Pangt. 25 - BUKO SIPUNENAN

Sangamberi nganturat Salomo siruruakenenda sipugagalai kai Hizkia

¹ Nene iate nganturat Salomo sisuratakenenda sipugagalai ka uma purimataat Hizkia, rimata Jehuda.

² Pulatsanan Taikamanua iate ai sara keleat, tapoi pulatsananda tai rimata iate masilelekake sara katukolobat.

³ Kele buaknia manua samba kerunia polak, kisedda patuatda tai rimata, tamomoi tusinougi.

⁴ Linaake le boiki lolit katubut perak iapeite ibela simalainge ka siagai masigalai mas.

⁵ Belaake kam sipangantru sikatai ka uma purimataat, iapeite imaron purimataat kalulut pubulanan.

⁶ Ke mei katubut rimata bui ta ka epet patuat, bui nukau tubum sirimanua kele siabeu tiboi tubu.

⁷ Kalulut maeru peile rakua katubum sirimanua: “Konan sene ka pata,” daripada rapakaila ekeu kamatatda sirimanua siabeu tiboi tubu. Aileu nuiinco,

⁸ bui makope ruei nugalai pakaroat, kalulut, babara ekeu le bulat masele aponiangan le momoi nugalai?

⁹ Lepaake le pakarom katubut aleinu nenda, tapoi nukua pakeleatda sirimanua sabagei.

¹⁰ Kalulut rakukua geti ekeu sioba masitiboi sirimanua samba makatainangan leu onim burut purimanuaiatnu.

¹¹ Tiboiet kuanen itutiboake ka gogoi sipasesese iate kele buat apel mas ka mangkok perak.

¹² Paasekatda sirimanua simasiku patuat iate kele sipisip mas samba pulaingean kencana.

¹³ Kele leppetnia tinobut ka gogoi pasimoneian, kisedda pakoinien simatopit ka sirimanua sikoiniakenia. Isanangake le patuatda tai tuannia.

¹⁴ Tinobut samba rusa sita urat, kisedda te sirimanua sibuakake patuatnia ka taiaakena panguruat.

¹⁵ Ka ombaga, momoi imatonem baga sara rimata samba tiboiet simaeru iate sibakbakake tolat.

¹⁶ Bui nukom suat mani simigi, babara ingangau ekeu.

¹⁷ Bui makope reirei nuei kalalepda pabebeakenennu lalep, babara mabebeilinia, lepa malaganangan bagania katubum.

¹⁸ Sirimanua simunengake boko katubut saaleinia iate kele bobobo ele lanjau ele silogui simalauru.

¹⁹ Putotonem baga ka sirimanua sipatataju kateteret puokkiman iate kele son simaguluu samba rere sijegeu.

²⁰ Sirimanua siuraiake urai ka sirimanua sipureureu baga iate kele sirimanua sigolok leppeinia kateteret gogoi simaleppet, samba kele raro ka lubbenia.

²¹ Ke malaje saggaknu, kau le kannia, samba ke maonggounia, kaunungan leu lonia.

²² Kisedda nugalai bule imaila samba panukaninangan leu ekeu si Tuhan.

²³ Rusa sikabare iate sibaraake urat, kisedda leuet patitiboi iate sibaraake golu.

²⁴ Maeru peile mukuddu taiming lapprat lalep daripada mukuddu sangalalep pasamba sikakalep sioba pagolu.

²⁵ Kele oinan simaeru kateteret tumaonggou kisedda tusilo katureman simaeru sibara ka laggai simareunan.

²⁶ Kele matat oinan simalimo samba bubuakat simalolit, kisedda te karat bagatda sirimanua simatopit ka sirimanua sikatai.

²⁷ Ta maeru mukom suat mani simigi, kisedda taimaerunia tukua tiboiet paumunan.

²⁸ Sirimanua sitaioi ipasikeli tubunia iate kele laggai simararagat irip puronannia.