Pangt. 26 - BUKO SIPUNENAN

¹ Kele salju ka gogoi simaoloi samba urat ka gogoi pasimoneian, kisedda leu et puaabeu ta mateu ka sirimanua simakela patuat.

² Kele ituburut uma samba laggi-laggi, kisedda te pateleiat sitapaluluat ta iorak sia.

³ Liliso iate ka kuro, pasimuri ka kalidei, samba loina bobobo ka teitei sirimanua simakela patuat.

⁴ Bui nualegi nganganda sirimanua simakela patuat siripot taiagaina, bule bui ibailiu ekeu kele nia.

⁵ Alegi le nganganda simakela patuat siripot taiagaina patuat, bule bui ikau tubunia simasiku patuat.

⁶ Kasei masikau patonekat ka sirimanua simakela patuat bule isegenia, makere le aibakbakake rerenia samba masilo kamateiat.

⁷ Nganturat ka ngungunda sirimanua simakela patuat iate kele rere situulei bele peile sirimanua simasakit.

⁸ Kele rakau sirimanua bukku ka pipingping, kisedda te sirimanua raabeuake sirimanua simakela patuat.

⁹ Nganturat ka ngungun sirimanua sinakela patuat iate kele rui sikakkak kabei sirimanua simapuineng.

¹⁰ Kasei masikau mugalai sirimanua simakela patuat samba sirimanua situsasabau iate kele sipasipapana simaujuake senen sirimanua.

¹¹ Kele jojo itoili minca ka geleknia, kisedda te sirimanua simakela patuat ioleake taiagaina patuat.

¹² Ke nuinco sirimanua sikau tubunia simasiku patuat, ngenaakenenda sirimanua smakela patuat peile maigi ka sirimanua nenda.

¹³ Kuanangan sitaimamala, “Ai singa ka enungan! Ai singa ka lobok!”

¹⁴ Kele iputumeng matatbaliu ka engselnia, kisedda te sitaimamala ka peremannia.

¹⁵ Sitaimamala masisoneake kabeinia kabagat piring, tapoi makope le saggo itoiliakenia ka ngungunia.

¹⁶ Sitaimamala masikau tubunia simasiku patuat, bele peile sipitu sirimanua sipasialegi kabagat sikut patuat.

¹⁷ Sirimanua siei ka pagolukatda sabagei, iate kele sirimanua sipasilaba talingan jojo situsasabau.

¹⁸ Kele sirimanua siroro masibetuake silogui obengan, silogui samba kamateiat,

¹⁹ kisedda te sirimanua sipajo saaleinia samba masikua, “Paguileatku le.”

²⁰ Ke tata loina, mapenangan leu obengan; ke taanai sirimanua sioba masipakatai nganga, taibaranangan leu pagolukat.

²¹ Kele putcu ka bo sipuobek samba loina ka obengan, kisedda te sirimanua sioba pagolu ka oloi pagolukat.

²² Kele simanana, tiboiet sipakatai nganga tuguru kabagat patuat.

²³ Kele karagatat pariok sisepu ka perak, kisedda simananam titiboat kabagat patuat sikatai.

²⁴ Simalaga baga mananam titiboatnia tapoi patuatnia sun le patajuat.

²⁵ Ke masurunia, bui imatonem bagam katubunia, kalulut pitu pukakatai ai ka patuatnia.

²⁶ Kenanen ilipputake lagat bagania tapoi makoinong le pukakatainia ka matat sirimanua.

²⁷ Kasei masigaigai uggungan bele le nia geti ka bagania, kasei masiguiluake bukku, bukku nenda le geti isaksaknia.

²⁸ Jalai simapatajuat malaga bagania ka pajoetnia, samba titiboat simananam sibaraake katusubuat.