Pangt. 29 - BUKO SIPUNENAN

¹ Kasei simakope kelat patuat, kenanen atuaseakeannia, ka sara gogoi makatainangan samba taan momoi tupaeru minca.

² Ke ituppai sirimanua simatopit, pugorarangan leu baga sirimanua siberikabaga, tapoi ke muute sirimanua sikatai, pangorikrangan leu sirimanua siberikabaga.

³ Sirimanua sipununtuki baga sikut patuat siangkaake bagat ukkuinia, tapoi kasei sipaaleiake sirimanua simaolop tubu sitatataake pukaioatnia.

⁴ Kabagat puroipoat sara rimata masirioake laggainia, tapoi sirimanua siruruake juran simigi mabukkat le laggainia.

⁵ Sirimanua siumun saaleinia, masingangaake sesere ka rerenia.

⁶ Sirimanua sikatai isere le nia jonia, tapoi sirimanua simatopit muangka baga le geti samba mugora baga.

⁷ Sirimanua simatopit raagai bakkatda sitaioi tubu, tapoi sirimanua sikatai ta raagai katukolobatnia.

⁸ Simaasa baga masipakatai laggai, tapoi simasiku patuat masilepaake golu.

⁹ Ke pakaro simasiku patuat ka sitaiagai patuat pugolunangan sitaiagai patuat samba mugaga, bailiu taanai pusanangan.

¹⁰ Sirimanua simaonggou logau masipulagaki baga sirimanua simatopit, tapoi simatopit igaba le puaragatnia.

¹¹ Sirimanua simakela patuat ibelaake le golunia, tapoi sirimanua simasiku patuat masilepaake golunia.

¹² Ke maletsei kabagatda saute ka pabokoat, bailiunangan sikatai sangamberi sipugagalai.

¹³ Simageba samba sipaoorei paaili, samba si Tuhan masigalai matatda mutoro.

¹⁴ Rimata sipasiukum sitaioi tubu kabagat puroipoat, maronnangan leu purimataatnia teret buruburu.

¹⁵ Tutura samba paasekat sibaraake sikut patuat, tapoi toga siobaakenen ipakaila le inania.

¹⁶ Ke ituppai sirimanua sikatai, tuppainangan leu jo, tapoi sirimanua simatopit raitco le geti katusubuatda sirimanua sikatai.

¹⁷ Gelaiake togam, iageti akenangan te geti pusanangannu, samba baranangan leu puaangkakat bagam.

¹⁸ Ke taanai pamoilianan, bailiu maliaknangan siberikabaga. Mauktuk te sia simareddet ka surukat.

¹⁹ Ka sara pagugulet ta sarat tiboiet momoi tugelaiakenia, kalulut kenanen iagai kolou, tapoi ta maletsei bagania.

²⁰ Nuinco sirimanua simaruei manibo; maigi peile ngenaakenen ka sirimanua simakela patuat bele peile ka sirimanua nenda.

²¹ Kasei masipusum pagugulet barania kasibau tubu peile kalepakatnia bailiunangannia simakela patuat.

²² Simagolu masibaraake paaggarat, samba sirimanua simaruei mugolu, maigi jonia.

²³ Pubuangan patuat masiputata sirimanua, tapoi sirimanua simaepe patuat, masisilo katuumunan.

²⁴ Kasei masisilo rubeiat sibara ka sipananangkou, ipulagaki le baga tubunia. Arepnangan pateleijeat, tapoi ta aipaagaiake.

²⁵ Loto ka sirimanua sibaraake pangoringan, tapoi kasei matonem baga katubut Tuhan, maarau le nia.

²⁶ Maigi sirimanua sipususum ka saute, tapoi sibara kai Tuhan sirimana masisilo katuroipoat.

²⁷ Sirimanua sitaiagai patuat iate kasitsitakenen ka sirimanua simatopit sirimanua simaroipo enungan iate kasitsitakenen ka sirimanua sikatai.