Pangt. 6 - BUKO SIPUNENAN

Senengamata panganturat

¹ Ale togakku, ke ibailiu ekeu sipasilului utak aleinu, samba nugalai palelengan ka sabagei;

² ke iorak ekeu kalulut tiboietnu, samba iorak ekeu kalulut palelengannu,

³ galaiake le kisene, ale togakku, samba belaake tubum, kalulut aiat ekeu kabagat kupkumen aleinu: kenan, purekkuk, samba na'na aleinu nenda;

⁴ bui nuperep boiki, samba bui imalaulau matam;

⁵ Belaake tubum kele simatsura ka sesere, kele uma ka kabeira sipasiekketnia.

⁶ Ale sitaimamala, kenan katubut sigep, lelekngake galai tubunia samba kau ibailiu ekeu simasiku patuat,

⁷ kenanen taanai siuteakenia, sipasikeli samba sikupkupmakenia,

⁸ itarengake le rotinia kateterat gogoi simalegeu, samba iruruake komennia kateteret pasimoneiat.

⁹ Ale sitaimamala, pigamoian le burunia nuperep? Pigamoian le nutususuru ka peperepnu?

¹⁰ “Ta mauju perepnia minca, lepa malaulaunangan minca, pukkuddunangan iperepmake tubunia minca” –

¹¹ iageti oi pugebakat katubum kele ioi sara saladdu, samba gulai sibabara kele sirimanua sibara pamatei.

¹² Taanai katukaunannia samba bulat sikatai le sirimanua sipuririmanua simunengake boko,

¹³ sipeipeiake matania, sipaguileake rerenia samba sisau'sauake singongainia,

¹⁴ patuatnia simapatajuat, sarat masiisiake sikatai, samba sibaraake pagolukat.

¹⁵ Iate lulunia ioraknia katusubuat sinulut, simaruei le tusubuakenia samba taan momoi tualeakenia minca.

¹⁶ Enem ngamata simalagania si Tuhan, samba pitu pakaroat sibailiu kasitsiakenenNia:

¹⁷ mata pubuangan patuat, jalai simapajoat, kabei simateiake sirimanua sitaimasele,

¹⁸ patuat siisiake senengamata sikatai, rere simaruei pabalau siailiake sikatai,

¹⁹ sirimanua simunengake boko masipangangaake pabokoat samba sibaraake pagolukat ka sasaraina.

Nganturat pagalaiat paelenan

²⁰ Ale togakku, pasikeli tiboiet ukkuinu, samba bui nupasibbu sigelaiakenen inam.

²¹ Ottonake simariuriu sangamberi nenda ka patuatnu, ngalouake le ka lolokkatnu.

²² Ke muenung ekeu, palulunangan ekeu, ke merep ekeu, jagonangan ekeu, ke tusuru ekeu, tekanangan ekeu.

²³ Kalulut tiboiet nenda iate alito, samba nganturat nenda iate toro samba paasekat nenda sigelaiake ekeu ka enungan purimanuaiat,

²⁴ sipasisasakkeri ekeu ka sinanalep sikatai, ka patajuatda jalai sinanalep siooiake.

²⁵ Bui iala bagam laingen tubunia, bui iala bagam arepetnia.

²⁶ Kalulut ka sara simaolop tubu sangajaja roti le bulat ibesiake, tapoi sinanalepda sabagei masikukru engan simakeppu saki.

²⁷ Momoi pa raambit obengan sirimanua kabagat leuleu leppeinia tapoi ta ilalabo leppeinia?

²⁸ Momoi pa rapuenung sirimanua ka bot obengan, tapoi ta mararagget rerenia?

²⁹ Kisedda leu et sirimanua sipaperepmake sinanalep aleinia; taanai berisara, sirapenia, ibela ka ukuman.

³⁰ Ta pa tupalololoi geti sirimanua sipananangkou, ke manangkounia isegeake bagania kalulut laje?

³¹ Samba ke tulabania, buita ilului pitungaminca pitu, sangamberi pukaioat ka lalepnia buita ikau.

³² Kasei sigalaiake paelenan iate sitaigai patuat; sirimanua sigalaiake kisedda masipakatai tubunia.

³³ Paoreiat samba paloloiat le siloketnia ailania ta iagai tuposa.

³⁴ Kalulut suksuk iate golut sara simanteu, ta iagai katet baga ka gogoi pasilumunan;

³⁵ ta ioba geti masisilo panebui aponia pa, samba bulat ta ipaoba bagania, kenanen piga pa iginia kaunennu.