Pas. 12 - BUKO SIPUNENAN

Si Jefta samba suku Efraim

¹ Kateteret nenda suku Efraim airapatatarek tubudra pasaggak, iageti ei sia masitalipoki bagat oinan Jordan masiailiake Zafon. Kuarangan kai Jefta, “Angoi ta anusogai kai anusaggangi tai Amon? Kineneiget te kulabo kai ekeu samba lalepnu.”

² Kuanangan si Jefta, “Ai pagolukatmai simakope tai Amon samba tai Gilead. Aku sogaian kai kam masiropmake masibelaake aku ka tai Amon nenda, tapoi ta amoi kam.

³ Oto, kele akuitconia, ta momoi le kam masiropmake aku, riuriuakekungan mei masisaggangi tai Amon, kenanen mamatei aku. Iageti si Tuhan masiake kamanangan ka tubuku masikalaake sia. Angoian le moi kam kineneiget masisaggangi aku?”

⁴ Lepa geti ruruakenangan sangamberi tai Gilead si Jefta, lepa geti pasaggakrangan masisaggangi suku Efraim, kalaakerangan tai Efraim. (Tai Gilead sikukuddu ka Efraim samba Manasye arasuksuk sia tai Efraim aipoi arasaraakean tubudra ka Efraim, sukudra.)

⁵ Tai Gilead sipasasaggak nenda masikudduiji sangamberi kudduat putalipokat ka bagat oinan Jordan, bule ioi rakera sia tai Efraim sioba mutuitui. Kateteret sara tai Efraim, situtuitui, itiddou tuobaake bule iputalipo, rere'rangannia tai Gilead. “Taleu tai Efraim ekeu?” Ke ialegi, “Taa',”

⁶ koiniakerangannia masikua “Syibolet? Ke ikua “Sibolet” kalulut ta momoi itiboake nganga nenda simaipo, oto labarangannia samba mateiakerangannia ka sara kudduat putalipokat nenda. Oto kateteret nenda epat pulurua ngaribu sia tai Efraim amatei.

⁷ Enem ngarura burunia si Jefta iuteake sia tai Israel. Iageti tata'nia lepa rateiakerangannia ka laggainia iate ka laggai Mizpa ka Gilead.

Ebzan, Elon samba Abdon

⁸ Kele ailepa kai Jefta, uteakenangan paamian Israel si Abzan sibara ka Betlehem.

⁹ Ai tatogania si Abzan telu pulu taimanteu samba telu pulu tainanalep. Tatogania tainanalep nenda talimouakenangan sia ka sirimanua sibara ka suku bagei, samba alanangan telu pulu taiokko sibara ka suku bagei addeat tatogania taimanteu. Pitu ngarura burunia si Ebzan masiuteake Israel,

¹⁰ lepa geti tata'nia samba rateiakerangannia ka Betlehem.

¹¹ Kele ailepa kai Ebzan, uteakenangan paamian Israel si Elon sibara ka suku Zebulon pulu ngarura burunia.

¹² Lepa geti tata'nia samba rateiakerangannia ka Ayalon ka kupkumen laggai Zebulon.

¹³ Kele ailepa kai Elon, uteakenangan paamian Israel si Abdon togat Hilel sibara ka Piraton.

¹⁴ Tatogania taimanteu ai epat pulu sia, samba sapunuteteunia taimanteu ai telu pulu sia. Senendra ai sangamuneng kalidei pakeietda. Balu ngarura burunia aiuteake paamian Israel si Abdon.

¹⁵ Lepa geti tata'nia samba rateiakerangannia ka Piraton ka kupkumen laggai Efraim ka leleura tai Amalek.