Pas. 14 - BUKO SIPUNENAN

Si Simson samba sara siokko sibara ka Timna

¹ Ka sara gogoi ei si Simson ka Timna, samba sedda itconangan sara siokko tai Filistin.

² Lepa toilinia samba kuanangan ka saeppunia, “Bulat ioba bagaku ka tubut sara siokko tai Filistin ka Timna. Panindogatku ukkui samba ina mei kam masinounounia tunanganku.”

³ Tapoi kuarangan saeppunia, “Angoian le tueei katubutda tai Filistin addeat masiala sinanalep, sia nenda poi ta rubeiat paamian Tuhan? Ta' pa anai ka muntogatta ele ka talagat sangamberi bangsatta sara siokko sipasesese?” Aleginangannia si Simson, “Tapoi siokko tai Filistin nenda le siobaku. Samba bulat kukakatonemi noba mei masinounounia tunanganku.”

⁴ Tapoi ukkui samba inan Simson ta raagai aipoi si Tuhan le aikoiniake si Simson igalaiake kisedda. Kalulut aile igagaba pulamaugat bule isaggangi tai Filistin si Tuhan. Kateteret nenda tai Israel ai sia ka kupkumenda tai Filistin.

⁵ Iageti si Simson samba ukkui samba leu inania ei sia ka Timna. Kele araaili sangamata monen anggur, bara sangamuneng singa sipuurau sibau masipaaliake si Simson. Purounangan singa nenda,

⁶ samba sinulut maronnangan tubut Simson kalulut geget Tuhan. Iageti pabiritnangan singa nenda kabeinia, kelean le sangamuneng kambing tarimeu nenda. Pagalaiat nenda ta aitiboi ka ukkui samba ka inania.

⁷ Iageti ei si Simson masiailiake siokko nenda samba patiborangan, samba iobania si Simson.

⁸ Piga ngagogoi pa burunia atusabau, ei minca si Simson addeat mutalimou ka siokko nenda. Ka bagat pusilaijat, soipmakenangan tubunia addeat masiitco tolat singa simateiakenennia nenda. Kele aisege sedda itconangannia bulat makope igi mani ka tolat nenda, samba ai leu et suania.

⁹ Gailiknangan suat mani nenda ka bagat kabeinia, oto ainia muenung aikokom suat mani nenda. Lepa geti einia katubutda saeppunia samba kaunangan leu et sangarubeiat suat mani nenda katubutda, samba komrangannia. Tapoi si Simson ta aipaagai aipoi suat mani nenda sialania sibara ka tolat singa.

¹⁰ Kele aiei ukkui Simson ka lalep siokko nenda, galainangan punen si Simson sedda, kalulut kisedda te katukelat sangamberi sirimanua sibau tubu.

¹¹ Kele araitconia tai Filistin, pilirangan telu pulu tailainge masipaaleinia.

¹² Lepa kuanangan si Simson katubudra, “Ai paturaku, ke nuagai kam katukolobatnia, akekungan geti senenmui sara komak juto simaalit baga samba sangapasang bibilet simalainge. Kuake tetere ka tubumui pitu ngagogoi burut punen putalimougat nene, addeat masigaba katukolobatnia.

¹³ Tapoi ke ta nuagai kam katukolobatnia, kam le senemui masiake katubukku komak juto simaalit baga samba sangapasang bibilet simalainge.” Lepa kuarangannia tai Filistin nenda, “Momoi! Kuangan kineneiget patura nenda.”

¹⁴ Iageti kuanangannia si Simson, “Sibara ka sipasikokom, bela komen; sibara ka simaron, bela simananam.” Kele aitusabau telu ngagogoi ta pei leu raagai katukolobat patura nenda.

¹⁵ Oto ka gogoi sika epatnia kuarangan ka sinanalep Simson, “Buita nuna'na' simantenu bule ioba masipaagai ka tubumai katukolobat patura nenda. Ke ta, kulalabo te kai ekeu samba sangamberi sibabara ka bagat lalep ukkuinu. Oto anusogai kai geti masisappruake pukayaotmai le!”

¹⁶ Kalulut nenda, sinanalep Simson einia kai Simson ainia musosou, lepa panibonangan, “Kuagai ta manuntu bagam ka tubuku. Angoian le anukau patura katubutda saaleiku, tapoi ta anupaagai katukolobatnia katubutda? Oto malaga le bagam ka tubuku!” Kuanangan si Simson, “Ngena boiki! Beringan katubutdra saeppukku ta akukua katukolobatnia, angoian le kupaagainia kekeu?”

¹⁷ Pitu ngagogoi punen nenda sarat musou sinanalep Simson. Samba kalulut sarat musounia, oto ka gogoi sikapitunia, paagainangannia si Simson katukolobat patura nenda ka tubunia. Iageti sinanalep Simson nenda masipaagai katubudra sia tai Filistin.

¹⁸ Oto, ka gogoi sika pitu kepei bele sulu, sia sirimanua ka laggai nenda masikua ka tubut Simson, “Aponia sisaliu nanam ka suat mani? Samba aponia peile simakope ron ka singa?” Aleginangannia si Simson, “Ke ta nuna'na kam sinanalepku, ta nuagai kam katukolabat patura nenda!”

¹⁹ Sinulut maronnangan tubut Simson kalulut geget Tuhan, lepa einia ka Askelon. Sedda mateiakenangan telu pulu sia taimanteu sipuleleppei simalainge. Alanangan bibiletdra nenda kaunangannia katubutda si telu pulu sia siagai katukolobat paturania. Kele ailepa nenda, toilinia ka lalepnia sialei golu.

²⁰ Lepa talikunia masikau sinanalep Simson nenda ka tubut sirimanua sibailiu sipaalei si Simson kateteret putalimougatnia.