aramakala. Saladrudra tai Israel simagege sipalira le araputuitui ka sia tai Benjamin kalulut rakaroni saaleira ka kudduat pulippunan ka be'bet Gibea.

Enungan kamamanangra tai Israel

³⁷ Sia sipulilipput nenda ei sia simaola masisaggangi Gibea, pasaburangan tubudra ka sangaliot laggai samba mateiakerangan sangamberi sirimanua sedda.

³⁸ Tapoi amakereat bagatda siboiki aipoi ke ai le kujuk simakeppu mukuilu ka pata katalagat laggai,

³⁹ saladru simagege sipasisosoksok buita raoleake minca tubutda samba masisaggangi saggak. Kateteret nenda tai Benjamin aramateiakean telu pulu saladdutda tai Israel samba arapaatu poi amakalangan tai Israel minca kele siboiki.

⁴⁰ Tapoi sinulut pukuilunanngan kujuk ka pata katalagat laggai Gibea. Tugegerangan tai Benjamin kateteret arapitca samba araitco aimalabo sangaliot laggaira.

⁴¹ Samba kateteret nenda leu et saladdutda tai Israel simagege oleakerangan minca pasaggak, bailiu sia saladrudra tai Benjamin ta an raagai galairania kalulut araagaian poi bulat amakalangan sia.

⁴² Oto, putuituirangan ka tai Israel masiailiake kudduat simatangeu, tapoi ta momoi rabela. Arabokkoat sia tai saladdutda tai Israel simagege samba saladru kateteret nenda ai sia momoi baratda ka ipot laggai. Makalarangan simakope tai Benjamin.

⁴³ Alou samba riuriuakerangan rakukru sia tai Israel pat aili ka sara kudduat ka isit kabelaiat sulu ka Gibea. Ai sia masikukukru, mateiakerangan

⁴⁴ pulu balu ngaribu saladdutda tai Benjamin simagege.

⁴⁵ Saladrudra tai Benjamin bagei geti soksokrangannia ratuitui masienungi kudduat simatangeu masiailiake leleu bukku ka Rimon. Lima ribu sia ka talagadra aramateiake ka tengan enungan. Sabagei geti kukrurangan sia sege ka Gideom.

⁴⁶ Oto, saladdutda tai Benjamin simateiakenendra ka gogoi nenda dua pulu lima ribu sia, sangamberidra saladru simagege.

⁴⁷ Tapoi katalagatda situtuitui sienungi kudduat simatangeu siailiake leleu bukku ka Rimon ai enem ngotu sia sibebela. Kuddu sia sedda ka Rimon epat ngalaggo burunia.

⁴⁸ Lepa geti toili sia minca tai Israel, lepa pasaggakrangan samba masimateiake sangamberi sipulelegei tai Benjamin-taimanteu, tainanalep, tatoga samba tarimeu leu et. Sangamberi laggai nenda laborangannia.