Pangt. 4 - BUKO SIPUNENAN

Nganturat bule itugaba sikut patuat

¹ Arepmake kam, ale tatoga, nganturat sara ukkui, samba lelekngake kam bule nusese kam puaagai kolou,

² kalulut kuake le puaagai simaeru katubumui; bui nukaddiuake sigelaiakenenku.

³ Kalulut kateteret aipeile aku ka lalep ukkuiku sibailiu toga, siluluk samba sibailiu togat inangku sisasara,

⁴ gelaiakenangan aku ukkuiku, kuanangan, “Obaake patuatnu iometnake tiboietku; siddoni le sigelaiakenenku, bule imaeru puririmanuam.

⁵ Bakkati le sikut patuat, bakkati puaagai kolou, bui nukalipoginia, samba bui nutusoip ka sikuakku.

⁶ Bui nukaddiuake sikut patuat nenda, bailiu puukunangan geti ekeu, pununtukinia baga, bailiu jagonangan ekeu.

⁷ Panandaat sikut patuat iate: Masibakkati sikut patuat samba ka sangamberi sisilonu kau nubakkati puaagai kolou.

⁸ Abeuakenia, abeuakenangan geti ekeu; ibailiuake le ekeu siabeu, ke nulakkaiakenia.

⁹ Akenangan te geti kirit ogo simalainge ka utenu samba panguruatakenangan pulatsanan simalainge katubum.”

¹⁰ Ale togakku, arepi samba silo le tiboietku, bule imaburu puririmanuam.

¹¹ Kugelaiake enungan pusisikut patuat katubum kupalulu ekeu ka enungan simaroipo.

¹² Ke muenung ekeu ta isasaila bakkounu, ke mubalau ekeu ta isosoksok rerem.

¹³ Siddoni le nganturat, bui nuobaakenia, pasikeli le nia, kalulut nia te purimanuaiatnu.

¹⁴ Bui nuenungi enunganda sirimanua sikatai, samba bui nututnake sirimanua sikatai paraboat.

¹⁵ Areuake ekeu ka enungan nenda, bui nuenunginia, bui nutusoip sedda samba riuriuake le nupuenung.

¹⁶ Kalulut ta memerep sia, ke tapei ragalaiake sikatai; tata le laulaura, ke tapei ramateiake sirimanua;

¹⁷ kalulut mukom le sia roti pukakatai, samba mulo anggur.

¹⁸ Tapoi enunganda sirimanua simatopit kele torot sulu simanseman, makokope le toronia pat muine toronia imatago.

¹⁹ Enunganda sirimanua sikatai kele pugepgeman le, ta raagai aponia lulunia isosoksok reretda.

²⁰ Ale togakku, lelekake tiboietku samba tongiake piunu ka nganturatku;

²¹ bui ituareu sangamberinia nenda ka matam, koiri le nenda kabagat patuatnu.

²² Kalulut nenda te sibailiu purimanuaiatda sisilonia samba katualeat sangaliot tubutda.

²³ Pasikeli patuatnu kabagat tarek simakolou, kalulut sedda te ibabara purmanuaiat.

²⁴ Ribbaiake tiboiet pabokoat katubum, samba areuake katubum tiboiet patajuat sipepeake sirimanua.

²⁵ Kau imariuriu nukinere simariuriu ka mata samba numattai simariuriu kamata.

²⁶ Enungi enungan simagaktuk samba kau ipusara sangamberi enungannu.

²⁷ Bui nutusoip kai kattoet ele kai katciu areuake rerem ka pukakatai.