Pas. 11 - BUKO SIPUNENAN

¹ Si Jefta iate sara saladru simakope gege. Ipulalaggai ka Gilead. Onin ukkuinia si Gilead tapoi inania sirimanua sipuoolop tubu.

² Ukkuinia nenda ai leu et tatogania simanteu sabagei sibara ka sinanalepnia simakolou. Kele aramabeu tatoga nenda, keklerangan si Jefta ka lalep. Kuarangan ka tubunia, “Ta' te anai nusisilo ikepmakenennu sibara ka ukkuinia, aipoi ekeu toga sibara ka sinanalep bagei le.”

³ Kalulut nenda putuituinangan si Jefta ka sasarainania samba pulaggainangan ka daerah Tob. Sedda mungkuat sirimanua sigalai sikatai patadde ka tubunia iageti ei sia masiraurau.

⁴ Piga pa burunia sibabara tai Amon masisaggangi tai Israel.

⁵ Kateteret aipuaili nenda, sia sikebbukat Israel ka Gilead ei sia masina'na si Jefta ikaddiuake laggai Tob.

⁶ Kuarangannia, “Uteake kai masisaggangi tai Amon.”

⁷ Tapoi aleginangannia si Jepta, “Ta' pat bulat makope lagat bagamui katubukku? Anukeklengan kam aku ka lalep ukkuiku. Kipangan le anuoi kam kineneiget ka tubuku, kateteret ai kam ka bagat puokkiman?”

⁸ Alegirangannia, “Amoian kai kalulut obamai bule nuuteake sangamberi sipulalaggai ka Gilead addeat masisaggangi bangsa Amon kineneiget leu et.”

⁹ Kuanangan si Jefta, “Ke nuna'na kam aku toili ka Gilead masisaggangi bangsa Amon samba akenangan si Tuhan ka tubutta kamanangan, aku te geti ibailiu utemui.”

¹⁰ Alegirangannia, “Koba kai, si Tuhan le iagainia.”

¹¹ Oto ei si Jefta simakere pasamba sia saute ka Gilead. Lepa geti sipulalaggai ka Gilead masirioakenia ibailiu utera samba ute ka pasaggangan. Samba ka matat Tuhan ka Mizpa, segeakenangan tiddogetnia ka tubut sipulalaggai ka Gilead.

¹² Lepa nenda koiniakenangan sia si Jefta ka tubut rimatadra tai Amon addeat masikua kisene, “Apa puseleatmai ibailiu kam masisaggangi tobbou laggaimai?”

¹³ Rimata bangsa Amon masialegi ka sirimanua sikoiniakenen nenda, “Kateteret araoi paamian Israel baradra ka Misir, alarangan polakmai, barania ka bagat oinan Arnon aili ka bagat oinan Jabok samba bagat oinan Jordan. Kineneiget toiliake kam nenda ka erut baga.”

¹⁴ Lepa koiniakenangan sia minca sirimanua ka tubut rimatadra tai Amon

¹⁵ addeat masialegi kisene, “Paamian Israel bulat ta araraurau polakdra tai Moab ele polakdra tai Amon.

¹⁶ Kateteret arakaddiuake Misir tai Israel, araailiake ka Teluk Akaba masienungi polak simangai lepa sege ka Kades.

¹⁷ Lepa geti koiniakerangan sirimanua katubut rimatadra tai Edom bule ratiddou iobaake raenungi tobbou laggaira. Tapoi ta aiobaake. Lepa geti tiddourangan kisedda leu et ka tubut rimatadra tai Moab, tapoi ta leu et aiobaake sia raenungi tobbou laggaira. Kalulut nenda paamian Israel kuddu sia ka Kades.

¹⁸ Lepa geti riuriuakerangan pusilaijatdra masienungi polak simangai, tapoi ta araenungi tobbou laggaira tai Edom samba tai Moab, tapoi arabokko le pat sege ka isit kabelaiat sulu Moab, ka silat bagat oinan Arnon. Pusapourangan sedda, tapoi ta aratalipoki bagat oinan nenda, kalulut tobbou laggai nenda ai ka kupkumen Moab.

¹⁹ Lepa nenda paamian Israel masikoiniake sirimanua katubut Sihon, rimatadra tai Amori ka Hesybon bule ratiddou iobaake sia raenungi laggai Amori, kalulut sia masiailiake bulat laggaira.

²⁰ Tapoi si Sihon ta aiobaake sia kalulut ta matonem bagania, aipoi ta sarat oba'ra masienungi le. Tapoi ikau peile sangamberi saladrunia, lepa pusapourangan ka Jahas iageti saggangirangan tai Israel.

