Pangt. 19 - BUKO SIPUNENAN

¹ Maeru peile simageba simaeru paraboat, ka sirimanua sitaiagai patuat sioba paboko.

² Ngamang sita puagaijat, ta maeru, sirimanua simaola baga igalai le pusalaat.

³ Taiagai patuat iate sipepeake enungan sirimanua, iageti seleakenangan Tuhan.

⁴ Simakayo, ituppai le saaleinia, tapoi simageba geti ikaddiuake le nia suruaknia.

⁵ Simunengake boko ta bebelania ka ukuman, sirimanua sipakakra pabokoat ta bebelania.

⁶ Maigi sirimanua masiala patuatda sirimanua sioba parom senen sirimanua roba pasuruak ka sirimanua siabeu tiboi tubu.

⁷ Simageba rapulagaki le sia baga sasarainania, sarapei sasuruaknia, raareuake le tubutda ka tubunia. Kenanen ikukru samba isogai sia tapoi ta isesese sia.

⁸ Kasei sisese agai patuat simaeru, ipununtuki le baga tubunia, kasei maron ka puagaijat, silonangan leu puuktungan.

⁹ Simunengake boko ta bebelania ka ukuman, sirimanua sipakakra pabokoat masusubu le nia.

¹⁰ Ta mateu rapurimanua simaeru sitaiagai patuat, samba leu ta mateu pagugulet masiparenta sipuute.

¹¹ Sirimanua simasiku patuat momoi iomake golunia, samba raumun le nia sirimanua kalulut taipuletsei selet sirimanua katubunia.

¹² Golut rimata iate kele rou singa, tapoi erunia kele tinobut sisuaiji puo.

¹³ Toga simakela patuat iate pugejaat bagat ukkuinia, sikalalep simangamang manibo, kele oinan sitaipuari mubaibai.

¹⁴ Lalep samba pukaioat momoi tusilonia sibara ka ukkui, tapoi sikalalep simasiku patuat iate panguruat sibara katubut Tuhan.

¹⁵ Taimamala iate sibaraake peperep sipulelek, samba kalepakatnia sitaimamala nene oriknangan pulajeat.

¹⁶ Sirimanua simareddet ka parentat Taikamanua maarau le nia, tapoi kasei masiloloi tiboiet matei le nia.

¹⁷ Masiropake simageba makere le nia masikau baleakenen katubut Tuhan, samba Tuhan leu masisiliake geti.

¹⁸ Pasikeli simakolou togam ka bagat ai peile karonan, tapoi bui nukiddi kamateiatnia.

¹⁹ Sirimanua simakope ruei mugolu iorak le nia utak, kalulut ke nuropakenia, masituppai golunia le anugalai.

²⁰ Ke noba masigelai samba masiarepi nganturat, bailiunanngan leu ekeu geti sirimanua simasiku patuat.

²¹ Maigi isiat ka bagat patuat sirimanua, tapoi sarat siteuakenen Tuhan le muaaili.

²² Galai tubu obaket ka sara sirimanua iate riuriu topitnia, Maeru peile simageba, ka sara sirimanua sipaboboko.

²³ Loto ka Taikamanua iate sibaraake purimanuaiat, masegenangan bagam samba bela ekeu ka kamateiat.

²⁴ Ai sirimanua simakope taimamala, beringan masikau kan ka ngungunia leu mailania.

²⁵ Ke tuukumake sirimanua simabuak patuat, iapeite ramasiku patuat sitaanai siagai.

²⁶ Toga sipaorei samba sikekle ukkui samba inania, iate sipakatai samba sipakaila tubunia.

²⁷ Ale togakku, buian nuarepi nganturat, ke nupasabau leuet tiboiet sibaraake puagaijat.

²⁸ Masikau pasimunengan ta sibulatnia iate masipaloloi surukat, samba ngungunda sirimanua sikatai masimateiake sirimanua.

²⁹ Matarek le ukuman ka simaasa baga samba bobobo' kateiteira simakela patuat.