Pas. 2 - BUKO SIPUNENAN

Malaikat Tuhan ka Bokhim

¹ Iageti ei Malaikat Tuhan ka Bokhim barania ka Gilgal samba kuanangan ka tai Israel, “Akubelaakean kam ka Misir, samba akuambitnan kam ka tobbou laggai sipalelekKu katubutda taikebbukatmui. Akukuangan leu et,” PalelenganKu pasamba kam ta kupakakatai.

² Lulut nenda ta momoi nugalai kam apapa' pakerekat bagamui katubutda sikudu ka tobbou laggai nene. Sangamberit kudduat pasibuluatda buita nupakatai kam.” Tapoi ta anugalaiake kam siparentaakenenKu. Bailoknia le anugalaiake kam.

³ Oto, kineneiget arep kam! Ta'an Kukekekle sia ka tobbou laggai nene ke nusaggangi kam sia. Bailiunangan te sia geti saggakmui, samba tuseremuian, bailiu tutnakemuian sia masibuluiji sabulunganda.”

⁴ Kele ailepa aisegeake malaika katuareman nenda, pusourangan simaron tai bangsa Israel.

⁵ Nenda te paluluatnia aituoniake kudduat nenda Bohkim. Lepa pangurutanakerangan buluakenen tai Israel katubut Tuhan ka kudduat nenda.

Kamateiat Josua

⁶ Kele aiobaake sia si Josua ratuitui tai Israel, tuituirangan leu masikudduiji polak sibailiu rubeiatda sene-senenda.

⁷ Kipa burut ipurimanua si Josua, tai Israel masipaguguletnake tubu ka tubut Tuhan. Kele aitata' leu et si Josua, mariuriu leu et rapaguguletnake tubutda katubut Tuhan burut rauteake sia sirimanua bulat sipasiitco sangamberi kiseiet sigalaiakenen Tuhan addeatda tai Israel.

⁸ Iagei matei si Josua togat Nun, pagugulet Tuhan nenda, rurania sangotu pulu ngarura.

⁹ Rateiakerangannia ka polaknia, iate ka Timnat-Serah ka polak simaleleu Efraim isit ka bare leleu Gaas.

¹⁰ Lepa geti sangamberi reddenan nenda tata' leu et. Samba reddenan bagei ta raagai si Tuhan, kalulut ta raagai sigalaiakenenNia addeat bangsa Israel.

Tai Israel ta'an masipanindogi si Tuhan

¹¹ Lepa galairangan tai Israel aponia sikatai ka matat Tuhan samba manindou katubut Baal.

¹² Kaddiuakerangan si Tuhan, Taikamanuan taikebbukatda sipasiambit sia bela ka laggai Misir, lepa tut rangan taikamanua bagei, sibara katalagat taikamanuan sangamberi bangsa sigoilik sia samba murappo manindou katubunia, bailiu besikirangan paatuat Tuhan.

¹³ Kise te' arakaddiuake si Tuhan samba manindou katubut Baal samba ka tai Asytoret.

¹⁴ Iageti magolunangan si Tuhan katubutda tai Israel. Kaunangan sia kakabeira sipasiraurau samba sakiakerangan sia ka saggak ka sigoilik sia, bailiu ta'an momoi rasaggangi sia.

¹⁵ Senen raei pasaggak, si Tuhan leu et masisaggangi sia, kele siparepdemNia ka tubutda. Oto sarat gejat baga sabeu le rasisilo.

¹⁶ Iageti uddetnakenangan tai sipasiukum si Tuhan, siarauake sia ka kabeira sipararaurau nenda.

¹⁷ Tapoi ta arapuletcei tai sipasiukum nenda. Rabuluiji le sabulungan bagei, samba ta matopit sia ka tubut Tuhan. Ta' araului enungan purimanuiat taikebbukatdra simareddet ka parentat Tuhan.

¹⁸ Ke ikau si Tuhan sara saute katubutda bangsa Israel, mariuriu iropmake saute nenda si Tuhan. Samba burut ipurimanua saute nenda, sarat ibelaake le sia ka saggakdra. Manuntu bagania katubutda ke iarep rapangorik kalulut raokkip samba rapaoreiji sia.

¹⁹ Tapoi ke matei saute nenda, puparaboanan bangsa nenda sisaliu katai peile ka reddenan siboiki. Sia masipaguguletnake tubutda ka taikamanua bagei samba masibuluiji taikamanua bagei. Toili sia ka katukelatda sikatai samba ta raoba masisili paraboatda.

²⁰ Kalulut nenda, bulat magolu si Tuhan katubut paamian Israel, samba kuanangan, “Alepaan aku parentaake taikebbukat bangsa nene bule raometnake pakerekat bagamai Aku pasamba sia. Tapoi bangsa nene masitakkiake pakerekat bagamai nenda; pasabaurangan parentaKu.

²¹ Kineneiget ta'an Kuoba masituituiake bangsa kasei pa' sikukuddu peile ka tobbou laggai nene kateteret aitata' si Josua.

²² Kupapakei te geti tai bangsa nenda addeat masisibo bangsa Israel, bule kuagai raoba leu paamian Israel masitut sangamberi parentaKu kele taikebbukatdra, ele taa'.”

²³ Nenda te lulunia ta aikau si Tuhan kamanangan ka tubut Josua aisaggangi bangsa-bangsa nenda. Tapoi iobaake le sia si Tuhan mulaggai ka tobbou laggai nenda, samba ta aikekle sia simaruei.