Pas. 1 - BUKO SIPUNENAN

Suku Jehuda samba suku Simeon masilaba' si Adoni-Bezek

¹ Kele aitata' si Josua, parererangan paamian Israel kai Tuhan, “Tuhan, suku kaipa katalagamui muboiki masisaggangi tai Kanaan?”

² Aleginangan si Tuhan, “Suku Jehuda. Akukauan ka sia gege masioppu laggai nenda.”

³ Lepa kuarangan suku Jehuda katubudra suku Simeon, “Romake kam kai masisaggangi tai Kanaan samba masioppu kupkumen laggai siteuakenen Tuhan ka kam. Lepa geti ropnakemaian kam masioppu kupkumen laggai siteuakenen Tuhan ka kam.” Iageti sia suku Simeon

⁴ samba Jehuda ei sia simakere pasaggak. Samba kaunangan kamanangan katubudra si Tuhan kalaakerangan tai Kanaan samba tai Feris. Pulu ngaribu saladdudra tai saggak amatei ka Bezek.

⁵ Seserangan si Adoni-Bezek rimatat tobbou laggai nenda samba saggangirangannia.

⁶ Tuituinia, tapoi kukrurangannia samba labarangannia, lepa geti tippurangan inan sikebbut singongai kabei samba rerenia.

⁷ Kuanangan si Adoni-Bezek, “Siburu pitu pulu tai rimata aku tippu inan singongai kabei samba reretdra, lepa obaakekungan sia masikom legei komen sibebele' ka mejakku. Kineneiget aigalaiakean Taikamanua katubukku kele sigalaiakenenku katubudra.” Lepa geti taroakerangan si Adoni-Bezek ka Jerusalem, samba seddangan le mateinia.

Suku Jehuda masikalaake Jerusalem samba Hebron

⁸ Saggangirangan Jerusalem tai Jehuda, lepa oppurangannia samba laborangan laggai nenda samba leu mateiakerangan sipulalaggai sedda.

⁹ Kele ailepa nenda ei sia minca masisaggangi tai Kanaan sipulalaggai ka simaleleu, samba ka gilak tinambu; ia leu et minca sikuddu ka simagarak ka isit kaiaman,

¹⁰ samba ka laggai Hebron, iate laggai oniakenenda siburu Kiryat-Arba. Sedda tai Jehuda masikalaake muntogat Sesai, Ahiman samba Talmai.

Si Otniel masikalaake laggai Debir

¹¹ Baratda ka Hebron, tai Jehuda ei sia masisaggangi laggai Debir, kateteret nenda oninia Kiryat-Sefer.

¹² Ai sara sibara katalagat suku Jehuda nenda, oninia si Kaleb, masikua, “Kasei moi masioppu Kiryat-Sefer, momoi iputalimou ka togakku sinanalep si Akhsa.”

¹³ Si Otniel, togat baginia si Kaleb sipuoni Kenas, masioppu laggai nenda. Iageti si Kaleb masikau si Akhsa, togania, ibailiu sinanalep Otniel.

¹⁴ Ka gogoi putalimougatdra, tubbuinangan si Akhsa si Otniel bule itiddou sangamata polak ka ukkuinia. Iageti gorosotnia ka keliddeinia si Akhsa, lepa rereakenangan katubunia si Kaleb apa simakiddi ka bagania.

¹⁵ Aleginangannia si Akhsa, “Makiddi ka bagakku piga pa bubuakat oinan, aipoi polak siakenu katubukku nenda aile ka simagarak.” Iageti kaunangan katubunia si Kaleb bubuakat oinan ka rubeiat ka tiri samba bubuakat oinan ka rubeiat ka tanggurat.

Kamamanangra suku Jehuda samba suku Benjamin

¹⁶ Muntogat Habab, lakut Mose, iate tai Keni, masitut tai Jehuda bela baratda ka Jerikho, laggai kurma, samba ei sia ka laggai simagarak ka isit kaiaman Arad ka Jehuda. Seddangan le kuddu sia katalagat bangsa Amalek.

