Pangt. 17 - BUKO SIPUNENAN

¹ Maeru peile sangakoman kan tapoi sialei pusanangan, ka komen simananam tapoi sialei pajoggolat.

² Pagugulet simaagai muute le nia geti katubut toga sigalai puailaat, samba silonangan geti pukaioat kupkupakenennia sambatda sasarainan toga nenda.

³ Mas samba perak tusibo le nia ka obengan, tapoi patuat sirimanua geti Tuhan le masisisibo.

⁴ Sirimanua sikatai masitutake nganturat sikatai, sipaboko ioba masiarepi tiboiet paloloiat.

⁵ Kasei masigeigei sirimanua simageba, Taikamanua sibaraakenia le aipaloloi. Kasei muangka baga kabagat gejat bagatda sirimanua, bulat isilo le ukuman.

⁶ Katuumunanda simabajak iate punuteteunia, katuumunanda tatoga iate taikebbukatda.

⁷ Sirimanua siabeu tiboi tubu ta mateu masitiboake sikatai, sirimanua sitaiagai patuat ta mateu itiboake simaeru.

⁸ Ai sipasikua bulagat sitaimaroipo momoi igalai kiseiet, ka bulagat sitaimaroipo sangamberinia ipuaili.

⁹ Kasei masilabbu pusalaat, iate masipatoila nuntut baga, tapoi kasei masibaraake pakaroat, iate masipasaraake sasuruak.

¹⁰ Sara bobobo ai katukolobatnia ka sirimanua simeru paraboat ka sangotu bobobo ka sirimanua sitaiagai patuat.

¹¹ Sirimanua sikatai sarat masibaraake pulamagat, tapoi moi le kamateiat sikatai katubunia.

¹² Maeru peile paaili ka sara inan beruang simapepepe toga, ka sirimanua sitaiagai patuat ka bagat taiagaina patuat.

¹³ Kasei masisiliake sikatai ka simaeru, ta bebela sikatai ka bagat lalepnia.

¹⁴ Masitadda pajoggolat iate kele masibuka enungan oinan, oto kau maruei iolei bagam kepei tutaddaake pajogglo.

¹⁵ Malaga bagaNia si Tuhan ke tuseneseatake sirimanua sikatai, samba tuseleake sirimanua sita sele.

¹⁶ Siboboi le itataake bulagatnia sitaiagai patuat igaba sikut patuat, kalulut taanai patuatnia simaeru.

¹⁷ Sara suruak mariuriu le topitnia ka aleinia, samba ibailiunia le nia saalei ka bagat pugejaat baga.

¹⁸ Sirimanua sigalai palelengan ibailiunia sipasilului utak saaleinia, iate sirimanua sitaiagai patuat.

¹⁹ Sirimanua sioba ka jo, ioba pajogglo. Sirimanua siputitiboat simabuak, isilo le sikatai.

²⁰ Sirimanua sipaboboko ta mauktuknia, sirimanua simaigi putitiboat isilo le geti gejat baga.

²¹ Kasei sibara toga simakela patuat isilo le gejat baga, samba sibailiu ukkui ka tatoga sitaiagai patuat ta babara puaangkakat baga.

²² Patuat simasanang iate laggek tubu simagege tapoi reureu baga iate siteteake patuat.

²³ Sirimanua sikatai masisilo bulagat sibara ka enungan sikatai, bule ta igalaiake katuroipoat.

²⁴ Ailiakenenda sirimanua siagai kolou iate masisese sikut patuat, tapoi ailiakenenda sirimanua sitaiagai patuat ta makolou.

²⁵ Toga sitaiagai patuat iate sigejaake bagat ukkui, samba sibaraake reureu bagat inania.

²⁶ Ta mateu tuorakake utak ka sirimanua sitaanai puseleat, samba ta mateu tupaoreiji sirimanua simaeru paraboat.

²⁷ Sirimanua simaagai ta maigi putitiboatnia, samba sirimanua simasiku patuat, maom bagania.

²⁸ Sara sirimanua sitaiagai patuat leu rakua maagai samba masiku patuatnia ke itangeu tubunia samba ta manibonia.