Pangt. 28 - BUKO SIPUNENAN

¹ Pabalau le sirimanua sikatai kenanen taanai sikukrunia, tapoi sirimanua simatopit maaraunia kele singa sibau tubu.

² Kalulut pukelakat patuat sara laggai maiginangan siuteakenia, tapoi kalulut sirimanua siagai kolou samba simaagai mariuriunangan surukat.

³ Sirimanua simageba sipaoreiji sangamberi sirimanua sitaioi tubu iate kele urat simakope tirit, tapoi ta sibaraake komen.

⁴ Sirimanua sitaipuletsei surukat masiumun sirimanua sikatai, tapoi simareddet ka surukat isaggangi le sirimanua sikatai.

⁵ Sirimanua sikatai ta iagai puroipoat, tapoi sirimanua sigaba si Tuhan iagai senengamata.

⁶ Maeru peile simageba simaeru paraboat bele peile sirimanua simaigi pabilukat enungannia kenanen makaionia.

⁷ Sirimanua sireddet surukat iate toga siagai kolou, tapoi sipaaleiake sirimanua simaalau baga ipakailaake le ukkuinia.

⁸ Sirimanua siruruake pukaioatnia kabagat pasiaala uktuk ka bulagat sikatai, iruruake nenda uktukda sirimanua simanuntu baga ka sangamberi sirimanua sitaioi tubu.

⁹ Kasei masipisikake talingania bule ta iarepi surukat, kisedda leu et panindogatnia iate kasitsitakenen.

¹⁰ Kasei masipepeake sirimanua simaroipo patuat ka enungan sikatai bele le nia geti ka lobok sigalainia, tapoi sangamberi sirimanua simalina patuat iikepake le geti pusanangan.

¹¹ Sirimanua simakaio iaddeake le tubuinia simasiku patuat, tapoi sirimanua simageba simatopit iagai le kaseinia sibulatnia.

¹² Ke mamanang sirimanua simatopit, maiginangan leu paumunan sirimanua, tapoi ke muute sirimanua sikatai, lipputnakenangan tubutda sirimanua.

¹³ Kasei silipputake jonia ta mauktuknia, tapoi kasei sipoiliat samba sikaddiuake jonia, tupununtuki le nia baga.

¹⁴ Mauktuk te sia sirimanua simariuriu loto katubut Tuhan, tapoi sirimanua sikelaake patuatnia iorak le nia geti gejat baga.

¹⁵ Kele singa sipurorou ele beruang sipasikukukru, kisedda te sirimanua sikatai siuteake siberikabaga sitaioi tubu.

¹⁶ Sara sipuute sitaanai puaagai kolou maron paoreijatnia, tapoi sirimanua sipulagaki baga uktuk sikatai, masipaburu rurania.

¹⁷ Sirimanua simateiake sirimanua sabagei, mutuitui le nia pat aili ka ratei. Bui nukeraakenia!

¹⁸ Kasei malina paraboat tuarauake le geti nia, tapoi kasei simaigi pabilukat enungannia bele le nia geti ka lobok.

¹⁹ Kasei masigalai polaknia maektek le nia komen, tapoi kasei masikukru bibilet sitapaluluat maektek le nia ka pugebakat.

²⁰ Sirimanua sioi tukatonemi masise maigi panukanan, tapoi sirimanua sioba maruei makaio, ta bebelania ka ukuman.

²¹ Ta maeru tupabaggei sirimanua, tapoi sangajaja roti sirimanua masigalai puseleat.

²² Sirimanua simakiu baga maruei ikukru pukaioat, samba ta iagai, iorak le nia geti pugebakat.

²³ Kasei sipasiake sirimanua tupukateki le geti nia baga simakope bele peile sirimanua siake paumunan.

²⁴ Kasei masiraurau ukkui samba inania samba iaddeake nenda ta jo, nia iate aleira mungkuat sipananangkou.

²⁵ Sirimanua simaalau baga; masibaraake pagolukat, tapoi kasei matonem baga katubut Tuhan, tukau le uktuk sipususukkra.

²⁶ Kasei masikaroake pinaatunia sarania, iate sirimanua simakela patuat, tapoi kasei sipuparaboat kabagat sikut patuat maarau le nia geti.

²⁷ Kasei masikau katubutda simageba taanai geti simagulai ka sia, tapoi sitabbo matania bulat tupateleiji le nia geti.

²⁸ Ke muute sirimanua sikatai, lippputakerangan tubutda sirimanua, tapoi ke masubu sia, tuppainangan sirimanua simatopit.