Pangt. 5 - BUKO SIPUNENAN

Nganturat pagalaiat paelenan

¹ Ale togakku, lelekake pusisikut patuatku tongiake piunu ka puaagai sigelaiakenenku,

² bule mariuriu nusiddoni sikut patuat samba bibom masisuru puagaiat.

³ Kalulut bibot sinanalep sikatai masibaibaiake suat mani samba bagat ngangania peile malulut ka tula,

⁴ tapoi kalepakatnia mapongitnangan kele lappegu, samba malauru kele lanjau sirua son.

⁵ Rerenia tugorosot masiailiake kamateiat, bakkounia siailiake laggaira taikabaga.

⁶ Ta ienungi enungan purimanuaiat, mapepenangan ka neungan taiagaietnia.

⁷ Kalulut nenda, ale kam tatoga, arepi kam aku, bui nutusoip kam ka tiboietku.

⁸ Areuake enungannu ka sinanalep kele nenda, samba bui nulegreake tubum ka matatbaliu lalepnia,

⁹ bule bui nukau bau tubum ka sirimanua sabagei, samba rurat puririmanuam ka sirimanua sikatai;

¹⁰ bule bui raektekngake tubutda sirimanua sabagei ka pukaiaotnu, samba bui ituguru puuktungannu sigabam ka besit tubum ka lalepda sirimanua sitaiagaietnu

¹¹ samba kalepakatnia pangoriknungan, ke masubu akkula samba tubum,

¹² lepa geti kuanungan, “Ah, angoi malaga bagakku ka nganturat, samba ikeraake patuatku paasekat;

¹³ angoi ta akuarepi nganganda tai gurukku, samba akutongiake piuku ka sipasigegelaiake aku?

¹⁴ Malegrengan le kubele ka senen pugejaat baga katalagat paamian samba perurukat.”

¹⁵ Lo le oinan sibara ka sinanalepnu, lo le oinan sibara ka uggungannu sipububuggra.

¹⁶ Mateu pa ipubuggra bubuakatnu ka uja kele bagat oinan ka polak simalio?

¹⁷ Kau le ibailiunia bakkatnu saram, bui leu ibailiunia bakkatda sabagei.

¹⁸ Kalulut nenda, kau nupuangka baga pasamba sinanalepnu, pugora le baga pasamba sinanalepnu sitalimouakenennu kateteret silainge:

¹⁹ simatsura simalainge tubu, simatsura simaanjak, kau le imariuriu isege bagam ka buat tottotnia, samba mariuriu imaala bagam kalulut nuntut bagania.

²⁰ Ale togakku, angoi iala bagam ka sinanalep bagei? samba nulakkaiake ru'rukat sinanalep bagei?

²¹ Kalulut sangamberi enungan sirimanua matoila le ka matat Tuhan, samba sangamberi bakkou sirimanua ailelekngake.

²² Sirimanua sikatai tusere kabagat pukakatainia, samba tusere kabagat jonia sarania.

²³ Matei le nia, kalulut ta aisilo nganturat samba kalulut kopet taiagaina patuat malimainangan.