¹⁷ Lepa geti sambatda suku Simeon, suku Jehuda ei sia simakere masisaggangi samba masikalaake tai Kanaan sipulalaggai ka laggai Zefat. Pateleijirangan laggai nenda, lepa geti pakatairangannia iageti oniakerangannia Horma.

¹⁸ Lepa suku Jehuda masioppu Gaza pasamba kupkumennia, Askelon pasamba kupkumennia samba Ekron pasamba kupkumennia.

¹⁹ Samba ipaalei le si Tuhan suku Jehuda, pat kuddu sia ka simaleleu nenda; tapoi ta'araalau sipulaggai ka peleu, aipoi senganberi sirimanua nene ai sangamberi kereta laba'.

²⁰ Kele siparentaakenen Mose, Hebron tukau le katubut Kaleb, aipoi siburu telu ngarubeiat muntogat keturunan Enak ai keklengan sia si Kaleb ka laggai nenda.

²¹ Suku Benjamin ta amoi arakekle tai Jebus rabela ka laggai Jerusalem. Nenda te lulunia tai Jebus aipeile sia mulaggai simakere sambatda tai Benjamin.

Suku-suku muntogat Josef masikalaake Betel

²² Muntogat Josep leu mei masisaggangi Betel, samba si Tuhan masipaalei sia.

²³ Muntogat Josep masikoiniake sirimanua masitaiko Betel nenda – onin laggai nenda siburu iate Lus.

²⁴ Iageti ailirangan sara simanteu sibara ka laggai, kuarangan katubunia, “Ke nuoba masiropmake kai bule ioi kutuguru kai ka bagat laggai nene, galaiakemaian simaeru katubum.”

²⁵ Iageti sirimanua nenda masisausau' katubutda enungan katugurukat laggai nenda. Oto sia tai Efraim samba Manasye masiguruki laggai nenda samba leu mateiakerangan sangamberi sipulalaggai sedda, sarat sirimanua nenda samba saeppunia ta aramateiake.

²⁶ Lepa geti pajaujaunangan ka laggaira tai Het, iageti galainangan sara laggai sedda samba oniakenangannia Lus. Laggai nenda ialeuet oninia.

Bangsa-bangsa sitaituituiakenenda tai Israel

²⁷ Suku Manasye ta arakekle sipulalaggai ka Bet-Sean, Taanakh, Dor, Jibleam samba Megido pasamba sangamberi laggai ka be'benia. Bailiu tai Kanaan ai peileu sia mulaggai sedda.

²⁸ Kirenangan kele ai tuppai rondra tai Israel, kaurangan tai Kanaan mugalai simaron, tapoi bulat ta arakekle tai Kanaan nenda.

²⁹ Ka laggai Gezer, suku Efraim ta' arakekle tai Kanaan, sikudduiji laggai nenda. Oto tai Kanaan ai peile sia mulalaggai sedda simakere sambatda suku Efraim.

³⁰ Sipulalaggai ka laggai Kitron samba Nahalol ta leu et arakekle sia suku Zebulon. Nenda te lulunia bangsa Kanaan aipeile sia mulalaggai sedda simakere sambatda suku Zebulon, tapoi tai Kanaan rakau sia mugalai simaron addeatda.

³¹ Sipulalaggai ka laggai Ako, Sidon, Ahlab, Akhzib, Helba, Afek samba Rehob leu ta arakekle sia suku Asyer.

³² Nenda te lulunia tai Kanaan, bulat sikudduiji tobbou laggai nenda aipeile sia mulalaggai simakere sedda pasamba sia suku Asyer.

³³ Sipulalaggai ka laggai Bet-Semes samba Bet-Anat leu ta arakekle sia suku Naftali.

³⁴ Bangsa Amori masiokkip muntogat Dan ka isit simaleleu samba ta' raobaake sia ratugorosot ka simapeleu,

³⁵ samba tai Amori nenda rabesiake le rapukuddu ka Har-Heres, ka Ayalon samba ka Saalbim, kenanen bai airapaoreijisia muntogat Josep, aipoi ibailiu le' sia sipugagajai enungan.

³⁶ Ka isit bare ka Sela, pasongan laggaira tai Amori sisabau Panatarat Akrabim.