Pas. 13 - BUKO SIPUNENAN

Pututukat matat Simson

¹ Majorangan minca tai Israel ka tubut Tuhan, lepa obaakenangan tai Filistin si Tuhan masipaoreiji sia epat pulu ngarura burunia.

² Kateteret nenda ai sara simanteu ka laggai Zora. Oninia si Manoah, sibara ka suku Dan. Sinanalepnia ta mususule'.

³ Tapoi ka sara gogoi patoilanangan tubunia Malaikat Tuhan ka tubunia samba kuanangan, “Burunia nene ta babara togam, tapoi ta mabuburu te pusuruketnungan, samba tu'tuakenungan sara toga simanteu.

⁴ Kalulut nenda jago tubum sipulelelek. Bui' nulo' anggur ele lo' simapuinengen, ele komen keraet arat.

⁵ Ke amututu'an matat togam nenda, bulat ta momoi tusapu alainia, aipoi baranangan ka suruket atupilingannia bule ibailiunia sara sipasijajago Taikamanua Nia le geti pasasaggak bule ibelaake tai Israel ka paoreijatda tai Filistin.”

⁶ Lepa nenda ei sinanalep Manoah ka simanteunia samba kuanangan, “Amoi pakoiniet Taikamanua ka tubuku; putubuatnia kele Malaikat Taikamanua, bailiu malotokungan. Ta' akurere'ake kaipa aibara, samba nia leu et ta aikua oninia katubukku.

⁷ Tapoi kuanangan ka tubuku mususuruket te aku samba tu'tuakekungan sara toga simanteu. Aikua leu et ta'momoi kulo' anggur ele lo' simapuinengen, ele komen keraet arat, aipoi toga nenda iate tukau ka tubut Taikamanua bule ibailiunia sara sipasijajago burut purimanuaiatnia.”

⁸ Masiarep nenda, panindounangan si Manoah katubut Tuhan, kise, “Tuhan, ke momoi bainia koiniake minca paguguletNu ka tubumai bule ipaagai aponia bulat galaiakenenmai ka tubut toga nenda ke' mutu'tu mania.”

⁹ Arepinangan Taikamanua panindogat Manoah. Malaikat Tuhan nenda oi nia minca kateteret sinanalep Manoah ainia mukukuddu ka mone. Kateteret nenda simanteunia ta anainia sedda.

¹⁰ Oto, pabalaunangan masisegeake pagalaiat nenda ka tubunia, “Itco pei, sirimanua siooi siboiki ka tubuku nenda, amoiannia minca!”

¹¹ Olaakenangan si Manoah masitut sinanalepnia. Legreakenangan tubunia katubut sirimanua nenda samba parere'nangan, “Si Tuan leu sipasiabbit katuareman simeru ka tubut sinanalepku?” Aleginangannia, “Bulatnia.”

¹² Iageti parere'nangan si Manoah, “Ke muaili bai apa sikuat Tuan nenda, aponia bulat galaiakenennia toga nenda? Kipangan puririmanuania lepa geti?”

¹³ Aleginangan Malaikat Tuhan nenda kai Manoah: “Sinanalep nenda bui ta ijago tubunia ka sangamberi sikuaKu katubunia.

¹⁴ Bui' ikom apapa sibara ka loinat anggur; anggur ele lo' simapuinengen ta'momoi tulo samba simakeikei ta'momoi ikomnia. Bui ta'iukkaake le sangamberi siparentaakenenKu katubunia.”

¹⁵ Iageti kuanangan si Manoah ka tubuNia, “Ke momoi bainia nungenaake goiso Tuan. Kuseu kai boiki kambing sipuurau sibau addeat Tuan.”

¹⁶ Tapoi aleginangan Malaikat Tuhan nenda kai Manoah: “Kenanen poi nuariake Aku sene, ta kukokom sitattanakenennu nenda. Tapoi ke' nugalainia ibailiu buluakenen silabo, panguruatnake le' nenda katubut Tuhan.” Aipoi si Manoah ta' iagai, Nia nenda Malaikat Tuhan.

¹⁷ Lepa geti kuanangan si Manoah katubut Malaikat Tuhan nenda: “Kasei oniM, aipoi ke'bai muaili sikuaM nenda, abeuakemaian Ekeu.”

¹⁸ Parere'nangan Malaikat Tuhan nenda, “Aponia lulunia nuoba nuagai oningku? Oningku nenda oni kiseiet.”

¹⁹ Iageti alanangan sangamuneng kambing sipuurau sibau sialei goiso gandum, lepa kaunangannia ka uddut bukku samba panguruatnakenangannia katubut Tuhan, iate Tuhan sigalaiake sangamberi kiseiakenen.

²⁰ Beringan julu obengan nenda tusakai ka manua barania ka uddut kudduat pasibuluat, iageti sakai le' Malaikat Tuhan kabagat julut obengan pasibuluat nenda. Kateteret si Manoah samba sinanalepnia masiitco pagalaiat nene, purekkukrangan pasamba utera teret ka polak.

²¹ Kateteret nenda Malaikat Tuhan ta'an aipakoinong tubunia minca katubut Manoah samba sinanalepnia. Iageti againangannia si Manoah, Nia nenda Malaikat Tuhan.

²² Lepa kuanangan si Manoah ka sinanalepnia, “Bulat mamatei le sita aipoi ataitcoat Taikamanua!”

²³ Aleginangan sinanalepnia, “Ke ioba imateiake sita si Tuhan, bulat ta ioba isilo' buluakenen sipanguruatnakenen ka tubuNia nenda; Nia leu et ta te ipakokolou sangamberinia nene ka tubutta ele masipaagai pagalaiat sangamberi sikuaNia nenda katubutta.”

²⁴ Ka laggo sibabara tu'tuakenangan sara toga simanteu sinanalep Manoah lepa kaunangan oni katubunia Simson. Puuraunangan toga nenda samba si Tuhan masipanukaninia;

²⁵ samba kateteret ainia ka pusapougat suku Dan, sikuddu ka oggak Zora samba Esytaol, taddanangan Ketsat Tuhan masikau ron tubu katubunia.