Pas. 19 - BUKO SIPUNENAN

Sara tai Lewi samba sinanalepnia bagei

¹ Kateteret ta'pei anai rimata ka Israel, ai sara tai Lewi sipulalaggai ka sareunan, ka simaleleu Efraim. Alanangan sara sinanalep sibara ka Betlehem Jehuda ibailiu sinanalepnia kabe'be.

² Tapoi lepa geti pugolunangan sinanalep nenda ka tubunia, pat toilinia ka lalep ukkuinia ka Betlehem. Epat ngalaggo burunia aikuddu sedda sinanalep nenda,

³ tapoi Lewi nenda ailiakenangannia bule ina'nania itoili ka tubunia. Ei nia ambitnangan sara paguguletnia samba rua ngamuneng kalidei. Kele aisege sedda, ambitnangannia sinanalep nenda ka ukkuinia. Kele aiitconia ukkui sinanalep nenda, silonangannia ka bagat angkat baga,

⁴ samba masikerania bui itoili. Kalulut nenda, kuddunia telu ngagogoi burunia samba mukom mulo' samba leu mugogoi sedda pasamba sinanalepnia kabe'be nenda.

⁵ Ka gogoi si kaepat, tusururangan bulat simancep masipatarek tubu bule ratuitui. Tapoi kuanangan ukkui sinanalep nenda katubut tai Lewi nenda, “Pukom kam boiki bule numaron kam. Lepa geti tuitui kam.”

⁶ Oto kuddu sia, lepa pukomrangan samba mulo ruadra simakere. Kuanangan ukkui sinanalep sibau tubu nenda katubut simantei nenda: “Kauan teuakean le' nupugogoi samba kau le' imagora bagam.”

⁷ Tapoi kele aitusuru sirimanua nenda ituitui leuet, talikunia nenda masibesiakenia, kuddu leuetnia sedda mugogoi.

⁸ Ka gogoi si kalimania bulat mamansep peile, kateteret mututuituian le nia, kuanangan minca ukkui sinanalep nenda, “Kauan, pukom boiki, ta mauju tuitui kam.” Oto pukomdrangan ruadra simakere samba paburunangannia pat bele sulu.

⁹ Lepa geti, kateteret mututuituian le tai Lewi nenda samba sinanalepnia samba leu paguguletnia, kuanangan ukkui sinanalep nenda, “Masosoiboan le, ta'an mauju imagepgep. Maeru peile nupugogoi kam minca sene, muangka baga. Mansep simanseman geti suru kam nutoili kam.”

¹⁰ Tapoi tai Lewi nenda ta ioba mugogoi minca sedda. Putuituirangan ruadra sinanalepnia nenda, pasamba paguguletnia samba rua kalideinia sibara pelana.

¹¹ Kateteret aramalegre ka Jebus samba kateteret aitusone sulu, kuanangan silainge nenda katubut tuannia: “Kauan le' tatusappai ka laggaira tai Jebus nene samba mogogoi sedda.”

¹² Tapoi aleginangan tuannia: “Ta' tusasappai sita ka laggaira sabagei ke' ta' bakkatda tai Israel, tapoi tariuriuake le' tapuenung teret ka Gibea.”

¹³ Kuanangan minca katubut silainge nenda: “Kauan tapuenung teret ka sara kudduat sedda samba mugogoi ka Gibea ele ka Rama.”

¹⁴ Kalulut nenda riuriuakerangan puenunganandra samba ta amuari sia ka Jebus. Abelean sulu kateteret arasege ka Gibea ka kupkumen laggai suku Benjamin.

¹⁵ Puarirangan sedda samba mugogoi, oto guru' sia ka laggai samba pukuddurangan ka uja laggai. Tapoi berisara sia sirimanua sipasisosogai sia ka lalepdra mugogoi.

