Pas. 10 - BUKO SIPUNENAN

Tola

¹ Kele aitata' si Abimelekh, si Tola togat Pua, ibailiu ute addeat masibelaake tai Israel. Si Tola iate punuteteu Dodo sibara ka suku Isakhar. Ikukuddu ka Samir ka simaleleu leleu Efraim.

² Dua pulu telu ngarura burunia iuteake paamian Israel, lepa tata'nia iageti rateiakerangannia ka Samir.

Jair

³ Kele ailepa kai Tola, uteakenangannia si Jair Israel rua pulu ngarura burunia. Si Jair sibara ka Gilead.

⁴ Togania simanteu ai telu pulu sia. Ai telu ngamuneng kalidei tunggangandra samba telu pulu desa ka Gilead. Sangamberi desa nenda ai peile rakukua desa Jair.

⁵ Si Jair leu et tata', samba rateiakerangannia ka Kamon.

Jefta

⁶ Majorangan minca paamian Israel ka tubut Tuhan. Ta'an arapuuku si Tuhan samba ta'an amanindou sia. Buluijirangan sabulungan Baal samba Asytoret, samba leu sabulungan bangsa Siria, Sidon, Moab, Amon samba Filistin.

⁷ Kalulut nenda pugolunangan si Tuhan katubutda paamian Israel, bailiu Nia masiobaake bangsa Filistin samba bangsa Amon masikupkupmake sia.

⁸ Pulu balu ngarura burunia rua bangsa nenda masipaorei sangamberi tai Israel sipulalaggai ka Gilead, iate laggaira tai Amori isit ka kabelaiat sulu bagat oinan Jordan.

⁹ Aratalipoki peile bagat oinan Jordan tai Amori raei masisaggangi suku Jehuda, Benjamin samba Efraim bailiunangan paamian Israel bulat mangorik.

¹⁰ Iageti pusogarangan paamian Israel ka tubut Tuhan, kuarangan, “Amajongan te kai ka tubum, kalulut ta akupuuku kai Ekeu, oi Taikamanuamai. Aku buluiji kai sabulungan Baal.”

¹¹ Tapoi ngangan Tuhan katubutda tai Israel: “Ta' pa' Aku le amasipaarau kam ka kabeira tai Misir, tai Amori, muntogat Amon, tai Filistin,

¹² tai Sidon, suku Amalek samba suku Maon sioreiji kam, kateteret anupusogakam katubukKu?

¹³ Kenanen poi kisedda, ialeu et ai peile nuteteiteiake kam Aku, iageti ei kam masibuluiji sabulungan. Kineneiget ta'an kuoba masibelaake kam.

¹⁴ Kenannan le kam ka sabulungan sipilimui nenda. Pusogangan kam manindou katubutda! Siangan le sipasirorom kam kateteret ka bagat puokkiman.”

¹⁵ Tapoi kuarangan ka tubut Tuhan sia paamian Israel, “Amajongan kai, Tuhan. Galaiakean le apa siobakat bagam, sarat ropmake le kai gogoi nene.”

¹⁶ Lepa geti ribbaiakerangan sangamberi tularat sabulungan, lepa panindourangan ka Taikamanua. Iageti si Tuhan ta'an momoi iopmake paatuatNia masiitco sia ka bagat puokkiman.

¹⁷ Kateteret nenda tai saladdudra tai Amon amatarekngan sia pasaggak. Rapusasapou ka Gilead.

¹⁸ Sedda te sirimanua simigi tai Israel samba sia saute sibara ka suku Israel nenda raparere' pasasambadra, kasei pa sirimanua simagege masitadda masisaggangi bangsa Amon. Sirimanua nenda te tubailiuake siuteake sangamberi sipulalaggai ka Gilead.