Pangt. 9 - BUKO SIPUNENAN

Pasogaiat sikut patuat samba pasoga'at taiagai patuat

¹ Sikut patuat aigalaian lalepnia, samba airioakean sipitu ariginia,

² masijaja tarimeu ka jajaket, mamsigaluake manggurnia, samba masipatarek tattanakenennia.

³ Sapaguguletnia tainanalep aikoiniakean sia musoga ka kuduat sangamberi simabuak ka laggai:

⁴ “Kasei sitaanai siagai, konan kam sene”; samba katubut sitaigaia arat, kuanangan:

⁵ “Konan kam, kom kam rotikku, samba lo kam anggur silepa kugaluake;

⁶ ribbaiake kam taiaga patuat, murimanua geti kam, samba tutnake kam enungan puagai kolou.”

⁷ Kasei masigelaiake sara sirimanua simaasa baga, masibaraake asat baga katubunia, samba kasei masitelei sara sirimanua sikatai, isilo le puailaat.

⁸ Bui nupatelei sara sirimanua simaasa baga, bule bui imalaga baga katubum, telei le simasiku patuat, bailiu manuntunangan bagania katubum,

⁹ kau ngantoman ka simasiku patuat, bailiu tuppainangan leu pusisikut patuatnia, gelaiake sirimanua simatopit, bailiu tuppainangan puaagainia.

¹⁰ Panandaat sikut patuat iate loto ka Taikamanua, samba masiagai Sipulubeunan iate puaagai kolou.

¹¹ Kalulut aku manantanangan ruram, samba tuppainangan rurat puririmanuam.

¹² Ke masiku patuatnu, sikut patuatnu nenda bakkatnu saram, ke paasa ekeu, ekeu saram le geti masibabaiarat.

¹³ Sinanalep simakela patuat simangamang manibo, bulat taanai siagainia samba ta iagai aila.

¹⁴ Mukuddunia le nia ka matatbaliu lalepnia ka uddut korosi ka sangamberi kudduat simabuak ka laggai,

¹⁵ samba sirimanua situsasabau ka enungan, simaropoi enungannia sogainangan sia, kuanangan:

¹⁶ “Kasei sitaiagai patuat, konan kam sene”; samba ka sitaiagai arat, kuanangan:

¹⁷ “Oinan sinangkou mananam, samba roti sikom ka simalipput mananan.”

¹⁸ Tapoi sirimanua nenda taiagai, sedda ai paketsatketsat samba sangamberi sirimanua sisogainia ai sia ka laggaira taikabaga.