Pas. 18 - BUKO SIPUNENAN

Si Mikha samba suku Dan

¹ Kateteret nenda ka Isarel ta anai rimata. Suku Dan aipeile ragagaba kudduat sibailiu kupkumenda, aipoi sia leu et ta pei arasese polak sambatda suku bagei katalagat bangsa Israel.

² Kalulut nenda pilirangan lima sia simagege katalagat sangamberi muntogat ka bagat sukudra sipulalaggai ka Zora samba Esytaol, lepa kaurangan galaiakenendra bule rataiko tobbou laggai nenda. Iageti tuitui sia, samba sege sia ka simaleleu ka kupkumen laggai Efraim. Sedda pugogoirangan ka lalep Mikha.

³ Kateteret airaguguruki lalep nenda arepdrangan ipanibo silainge tai Lewi nenda, samba raagai ekket ngangania. Oto, ailiakerangannia samba rererangannia, “Angoi ai ekeu sene? Apa nugagalai? Kasei amasiambit ekeu?”

⁴ Aleginangan silainge nenda, “Aku bara sene kalulut si Mikha, Nia le aibailiuake aku imamnia, samba akenangan upakku.”

⁵ Lepa kuarangan katubunia, “Ke kisedda bainia, ropmake pei nurere' Taikamanua kipa puenungananmai nene mauktuk pa kai ele ta.”

⁶ Aleginangan imam nenda, “Bui' makarat bagamui. Aisukatnakean si Tuhan puenungananmui nene.”

⁷ Kele ailepa nenda tuitui sia silima nenda iageti ei sia ka Lais. Sedda lelekngakerangan sipulalaggai sedda. Toila enungan puririmanuandra sipulalaggai ka Lais kele enungan puririmanundra bangsa Sidon. Kenanen marereunan kuddutdra, samba mareunan sia ka bangsa Sidon, maeru purimanuaiatdra samba maaban, ta anai saggak, makayo samba leu ta anai simagulai.

⁸ Kele aratoili silima nenda ka sukunia ka Zora samba Esytaol, tiddourangan raake pangasegekatda.

⁹ Kuarangan: “Patarek kam, sita kam masisaggangi sia, aipoi akuitcoan kai laggai nenda, samba bulat maeru. Mumemengmeng koi kam! Ba'magegela kam mei masiguruki samba masikudduiji laggai nenda.

¹⁰ Ke'bai nugurukikamnia sesemuaian taikauma sipuririmanua simasanang, samba laggai nenda malio ka isit kaikatsiu samba ka isit kaikattoet. Bulatnia te', Taikamanua aiobaakeannia ka kabaimui; nenda te' kudduat sitaimagulai aponia sibabara ka uddut polak.”

¹¹ Kalulut nenda, tuitui sia baradra ka Zora samba Esytaol enemngotu suku Dan. Sibara pamatei,

¹² ei sia karubeiat ka belekat sulu Kiryat Jearim ka kupkumen laggai Jehuda sedda pusapourangan. Iate lulunia kudduat nenda aipeile tuoniake Pusapougat Dan.

¹³ Baradra sedda riuriuakerangan puenunganandra ka simaleleu Efraim pat aili ka lalep Mikha.

¹⁴ Sia silima sipasitataiko sikoiniakenen siboiki nenda kuarangan ka tubut saaleira, “Nuagai leu kam ai ka sara lalep nene ai tularat sisaluki perak? Ai leu tularat bagei samba leppei efod. Paatu pei kam apa bulat tagagalai kam.”

¹⁵ Iageti ei sia ka lalep Mikha, kudduat silainge tai Lewi nenda, samba masirereake kukuddunia sedda maarau leu nia.

¹⁶ Kateteret nenda enem ngotu tai saladru suku Dan, sibara pamatei nenda, ai sia muririo ka matatbaliu gugurukat.

¹⁷ Sia silima sipasitataiko nenda riuriu ratuguru' ka bagat lalep, iageti alarangan tularat loina sisaluki perak nenda pasamba tularat bagei samba efod. Silainge tai Lewi nenda ainia muririo pasamba sia sienem ngotu saladru nenda ka matatbaliu gugurukat.

¹⁸ Kateteret silima nenda tuguru ka lalep Mikha samba masiala leppei efod samba leu tularat bulungan nenda, silainge tai Lewi nenda masirere, “Apa nene sigalaiakenenmui?”

¹⁹ Alegirangannia, “Tangeuake ekeu! Bui' nuparere'. Tut le kai, aileu ibailiu ekeu imam samba sipangantoman kai. Kipa bulat maeru, ibailiu ekeu sara imam ka sangalalep le, ele ka sara suku?”

²⁰ Silainge tai Lewi nenda mangka bagania enungan kele nenda. Oto, alanangan leppei efod samba tularat sabulungan nenda, lepa tutnangan sia.

²¹ Lepa geti sia nenda masiriuriuake puenunganandra, tatoga le sipuboboiki, tarimeu samba bibiletdra.

²² Kele aramareunan, sogainangan pabebeakenennia lalep si Mikha iageti kukrurangan sia sambatda suku Dan nenda. Kele aramalegre katubutda,

²³ si Mikha samba sirimanua sipaaleiakenia nenda pugereirangan katubutda. Sia tai suku Dan nenda masiitco samba masirere katubut Mikha, “Apa sibabara? Angoi nuoi pasamba sirimanua simigi?”

²⁴ Alginangannia si Mikha, “Anuambit kam taikamanungku sigalaiku samba imamnia, bailiu tat nanai sipulelegei, lepa nukua peile kam, “Apa sibabara!” ”

²⁵ Kuarangan tai suku Dan nenda, “Maeru peile nupumengmeng, bui' rapugoluk sirimanua nene samba rasaggangi ekeu. Babara ramamateiake ekeu samba sangalalepnu.”

²⁶ Kele ailepa arakua nenda, riuriuakerangan puenunganandra tai suku Dan. Aiitco poi si Mikha sia peile makope ron, kalulut nenda soksoknangannia itoili ka lalepnia.

²⁷ Lepa muntogat Dan, pasamba masiambit sangamberi bibilet sigalai Mikha, samba leuet imamnia masiailiake Lais, iate taikauma sipuririmanua simasanang samba simakolou. Rabobo' le sangamberi sirimanua nenda pasamba son lanjau samba laggainia tulabo.

²⁸ Ta' anai sirimanua siooi masiropmake, aipoi laggai nenda mareunannia ka Sidon samba sangamberi sirimanua ka laggai nenda ta'apaalei sia pasamba kaseipa. Kudduat laggai nenda ka peleu Bet-Rehob. Lepa geti galairangan minca laggai nenda samuntogat Dan samba mukuddu sedda.

²⁹ Sailirangan onin laggai nenda bailiunangan Dan, masitut onin taikebbukatdra, iate Dan, togat Jakob.

³⁰ Tularat sabulungan siambitdra nenda, rioakerangannia ka laggai nenda, lepa si Jonatan, togat Gersom, punuteteu Mose, bailiuakerangannia imam suku Dan pat aili teterenia paamian Israel raambit samba raribbaiake sia ka laggai bagei.

³¹ Tularat sabulungan sigalai Mikha nenda ai peile ka Lais kipa burunia ikuddu Sapou Tuhan ka Silo.