Pangt. 2 - BUKO SIPUNENAN

Puuktungan masibakkati sikut patuat

¹ Ale togakku, ke nusilo nganturatku koiriake tiboietku kabagat patuatnu,

² bailiu lelekakenangan talingam sikut patuat, samba mare'renangan patuatnu ka puagaiat,

³ oo, ke musoga ekeu ka puaagai kolou, ka puaagai nuipoake tiboietnu,

⁴ ke nugabania kele nugaba perak, samba nukukrunia kele masikukru pukaioat siugguk,

⁵ sesenungan katukolobat pagalaiat loto ka Taikamanua samba sesenungan puaagai pagalaiat Taikamanua.

⁶ Tuhan le masiake sikut patuat, sibara ka ngunguNia ioi puaagai kolou samba puagaiat.

⁷ Tarekakenangan paroman ka sirimanua simatopit, ibailiu korabbi ka sirimanua simeru paraboat,

⁸ aijajago enungan katuroipoat, samba masipasikeli enunganda sirimanua simatopit.

⁹ Againungan geti pagalaiat pubulanan, katuroipoat, putopinan samba leu enungan purimanuaiat.

¹⁰ Kalulut sikut patuat tuguru le geti ka patuatnu samba puaagai siangkaake ketsatnu;

¹¹ pusikuat patuat masijago ekeu, puaagai masipasikeli ekeu

¹² bule nubela ka enungan sikatai, ka sirimanua sitiboake patajuat sikatai,

¹³ ka sirimanua sikaddiuake enungan simaroipo samba sienungi enungan simagepgep simasut jo;

¹⁴ sipuangka baga sigalaiake sikatai, mugora baga kalulut patajuat sikatai,

¹⁵ enungannia simaigi pabilukat samba simakatai paraboat;

¹⁶ nubela ka sinanalep sikatai paraboat, ka sinanalep siooiake, simananam titiboat,

¹⁷ sikaddiuake simanteunia kateteret mabau peile nia samba sikalipogi pelelengan Taikamanuania;

¹⁸ bulatnia te, lalepnia mapepe imaloulou kabagat kamateiat, enungannia siailiake laggaira taikabaga.

¹⁹ Sirimanua siei katubunia, taanai katoiliat, samba ta raaili enungan purimanuaiat.

²⁰ Kalulut nenda enungi le enunganda sirimanua simatopit, samba pasikeli sangamberi enunganda sirimanua simatopit.

²¹ Kalulut sirimanua simatopit le masikukudduiji polak nenda, samba sirimanua simaeru paraboat le maririuriu mukuddu sedda,

²² tapoi sirimanua sikatai tusubuake le sia geti ka polak nenda, samba sipatataju tukekle le sia ka polak nenda.