Pas. 16 - BUKO SIPUNENAN

Si Simson ka Gaza

¹ Ka sara gogoi ei si Simson ka Gaza. Sedda ailinangan sara sirimanua sipaelet lepa einia merep ka sinanalep nenda.

² Iageti areprangannia sipulaggai ka Gaza aipoi si Simson ainia sedda. Oto, alourangan kudduat nenda samba ngenarangannia sangasoibo ka matatbaliu laggai. Tapoi soibo nenda ta anai aragalai apapa kalulut arapaatu le, “Ke abelangan geti sulu, iapeite tamateiakenia.”

³ Tapoi si Simson ta amerepnia sedda teret imapato. Tengamoi surunia lepa einia ka matatbaliu laggai. Goloknangan matatbaliu nenda sangamberinia pasamba arigi samba leu silittengania sangagolongan. Iageti bairatnangan matatbaliu nenda ka ta'tania, samba ambitnangannia ka uddut leleu ka silat Hebron.

Si Simson samba si Delila

⁴ Kele ailepa nenda obanangan sara sinanalep sibara ka Su'sut Sorek. Onin sinanalep nenda si Delila.

⁵ Oto oi lima sia rimatadra tai Filistin ka sinanalep nenda samba kuarangan, “Na'na pei si Simson bule ioba masipaagai katubum aponia keleat puroron tubunia, samba kipa enungan bule itata' ron tubunia nenda. Kalulut nenda oinangan kuoi kai samba kabemaiannia addeat masikalaakenia. Ai leu kuake kai senemai sangaribu sangotu bulagat perak.”

⁶ Iageti kuanangan si Delila kai Simson, “Apa sikau ekeu numaron? Aponia tukakabeake katubum bule itata' ron tubum nenda? Kua pei keleatnia!”

⁷ Aleginangannia si Simson, “Ke tukabe aku pitu talit rourou sibau sita'pei bulat makope garak, taimaronkungan samba bailiu kele sirimanua sabagei.”

⁸ Iageti sangamberi rimatadra tai Filistin masiambit pitu iktek rourou sibau ta'pei bulat makope garak katubut sinanalep nenda samba kabenangan si Simson pasamba iktek nenda,

⁹ beringan ka bilinia ai sirimanua simatarek. Lepa geti pusoganangan sinanalep nenda katubunia: “Sangamberi tai Filistin masilaba ekeu, Simson!” Tapoi itakkiake le' sangamberi iktek rourou nenda kele iktek simalalabo itakki, ke'bai ioraknia obengan. Samba ta'tuagai kaipa aikuddu puroronnia nenda.

¹⁰ Lepa kuanangan si Delila kai Simson, “Bulat maboko ekeu! Sarat masipaguile aku nugagalai. Kauan, tiboi pei ka tubuku apa momoi tukakau masikabe ekeu!”

¹¹ Aleginangannia si Simson, “Ke tukabe aku tali sibau ta'pei leu atupakei, taimaronkungan te samba bailiu kele sirimanua sabagei.”

¹² Oto tai Filistin airangengena ka bilik bagei, alanangan piga pa tali sibau si Delila, iageti kabenangan si Simson. Lepa geti pugereinangan, “Simson! Amoian tai Filistin!” Tapoi si Simson masitakkiake tali nenda ka kabeinia kele ratakkiake banang sirimanua.

¹³ Lepa kuanangan si Delila kai Simson, “Bulat maboko ekeu. Aile nupaguguileake aku. Kauan, tiboi pei apa momoi tukakau masikabe ekeu!” Aleginangannia si Simson, “Ke nuputre pitunia tikai alaiku simakere ka banang ka pasiputreat, lepa appraake ka arigit pasiputreat nenda, taimaronkungan samba bailiu kele sirimanua sabagei.”

¹⁴ Oto galainangan si Delila ipulaulau si Simson lepa putrenangan pitunia tikai alai simakere ka banang ka pasiputreat. Kele ailepa nenda appraakenangannia ka arigit pasiputreat nenda, lepa geti pugereinangan katubunia, “Simson! Amoian tai Filistin!” Tusurunangan leu et si Simson iageti miongnangan alainia pat golok ka pasiputreat nenda.

¹⁵ Lepa geti kuanangan si Delila ka tubunia, “Nukua manuntu bagam ka tubuku, oto mareunan le patuatnu katubukku! Aiailingan telu ngaminca nupaguileake aku, samba pat aili kineneiget ta noba masipaagai bakkat puroronnu.”

