Pangt. 8 - BUKO SIPUNENAN

Nganturat sikut patuat

¹ Ta pa musoga sikut patuat, samba puaagai masipaarep ngangania?

² Uddut sangamberi kudduat simabuak ka bebet enungan ka sangamberi parubaiat enungan, sedda te ipuririo,

³ ka bebet sangamberi matatbaliu gugurukat ka matat laggai, ka enungan gugurukat, sedda te ipusosoga sabeu nganga:

⁴ “Ale kam taimanteu, katubumui te kupusosoga, katubut sangamberi togat sirimanua kusegeake ngangangku.

⁵ Ale sirimanua sitaanai siagai, besiake puagaiat, ale sirimanua simakela patuat, kau nuagai kolou ka patuatmui.

⁶ Arepmake, kalulut kukua te sangamberi pakaro simakeru, samba kubukaake geti bibokku pagalaiat sangamberi pakaro simaipo.

⁷ Kalulut jalaiku masikua katubulanan, samba patajuat iate kasitsitnakenen bibokku.

⁸ Sangamberi sitiboakenen bibokku iate katuroipoat, taanai kupaigi ele simakoilut.

⁹ Sangamberinia nenda matoila ka simaagai, maroipo ka sirimanua simaagai.

¹⁰ Silo le sigelaiakenenku bele peile perak, samba puaagai bele peile mas simaeru.

¹¹ Kalulut sikut patuat peile makeppu saki ka pulaingeat simakeppu saki, aponia pa kiddiet bagat sirimanua tamomoi tupakereakenia.

¹² Aku, sikut patuat, mukuddu simakere pasamba puaagai, samba kusese puagaiat samba sikut patuat.

¹³ Loto ka Taikamanua iate masipulagaki baga sikatai, malaga bagakku ka pubuangan patuat samba paraboat sikatai, samba ngungu simasun patajuat.

¹⁴ Katubukku ai nganturat samba pupaatuanan simakeru, aku te puaagai kolou, katubukku te puronan.

¹⁵ Kalulut aku tai rimata mupaneiei, samba siabeu tiboi tubu masiteuake katuroipoat.

¹⁶ Kalulut aku sangamberi siabeu tiboi tubu magegerangan kisedda leu et siabeu puooni samba sangamberi sipasiukum ka polak.

¹⁷ Manuntu bagakku ka sirimanua simanuntu baga katubukku, sirimanua simaom baga masigaba aku rasesese aku.

¹⁸ Pukaioat samba katuumunan ai katubukku, kisedda leu et pukaioat simatom samba katuroipoat.

¹⁹ Buakku peile makeppu saki ka mas, samba mas simaeru, sibaraakenenku bele peile ka perak simaeru.

²⁰ Muenung aku ka enungan katubulanan, katalagat enungan puroipoat,

²¹ bule kugalakake pukoiat ikepmakenen ka sirimanua sipununtuki aku baga, samba kusutake pangoirikatda.

²² Aibaraakean aku si Tuhan sibailiu siboiki ka pugagalaiNia, sibailiu sigalaiNia bulat siboiki siburu.

²³ Kateteret siburu peile atugalaian aku, bulat siboiki, kepei bara polak.

²⁴ Kepei bara koat simalio, amututuan matakku, kepei bara bubuakat simasun oinan.

²⁵ Kepei muuddutat paleleuleleu samba patinambutinambu amututuan matakku;

²⁶ kepei ibaraake polak si Tuhan samba leu su'su, ele abut polak simagaktuk siboiki.

²⁷ Kateteret aipatarek manua, ai aku sedda, kateteret aigorot reret manua ka uddut koat simalio,

²⁸ kateteret aipagalak tanai rusa ka manua, samba bubuakat koat simalio sipububuggra simaroirai,

²⁹ Kateteret aiteuake pasongan ka koat bule oinan ta ipasabau surukatNia, samba kateteret aigalakake sangamberi bongen polak,

³⁰ ai aku pasambaNia sibailiu toga kilebet baga, senen gogoi aku ibailiu siangkaake bagaNia, samba mariuriu kupaguile ka mataNia;

³¹ paguilekungan ka uddut polakNia samba togat sirimanua ibailiu puaangkakat bagakku.

³² Kalulut nenda, kam tatoga, arepmake kam aku, kalulut mauktuk te sia sisuru sangamberi enunganku.

³³ Arepmake kam nganturat, bailiunangan leu kam simasiku patuat; bui nupasibbu kamnia.

³⁴ Mauktuk te sia siarepi aku, sipasingena aku senen gogoi ka matatbaliu lalepku, samba sipasijago arigit matatbaliu kudduatku.

³⁵ Kalulut kasei sisese aku, silonangan leu purimanuaiat, samba iobania si Tuhan.

³⁶ Tapoi kasei sitaisese aku, ta mauktuknia, sangamberi sirimanua sipulagaki aku baga, ipununtuki le baga kamateiat.”