²¹ Tapoi si Tuhan, Taikamanuan Israel, masikau kamanangan ka paamian Israel arasaggangi tai Sihon samba sangamberi saladrunia. Kisedda arabakkati tai Israel sangamberi polakdra tai Amori sipulalaggai ka tobbou laggai nenda.

²² Kupkumen laggai Amori nenda kudduijirangannia barania ka Arnon ka isit kaiaman, pat aili ka isit ka bare bagat oinan Jabok, samba barania ka polak simangai ka isit kabelaiat sulu, pat aili ka bagat oinan Jordan isit ka kabelekat sulu.

²³ Oto si Tuhan, Taikamanuan Israel, nenda te amasikekle sia tai Amori addeat rubeiat paamian Tuhan.

²⁴ Samba kineneiget taleu noba kam masiala minca? Polak siaket Kamos, sabulunganmui nenda, ka tubumui momoi ibailiunia bakkatmui. Tapoi apa siaket Tuhan, Taikamanumai ka tubumai ta kuobaake kai.

²⁵ Nukua le te ekeu peile maeru kai Balak togat Zipor, rimatadra tai Moab? Si Balak ta aisaggangi kai.

²⁶ Telu ngotu ngarura burunia tai Israel masikudduiji Hesybon samba Aroër samba leu desa-desa ka sigoiliknia, samba sangamberi laggai ka bebet bagat oinan Arnon, angoian le kateteteret nenda ta anulania minca?

²⁷ Ta' masele kai ka tubumui. Ekeu le masele kalulut anusaggangi kai. Tuhan sipasiukum nenda Nia leu sipasiukum ka gogoi nene masitakkiake paukelat nene ka bangsa Israel samba bangsa Amon.”

²⁸ Tapoi rimata Amon ta ipuuku patonekat sibara kai Jefta nenda.

²⁹ Lepa geti sopsopnangan si Jefta Ketsat Tuhan. Iageti ei si Jefta masiailiake laggai Gilead samba Manasye, iageti toilinia ka Mizpa ka Gilead. Barania sedda riuriuakenangan puenunganannia ka kupkumen laggai bangsa Amon.

³⁰ Galainangan palelengan nene si Jefta ka tubut Tuhan, “Ke iobaake si Tuhan kukalaake tai Amon,

³¹ samba toili aku simaarau, oto kasei siboiki bela ka lalepku masiroroi aku kupangunguruatnake te geti addeat buluakenen rarangen katubut Tuhan.”

³² Lepa talipokinangan bagat oinan Jordan si Jefta bule isaggangi tai Amon, samba kaunangan kamanangan ka tubunia si Tuhan.

³³ Sagganginangan sia si Jefta barania ka Aroër pat aili ka legret Minit – sangamberinia rua pulu laggai samba sege ka Abel-Keramim. Bulat makope igi tai Amon simamatei, bailiu makalarangan ka tai Israel.

Togat Jefta siokko

³⁴ Kateteret aitoili si Jefta ka Mizpa, oi togania siokko masiroroinia sipututuru aibobo'bo rebana. Nenda te togania sisasara.

³⁵ Kele aiitconia si Jefta, bara reureu bagania simakope bailiu biritnakenangan leppeinia, kuanangan, “Ale togakku, sou le bagakku Angoi ekeu le sibaraake sou bagakku? Amusuppangan aku kai Tuhan, samba ta'an momoi kuoleinia!”

³⁶ Iageti kuanangan siokko nenda katubut Jefta, “Ukkui, amusuppangan ekeu kai Tuhan, samba ioba si Tuhan nulumunake kataira tai Amon, saggaknu nenda. Oto apa sipalelekngakenennu, buita nugalaiake.”

³⁷ Kuanangan siokko nenda, “Sara le tiddogetku: Ake kaku tetere rua ngalaggo bule mei aku masigejengi leleu sambamai saaleiku. Sedda te kusoibi uktuk tubukku, kalulut kukakaddiuakean le tetere pusiookoku.”

³⁸ Obaakenangannia ukkuinia, lepa tuituinia. Siokko nenda samba saaleinia ei sia ka simaleleu mureureu baga sedda, kalulut mamateian le nia sitaiputatalimou samba sita' tatoga.

³⁹ Kele aisaliu rua ngalaggo, toilinia ka ukkuinia, iageti galaiakenangan ukkuinia kele sipaleleknia ka tubut Tuhan. Iageti tata'nia siokko nenda ai peile teteret siokko. Nenda te panandaat angoi katalagatda tai Israel, matukkle

⁴⁰ sangamberi tatoga taiokko mei senen rura burunia epat ngagogoi addeat mureureu baga masirepdep togat Jefta ka Gilead.