Pangt. 22 - BUKO SIPUNENAN

¹ Nama baik peile makeppu saki ka pukaioat simigi, rapununtuki baga sita sirimanua peile maeru ka perak samba ka mas.

² Simakayo samba simageba pukerekatda, sibaraake sia sangamberitda iate si Tuhan.

³ Sirimanua simasiku patuat iareuake le tubunia ke iitco kamateiat, tapoi sirimanua sitaiagai patuat mariuriu le ipuenung, lepa oraknangannia kamateiat.

⁴ Epet patuat samba reddet katubut Tuhan, iate pukaioat, puaabeu samba purimanuaiat.

⁵ Rui samba sesere ai ka enunganda sirimanua sitaimaroipo patuat, kasei sijago tubunia iareuake le tubunia ka sirimanua nenda.

⁶ Gelaiake le sara toga siripot simateu katubunia, iageti pat bajaknia murimanua le nia kisedda.

⁷ Simageba masikupkupake sirimanua simageba, sipuutak ibailiunia pagugulet katubut sirimanua puutangannia.

⁸ Sirimanua sipangangarap patajuat isilo le gejat baga, kalepakatnia igalai siobat bagania tata'.

⁹ Sirimanua simeru patuat ipanukani le si Tuhan, kalulut iparubei le pukayoatnia ka sirimanua simageba.

¹⁰ Kekle le sirimanua sioba paloloi, iageti puarinangan geti pajoggolat samba paasakat.

¹¹ Sirimanua sioba linat patuat samba simananam putitiboat, ibailiu le nia geti suruak rimata.

¹² Masipoiliat pabokoatda sirimanua sipatataju, Tuhan masijago bule puagaijat simaeru mariuriu tupasikeli.

¹³ Sitaimamala ioba mukuddu ka lalep, kuanangan, “Ai singa ka uja, ikokom aku ka tengan enungan.”

¹⁴ Titiboat sinanalep sipuolop tubu iate sesere, sirimanua siukum Tuhan, tuguru le sia kabagania.

¹⁵ Taiagai patuat ai kapatuatda tatoga, tapoi sasa momoi igelaiake sia rasili galai tubutda.

¹⁶ Kasei sioba makayo ka pasioorei simageba samba masikau panguruat ka simakayo, kalepakatnia makatainangan puririmanuania.

Sangamberi panganturatda sirimanua simasiku patuat

¹⁷ Arepake, kugelaiake katubum nganturatda sirimanua simasiku patuat! Lelekake nganturatku.

¹⁸ Masasanang te ekeu ke nukoiriake nganturatku ka bagat patuatnu. Kalulut kisedda te numatarek masigalaiake.

¹⁹ Kineneiget kugelaiakenia katubum, kalulut kuoba nukau putotonem bagam katubut Tuhan.

²⁰ Akuakean katubum telu pulu nganturat pagalaiat nganturat samba puaagai,

²¹ sigelaiake ekeu pagalaiat aponia bulat pubulanan, bule rarere ekeu ka gogoi sibabara, momoi nukau alegiat sibulatnia.

²² Bui nuraurau simageba, kalulut pugegebania, samba bui nupaoreiji sirimanua sitaioi tubu.

²³ Kalulut Tuhan le masineseatake pakaroatda, samba masimamateiake sirimanua sipaoreiji sia.

²⁴ Bui nupaalei sirimanua simagolu samba simaruei katai golu.

²⁵ Babara nutututake galai tubunia, samba taioinangan nugalakake katukelat nenda.

²⁶ Bui nugalai palelengan bule nubelaake utakda sabagei.

²⁷ Babara ke ta moi nululuinia, alarangan peremannu.

²⁸ Bui nuparitci song polak siteuakenenda taikebbukatnu.

²⁹ Anuitco leu sirimanua simaagai igalai galajetnia? Sirimanua nenda tukau le nia mugalai ka uma purimataatda tai rimata, ta ka lalepda sirimanua sitaiaddeakenen.