Pangt. 24 - BUKO SIPUNENAN

¹ Bui masisi bagam ka sirimanua sikatai, samba bui nupaaleiake sia.

² Sarat masipaatu paoreijat le sia samba bibotda masitiboake pugejaat baga.

³ Kabagat sikut patuat tugalai le' lalep, kabagat puaagai nenda turioake,

⁴ samba kabagat puaagai kolou, tukau le bibilet simakeppu saki samba simalainge kabagat bilik.

⁵ Simasiku patuat peile bulat kailaakenen ka sirimanua siabeu tiboi tubu, samba puagaijat peile bulat siabeu bele peile simaron tubu.

⁶ Kalulut kepei pasaggak buita atupaatungan boiki sipulelelek, samba ke maigi sipangangantru, babara te kamanangan.

⁷ Sirimanua sitaiagai patuat tamomoi rakeruiji sikut patuat; ta ibubuka ngungunia ka matatbaliu sabeu.

⁸ Sirimanua sarat siisiake sikatai iate sibaraake pulamagat.

⁹ Masipaatu sitagalai iate taiagai patuat, sirimanua simaasa baga, ta raobania sirimanua.

¹⁰ Ke ta maron patuatnu ka bagat puokkiman, simagulai tubu le ekeu.

¹¹ Belaake sia sirimanua mateiakenenda ka bagat ukuman, arauake sia sirimanua tiggotakenenda.

¹² Ke nukua bai, “Nenda bulat ta kuagai kai.” Ta pa Nia sisibo patuat ta iagai bulat sipuaaili? Ta pa iagai Nia sijago tubum, samba silumunake sirimanua siripot sigalainia?

¹³ Togakku, kom suat mani, kalulut maeru le nenda, kele suat mani ka rumunnia, mananam itukom.

¹⁴ Kisedda leuet sikut patuat maeru ka katubum: Ke masiku patuatnu, maerunangan leu purimanuaiatnu ka gogoi sibabara.

¹⁵ Bui nutaiko kudduatda sirimanua simatopit kele sirimanua sikatai, buinupakatai lalepnia.

¹⁶ Kalulut, kenanen mareirei rabele sirimanua simatopit, tapoi tusuru le sia minca, tapoi sirimanua sikatai geti masubu le sia.

¹⁷ Bui imangka bagam ke matei saggaknu, samba bui nupugora baga ke belenia,

¹⁸ bule bui iitconia si Tuhan samba ikuania sikatai, lepa pisikakenangan matania ka sirimanua nenda.

¹⁹ Bui nupugolu kalulut ragalaiake sikatai sirimanua, bui imasisi' bagam ka sirimanua sikatai.

²⁰ Ka sirimanua sikatai taanai purimanuaiatda ka gogoi sibabara alitotda sirimanua mape le geti.

²¹ Togakku, kau numaloto katubut Tuhan samba kau nusuru rimata, bui nusaggangi ka ruania.

²² Kalulut sigege le rabaraake pugejaat baga, samba kasei siagainia katusubuat sibaraakenenda nenda?

²³ Nene leu et nganturatda sirimanua simasiku patuat. Ta maeru pasipabaggei kabagat pakaroat.

²⁴ Kasei masikua katubutda sirimanua sikatai: “Ta masele ekeu”, rapateleiji le nia geti sangamberi sirimanua.

²⁵ Tapoi sirimanua siukum simasele sikatai, mauktuk le nia samba tuabeuake.

²⁶ Kasei masikau alegiat sipasesese iate toggaiat pasuruangan simaeru.

²⁷ Bui nurioake lalep, ke ta'pei anutarekake monem samba pasigabaiajatnu.

²⁸ Bui ibailiuake ekeu sipasimuneng ka sirimanua sabagei sitapaluluat samba bui numunengake boko nujoakenia.

²⁹ Bui nukua, “Kululumunake te katubunia kele sigalaiakenennia katububuku. Kulumunake le ka sirimanua siripot sigalainia.”

³⁰ Akusabaugi monen anggur sara sirimanua sitaimamala samba monen anggur sitaiagai patuat.

³¹ Akuitco sedda iate puo simarui, polak atabboannia boroboroi, samba iripnia amabukkatan.

³² Kele akuleleakenia samba akupaatunia, itcokungannia samba sesekungan sara nganturat.

³³ Ta mauju merep minca, ta mauju malaulau minca,” ta mauju lakkaiake kabei merep minca,”

³⁴ iageti oi pugebakat kele ioi sara sipasasaggak, samba gulai sibabara kele ioi sipasiraurau sibara pamatei.