¹⁶ Aipeile sia mukukuddu ka polak simalio ka laggai, oi sara sirimanua simabaja simaruei peile aitoili barania ka pugalaijatnia ka mone. Bulat kabaraiatnia geti ka simaleleu leleu Efraim tapoi kineneiget amulaggaiatnia ka Gibea. “Sipulalaggai sabagei ka Gibea iate tai Benjamin.”

¹⁷ Kateteret aiitco tai Lewi ukkui nenda ka ujat laggai, rerenangan sia, “Saraina kaipa anubara kam samba nuei kam?”

¹⁸ Aleginangan tai Lewi nenda, “Simaruei le akubara kai ka Betlehem ka Jehuda, samba ai kai musisila toili ka lalep ka reunan ka simaleleu leleu Efraim. Sedda te aku bara. Ta' anai sia sara sipulalaggai ka laggai nene sioba masisilo kai ka lalepdra mugogoi.

¹⁹ Ta' leu kubebesiake kai apapa bagei, metnangan balutmai. Ai singitinan samba komen kalideimai; ai roti samba anggur addeatku samba sinanalepku nene samba paguguletku.”

²⁰ Lepa kuanangan ukkui nenda, “Bui' imakarat bagam, aileu kuropmake kam! Sangamberi simateu besiakenenmui eddangannia kubairatnia, tapoi bui' nupugogoi ka ujat laggai nene.”

²¹ Lepa geti ambitnangan sia ka lalepnia lepa kaunangan komen kalideira. Samba kele ailepa rabui reredra tai raumania, pukomrangan.

²² Aisia muangka baga, oi sia sirimanua ka laggai nenda sirimanua sikatai masibokko lalep nenda. Pajulungirangan matatbaliu samba kuarangan ka simabaja nenda, “Akenia katubumai sirimanua simanteu siambitnu nenda ka lalepnu. Koba kai masipakatainia!”

²³ Bela sirimanua simabaja nenda samba kuanangan katubudra, “Ta' momoi sasarainangku! Panindogatku, bui' nugalai kam sikatai samba sitaimateu kele nenda, kalulut tairaumangku le nia.

²⁴ Aileu kuake sinanalepnia samba togaku siokko katubumui. Momoi nusegeake kam bagamui katubutda. Tapoi bui' nugalaiake kam sikatai katubut tai raumangku nenda!”

²⁵ Tapoi kalulut sirimanua sikatai paraboat nenda aile rabebesiake, oto sirimanua tai Lewi nenda labanangan sinanalepnia ambitnangannia katubudra ka laibokat. Lepa galairangan siobat bagadra masipajo sinanalep nenda sita' anai ari pat pato.

²⁶ Kateteret kapatokat toili sinanalep nenda, tapoi ka matatbaliu lalep sirimanua simabaja nenda, kudduat ipugogoi simanteunia, kalapuinangannia. Kele aibela sulu aipeile nia sedda.

²⁷ Simansep nenda, kateteret aitusuru simanteunia samba masibuka matatbaliu bule ituitui itconangan sinanalepnia amurappongannia ka matat lalep nenda kabeinia aiuukkaake matatbaliu.

²⁸ Kuanangan ka sinanalep nenda, “Suruake ekeu, sita tatuitui” Tapoi sinanalep nenda ta aialegi kalulut amateiannia. Lepa, akkatnakenangan sinanalep nenda samba kaunangannia ka uddut kalidei, lepa geti tuituinia itoili ka lalepnia.

²⁹ Segenia ka lalep, guru'nia alanangan pisau lepa geti patippunangan tubut sinanalep nenda pulu rua ngatippu aibailiunia. Kele ailepa nenda, kaunangannia sitippu nenda katubut pulu rua suku bangsa Israel, pasasangatippu.

³⁰ Sangamberi sirimanua sipasiitco nenda kuarangan, “Ta'pei amuaili kele nene, baranangan arabela paamian Israel ka laggai Misir teret gogoi nene. Ta' momoi tapumengmeng. Tapoi buita tupatiboiji kipa tugagalai!”