Pangt. 30 - BUKO SIPUNENAN

Sangamberi tiboiet Agur togat Jake

¹ Tiboiet Agur, togat Jake sibara ka Masa: Ngangan sirimanua nenda: Masaggongan aku, Ale Taikamanua, masaggongan aku, pat tata ron tubukku.

² Ta kuagai patuat kele tarimeu, puaagai sirimanua taanai katubukku.

³ Kisedda leuet ta akugelai pusisikuat patuat bailiu ta kuagai pagalaiat Taikamanua.

⁴ Kasei pa atugorosot samba amei ka manua? Kasei pa amasiruruake rusa ka bagat takepnia? Kasei pa amasitabutake oinan ka komak? Kasei pa amasiteuake tu'tut polak? Kasei oninia samba kasei onin togania? Bulatnia, nuagai le!

⁵ Sangamberi tiboiet Taikamanua sipunenan le. Nia iate korabbi ka sirimanua simatonem baga katubuNia.

⁶ Bui nutuppai tiboietNia bule bui igolu ekeu samba ikua ekeu sipaboboko.

⁷ Ale Taikamanua, rua le tiddogetku katubum, iate: bui Nukeraakenia kepei matei aku, iate:

⁸ Areuake katubukku patajuat samba pabokoat. Bui nuake pugebakat samba pukaioat. Eddangan kunanam komen siripot rubeiatku.

⁹ Kalulut ke maektek aku, taan kugagaba Ekeu samba kuakungan: Kasei Tuhan nenda? Ele ke mageba aku, panangkoukungan, samba pakataikungan onin Taikamanuangku.

¹⁰ Bui nupaloloi sara pagugulet katubut tuannia, bule bui ipateleiji ekeu samba silonungan leu siripot puseleat nenda.

¹¹ Ai reddenan sipateleiji ukkuinia samba sitaisukatnake inania.

¹² Ai muntogat sikau tubunia simalina, tapoi ta'pei atubuinia ka simalolitnia.

¹³ Ai muntogat sikau tubunia simatopit, situkakarai akekeilut matania.

¹⁴ Ai muntogat sipusoson iate lanjau, sonnia iate palittei, sipasikokom pat sappru sirimanua siruoorei ka polak.

¹⁵ Alumate ai rua togania: “Aku sibakkatnia!” samba “Aku sibakkatnia!” Ai telu ngamata sitaimasege baga:

¹⁶ Laggaira taikabaga, sinanalep sitaipususule, samba polak sitaimasege baga ka oinan, samba obengan sitaipasikukua: “Paat!”

¹⁷ Mata sipasigegeigei ukkui, samba taioba iarepake inania ipilania le nia geti seggut su'su samba ikom le nia togat manyang.

¹⁸ Ai telu ngamata simakisei kabagakku, samba, ai epat ngamata taiagaietku:

¹⁹ enungan manyang ka tanai rusa, enungan ulou ka uddut bulak, enungan kapa ka talagat koat, samba enungan sara simanteu pasamba sara siokko.

²⁰ Nene te enungan sinanalep sipaelet: pukomnangan, lepa posainangan ngungunia, samba kuanangan: ta akugalai sikatai!

²¹ Kalulut telu ngamata ipugeret polak, samba, kalulut epat ngamata tamomoi igalai tubunia:

²² kalulut sara pagugulet, ke ibailiunia rimata, kalulut sara sirimanua simakela patuat, ke maekteknia komen,

²³ kalulut sara sinanalep taiobaket sirimanua, ke bara simanteunia, samba kalulut sara pagugulet sinanalep, ke ibesiake iala puaabeu tuannia sinanalep.

²⁴ Ai epat tarimeu bulat sigoiso ka polak, tapoi bulat simangamang:

²⁵ sigep, mungkuat sitaimaron tubu, tapoi sipasigagalai lalepnia ka leleu bukku,

²⁶ pelanduk, tarimeu sitaimaron tubu, tapoi igalai le lalepnia ka uddut leleu simabulak,

²⁷ sit sitaanai rimata, tapoi makolou patunan pukukuddutda,

²⁸ supsup, sioi tutakep, tapoi ai leu et nia ka uma purimataat rimata.

²⁹ Ai telu tarimeu simaron pabakkou, samba, epat ngamata simaron muenung, iate:

³⁰ singa, simaron tubu ka sangamberi tarimeu, sitaimaloto katubut kasei pa.

³¹ Gougou simanteu simaukkat, ele kambing simanteu samba sara rimata sipuenung kamatatda siberikabaga.

³² Ke nubuakake patuatnu kabagat taiagainu patuat, petpetake kabei ka ngungum!

³³ Kalulut, ke tuneinei susu, baranangan leu mentega, samba ke tuneinei asak, belanangan leu logau, samba ke tupetpetake golu, baranangan paaggarat.