Pangt. 27 - BUKO SIPUNENAN

¹ Bui nuumun tubum kalulut gogoi mansep kalulut ta nuagai aponia sipuaaili ka gogoi nenda.

² Eddangan raumun ekeu sirimanua sabagei samba ta ngungum, sirimanua sitaiagaietnu samba ta bibom.

³ Bukku iate masane samba ngai leu ai sanenia, tapoi makope peile sane ka ruania iate besit patuat ka sitaiagai patuat.

⁴ Pugolukat nenda bulat makatai samba sibaraake katukataikat, tapoi kasei momoi siomake suksuk baga?

⁵ Maeru peile paasekat sibelaakenen ka nuntut baga simalipput.

⁶ Saalei pabobo kabagat nuntut baga, tapoi saggak pasigguk simasabau.

⁷ Sirimanua simaektek masipaperaki suat mani, tapoi ka sirimanua simalaje senengamata simapongit bailiu mananam.

⁸ Kele uma sipututuitui ka rumunnia kisedda te sirimanua sipututuitui ka kudduatnia.

⁹ Tula simasingin samba pusinginan iate siangkaake baga, tapoi pangoringan masipabirit tubu.

¹⁰ Bui nukaddiuake aleinu samba alei ukkuinu. Bui nuei ka lalep sarainam kateteret ai ekeu kapugejaat baga. Maeru peile ka pabebakenennu lalep bele peile ka sasarainam ka sareunan.

¹¹ Togakku, kau numasiku patuat, angkaake bagakku, bule ioi kualegi sirimanua sipaloloi aku.

¹² Ke raitco pugejaat baga simasiku patua, pulipputnangan, tapoi sirimanua sitaiagai patuat mariuriu le ipuenung, lepa oraknangannia kamateiat.

¹³ Ala le leppei sirimanua silului sirimanua sabagei, samba kerania sibailiu kupkupakenennu silit sirimanua siooiake.

¹⁴ Kasei masikau paroroiat simanseman ka saaleinia ka nganga simaron, tuaddeake le nenda sibailiu pateleiat katubunia.

¹⁵ Sikalalep sioba pagolu kele nau urat sitaipuari ka sanganantat gogoi.

¹⁶ Kasei masikerania masike rusa, samba kabeinia sikattoet masikupkup tula.

¹⁷ Laba masilauruake laba, sirimanua masilauruake saaleinia.

¹⁸ Kasei masipuuku loinat ara, komnangan leu buania, kasei masipuuku tuannia tuabeuake le nia geti.

¹⁹ Kele oinan masiailiggouake pumataat, kisedda leu et patuat sirimanua masiailiggouake sirimanua nenda.

²⁰ Laggaira tai kabaga samba katusubuat ta sesege bagania, kisedda leu et matat sirimanua taanai kasegekat bagania.

²¹ Kui uktuk masianauake perak samba obengan masianauake mas, samba tuagai sirimanua siripot katuumunan sikau katubunia.

²² Kenanen nutuddu sirimanua kabagat panundukat, ta leu et tatata katubunia taiagaina patuat.

²³ Kau nuagai simakolou purimanuaiat biribirim, lelekake mungkuat tarimeunu.

²⁴ Kalulut pukaioat bibilet ta matotom. Bulatnia leu pa kirit purimataat mariuriu ka sangamberi reddenan?

²⁵ Ke tata turuturu samba matoila sinula sibau, samba tururuake turuturut leleu,

²⁶ baranangan leu et leppeinu sibara ka bulut biribirim samba kambing simanteu sibailiu pasisakit mone,

²⁷ kisedda leu et suat tottot sibailiu komennu samba sangalalepnu, samba purimanuaitda sapaguguletnu tainanalep.