¹⁶ Senen gogoi riuriu le ipusou si Delila samba ipasina'na, pat mangaunangan si Simson masiarep.

¹⁷ Kalepakatnia tiboinangannia si Simson pakeleatnia. Kuanangannia, “Alaiku ta pei atusapu, atusegeakean aku katubut Taikamanua ibailiu bakkatNia sikokoiakenen. Tu'tunangan matakku aibailiuan aku sara sipasijajago. Ke tusapu alaiku, tata' ron tubuku, iageti masaggokungan samba bailiu kele sirimanua sabagei.”

¹⁸ Si Delila aiagaian aipoi si Simson aipaagaian pakeleatnia. Kalulut nenda kaunangan katuareman nene katubudra tai rimatadra Filistin, “Konan kam sangaminca nene le. Si Simson aitiboian pakeleatnia ka tubuku.” Oi sia ambitrangan bulagat bule rakaunia kai Delila.

¹⁹ Lepa nenda na'nanangan si Simson iperep ka kupkupnia, posainangannia pat laulaunia. Iageti sogainangan sara sirimanua samba koiniakenangannia itippu pitungan taili alai Simson. Lepa geti paoreijinangan si Simson, kalulut atata'an puroronnia si Simson.

²⁰ Lepa pugereinangan, “Amoian sia tai Filistin!” Tusurunangan si Simson samba ikua peile momoi ibela kele kateteret siboiki. Ta' iagai aipoi aikaddiuakeannia si Tuhan.

²¹ Iageti labarangannia tai Filistin samba kiok luikut matania. Ambitrangannia ka Gaza samba kabeakerangan rua rantei tembaga, lepa kaurangannia ka bagat tangsi. Ka tangsi galajetnia iate masigulut.

²² Tapoi burunia nenda taddanangan iputu'tu minca alainia.

Kamateiat Simson

²³ Ka sara gogoi parururangan mupunen sia rimatadra tai Filistin samba masipanguruatnake buluakenen simigi addeat Dagon, sabulungandra. Puurairangan, “Aiakean kamanangan sabulunganta masilawan si Simson, saggakta!”

²⁴ Kateteret araitci si Simson sirimanua simigi, umunnakerangan taikamanuanra, sialei gerei: “Aiakean taikamanuanta ka kabeita saggakta, sipakatai polakta, samba simateiake saaleita simigi.”

²⁵ Kateteret ai sia muangka baga kuarangan: “Sogai le' si Simson bule igalai ga'gatetta.” Si Simson tusogai bagat tangsi, lepa galainangan ga'gatet ka matatda, lepa geti koiniakerangannia murio ka talagat sangamberi arigi.

²⁶ Kuanangan si Simson katubut toga simanteu sipasilululunia, “Obaakean le kabeiku bule ioi kuukkaake arigi sipasitutukke uma nene, bule ioi kupuaddai sedda.”

²⁷ Ka uma nenda bulat amasutnan sirimanua. Ka lima rimatadra tai Filistin leu et ai sia sedda. Samba ka bagania ka pata uma nenda ai sia telungaribu sirimanua. Sangamberidra masiibbuk samba masipaloloi si Simson.

²⁸ Ka teteret nenda panindounangan si Simson; kuananangannia, “Oi, Tuhan Sipulubeunan, oba pei masirepdep aku. Akean peite puroron minca katubukku sangaminca nene, oi Taikamanua, bule ka sigalaiku nene momoi kulumunake tai Filistin sipasikikiok ruania luikut matakku.”

²⁹ Kele ailepa nenda, ukkaakenangan ruania arigi si Simson pasitutukke uma nenda. Iageti aitutukkeake kabeinia sikatciu ka arigi sara samba kabeinia sikattoet ka arigi bagei,

³⁰ Pusoganangan, “Eddangannia kumatei kai simakere tai Filistin nene!” Samba bulat alanangan karoronnia itukkluake arigi nenda pat bukkat samba saksaknangan kalima rimatadra tai Filistin samba leu sirimanua sabagei sibabara sedda. Matei leu et ka sia si Simson. Tapoi, kateteret kamateiatnia nenda peile maigi aimateiake kateteret ai peile nia muririmanua.

³¹ Iageti oi si sipusasaraina katubunia samba muntogatnia masiala tubunia. Toiliakerangan tubunia nenda, samba rateiakerangannia ka bagat ratei Manoah ukkuinia. Kudduat ratei nenda ka oggak Zora samba Esytaol. Si Simson ibailiu ute'ra tai Israel rua pulu ngarura burunia.