Pangt. 7 - BUKO SIPUNENAN

¹ Ale togakku, ometnake tiboietku, samba koiriake nganturatku kabagat patuatnu.

² Ometnake le nganturatku, bule imaeru puririmanuam, koiriake le sigelaiakenenku kele luikut matam.

³ Sereake le sangamberinia nenda ka singongainu, samba suratnake nenda kabagat patuatnu.

⁴ Kua le katubut sikut patuat, “Ekeu te sarainangku” samba poiliat puaagai kolou nenda sibailiu suruaknu,

⁵ bule isakkeri ekeu ka sinanalep sikatai, ka sinanalep siooiake, siputitiboat simananam.

⁶ Kalulut kateteret ka sara gogoi akupaitco, ka lobok jandelat lalepku,

⁷ itcokungan katalagat sitaigaia patuat, sesekkungan katalagatda tai lainge sara sibau tubu sitaiagai patuat,

⁸ siputatalipo kabebet taiming enungan, lepa bakkouakenangan rerenia iei ka lalep sinanalep kele nenda,

⁹ kateteret kasoibokat, itadda imainep, ka soibo simagepgep.

¹⁰ Iageti oi sara sinanalep masiamiakenia, sipuleppei puoloman tubu sipupatuat sikatai;

¹¹ simangamang manibo, sitaiagai aila, rerenia sitaiottot ka lalep,

¹² ta mauju ei nia ka enungan, lepa ta mauju minca ei nia ka polak simalio, ka bebet senen parubaiat enungan ipasiloplop.

¹³ Iageti lakkaiakenangan samba sigguknangan silainge nenda, samba ka bagat tatat ailania kuanangan katubunia:

¹⁴ “Buita kupanguruatnake buluakenen puaragat, samba ka gogoi nene akululuian panguruat sipalelekakenenku.

¹⁵ Iate lulunia akubela masiamiake ekeu, kugaba ekeu samba kineneiget akusesengan ekeu.

¹⁶ Akungangaakean apot pereman simalainge ka peremanku, komak simaalit baga simaigi putubuat sibara ka Misir.

¹⁷ Peremanku akupakarapan mur, simoite samba loina simasingin.

¹⁸ Kauan tasegeake pubotbotnan tubutta teret simanseman, samba tananam simakere puooba.

¹⁹ Kalulut simanteuku taanainia ka lalep, ai nia kabagat puenunganan ka sareunan,

²⁰ sangasuppit bulagat aiabbit, samba totoilinia ka laggo sabeu.”

²¹ Ina'na sibau tubu nenda senengamata tiboiet pusuman, kabagat tiboiet simananam iumunakenia.

²² Iageti sinulut sibau tubu nenda tutnangan sinanalep nenda kele jaui ituambit ka pasijajakat, samba kele sirimanua sitaiagai patuat kaapparat ukumakenen,

²³ teret bela kasila iorak patuatnia silogui; kele uma sitububurut simaola siailiake sesere, sitaigaietnia, purimanuaiatnia aiat ka legret kamateiat.

²⁴ Kalulut nenda, ale tatoga, arepi kam aku, lelekake kam sikuakku.

²⁵ Bui itusoip patuatnu ka enungan sinanalep nenda, samba bui nupepeake tubum ka sangamberi enungannia.

²⁶ Kalulut maigi simamatei simateiakenennia, bulat maigi te sirimanua simateiakenennia.

²⁷ Lalepnia iate enungan ka laggaira tai kabaga, situgogorosot ka sangamberi bilik kamateiat.