Pangt. 23 - BUKO SIPUNENAN

¹ Ke mukuddu samba mukom kam simakere sara sirimanua siabeu tiboi tubu, kau nurepdep kaseinia.

² Ke maereu ekeu kokom, omake ereunu kokom nenda.

³ Bui maalau bagam ka komen sitarekakenennia, babara bule pajoatnia le nenda katubum.

⁴ Bui nubesiake numakayo. Galakake besiakenennu nenda.

⁵ Kalulut, sangapeipeikat mata le itata pukayoatnu nenda, kele sibara kappo le nia samba tuburutnangan ka manua kele uma manyang.

⁶ Bui nupakomake sirimanua simakiu baga, samba leu bui iala bagam kannia simananam.

⁷ Kalulut ikukua te, “Kom samba lo,” tapoi kapatuatnia geti ta kisedda. Simananam putitiboat le nia, tapoi ka patuatnia geti bagei le.

⁸ Babara aponia sikomnu, gelekakenungannia minca, samba sangamberi tiboietnu simananam katubunia tanai katukaunannia.

⁹ Bui nupangantru sirimanua sitaiagai patuat, aipoi ta ipuleletsei nganturatnu.

¹⁰ Bui nuparitci song polak siikepakenen ele nuala polak bakkatda sitaina samba sita'ukkui.

¹¹ Kalulut, Tuhan iate simaron siropake sia, Nia te masiroropake sia ralawan ekeu.

¹² Kau nulelekake nganturat samba pasigelai simakolou.

¹³ Bui nukeraake nganturat ka togam, ke nuboboake katubunia sasa, ta mamateinia,

¹⁴ Nuboboake katubunia sasa tapoi nuarauake le engania ka laggaira taikabaga.

¹⁵ Ale togakku, ke masiku patuatnu, mangkanangan bagakku.

¹⁶ Magoranangan leu bagakku ke nutiboake tiboiet simaeru.

¹⁷ Bui imasisi' bagam ka sirimanua sijo, kau mariuriu numareddet ka Taikamanua,

¹⁸ bule imaeru purimanuaiatnu ka gogoi sibabara, samba ta mapepepe besiakenennu.

¹⁹ Ale togakku, arepake! Kau numasiku patuat, pasikeli simakolou paraboatnu.

²⁰ Bui nupaalei sirimanua sioba mulo simapuinengen ele simaalau baga.

²¹ Kalulut ibabailiu te sia geti simageba, ke sarat merep nugalai, ta te mauju nupuleppei simabirit.

²² Kau mareddet ekeu ka ukkuinu, aipoi ke taanainia ta babara ekeu, ke amabajaan inam, kau nupakoinong bulat susurununia.

²³ Kau nusaki pubulanan samba bui nusakiakenia, kisedda leuet sikut patuat, nganturat samba puagaijat.

²⁴ Muangka baga le sara ukkui ke ai togania simaeru paraboat, samba mugora baga le nia ke masiku patuat togania.

²⁵ Eddangan ipugora baga ukkui samba inam, samba mauktuk te sinanalep situtuake matam.

²⁶ Ale togakku, lelekake simakolou samba ului le enungan purimanuaiatku!

²⁷ Kalulut sinanalep sipuolop tubu iate lobok simakeru, samba sinanalep siooiake iate uggungan simaokkip.

²⁸ Kele sipasiraraurau le sia rapasingena ka enungan samba rabailiuake leu maigi taimanteu sipaelet.

²⁹ Kasei mangongorik? Kasei mukakatci? Kasei pajojogglo? Kasei mungungunyuk? Kasei babara siorangan katubunia sitapaluluat? Kasei mabobonan mata?

³⁰ Sia te sipulolo anggur simakope igi samba sipulolo simapuinengen pat aili tengamoi, sia siooi masinanam anggur sigaluakenen.

³¹ Bui iala bagam ka anggur, kenanen maala bagatta bonan suania samba makirisau ka bagat pulokat samba leu mananam ituguru ka lolokkat,

³² tapoi mansepnia le, kele sipila ulou simalaga son le ekeu.

³³ Maramunnangan matam, patuatnu ta makolou samba sarat manibo nugagalai.

³⁴ Kele ai ekeu katalagat lektuk koat, kele sirimanua ka uddut arigit kapa'.

³⁵ Lepa kuanungan, “Arabobo' le aku sirimanua, tapoi ta akuorik besinia. Rapattaake aku sirimanua, tapoi ta aiagai tubukku. Pigamoi aisurui aku? Kugaba le minca lo'ku anggur.”