Pangt. 15 - BUKO SIPUNENAN

¹ Alegiat simamoile, masileppetake golu tapoi titiboat simakela iate sibaraake golu.

² Titiboatda sirimanua simasiku patuat iate sibaraake puaagai, tapoi titiboatda simakela patuat sibaraake taimaagai.

³ Matat Tuhan ai ka sangamberi kudduat, masiitco sirimanua sikatai samba sirimanua simatopit.

⁴ Titiboat simaeru iate situppau ron patuat, tapoi titiboat patajuat iate sibesiki patuat.

⁵ Sirimanua sitaiagai patuat ta isilo nganturat ukkuinia, tapoi simasiku patuat ipuletsei le paasekat.

⁶ Ka lalepda sirimanua simatopit maigi pukaioat, tapoi pukayoatda sirimanua sikatai tatata le.

⁷ Titiboatda simasiku patuat iate sikarapake puaagai, tapoi patuatda sitaigai patuat geti ta maroipo.

⁸ Isilo le si Tuhan panindogatda sirimanua simatopit, tapoi malaga le bagaNia panguruatda sirimanua sikatai.

⁹ Malaga bagaNia si Tuhan enungan purimanuaiatda sirimanua sikatai, tapoi ipununtuki le baga sirimanua sibesiake masigalai obaket bagaNia.

¹⁰ Sirimanua sigalaiake sikatai tupaoreiji le nia, sirimanua sitaioba tuaseake matei le nia.

¹¹ Laggaira tai kabaga samba kamateiat matoila le ka matat Tuhan, sarapei patuatda sirimanua.

¹² Sirimanua simaasa baga ta ioba tuaseake, samba maila le nia masitiddou nganturat ka sirimanua simasiku patuat.

¹³ Patuat simasanang sibaraake pumataat simaeru, tapoi reureu baga sitataake ron patuat.

¹⁴ Sirimanua simasiku patuat masigaba puagaijat, tapoi sitaiagai patuat mugeja baga le nia ka bagat taiagai patuat.

¹⁵ Gogoira sirimanua sipangongorik makatai sangamberinia, tapoi sirimanua simangka baga mariuriu le masanang.

¹⁶ Maeru peile goiso pukaioat, tapoi sialei loto katubut Tuhan, ka igit pukaioat tapoi sialei pukaranan baga.

¹⁷ Maeru peile mukom gulei tapoi sialei nuntut baga, ka komen akkula simananan tapoi sialei lagat baga.

¹⁸ Sirimanua simaruei mugolu sibaraake pajoggolat, tapoi sirimanua simaom baga masibaraake aban.

¹⁹ Sirimanua sitaimamala mariuriu ioraknia gejat baga, tapoi sirimanua simatopit taanai pasailaat.

²⁰ Toga simasiku patuat, siangkaake bagat ukkuinia, toga sitaiagai patuat ta isuru inania.

²¹ Taiagai patuat iate obaketda sirimanua sita patuat, tapoi sirimanua simasiku patuat maroipo puririmanuanda.

²² Ta muririuriu siisiaakenen, ke tatupaatu boiki simakolou, tapoi muriuriu le siisiakenen, ke maigi siake nganturat.

²³ Ipuangka baga sara sirimanua kalulut alegiat sikaunia, samba sarapei erunia itukua ka gogoi sipasesese.

²⁴ Enungan purimanuaiatda sirimanua simeru paraboat masiailiake ka purimanuaiat, bule iareuake tubunia ka laggaira tai kabaga.

²⁵ Lalepda sirimanua simabuak patuat, ibukatake le si Tuhan, tapoi polak bakkat sara silumang ipasikeli le' si Tuhan.

²⁶ Malaga'bagaNia si Tuhan siisiake sikatai, tapoi tiboiet simaeru iate siangkaake bagaNia.

²⁷ Kasei masigaba puuktungan ka enungan sitaimaeru, masipakatai purimanuaiat ka lalepnia le aigalai.

²⁸ Sirimanua simatopit ipasikeli le putitiboatnia, tapoi sirimanua sikatai ibelaake le tiboiet sikatai.

²⁹ Ke manindou sirimanua simatopit iarepi le si Tuhan, tapoi panindogatda sirimanua sikatai ta iarepi.

³⁰ Pumataat simaeru iate siangkaake baga, samba katuagaiat simeru iate sipakula tolat.

³¹ Sirimanua sipuletsei paasekat, mukuddu le nia katalagatda simasiku patutat.

³² Sirimanua sitaioba tungantruake, ta isuru tubunia, tapoi sirimanua sioba tungantruake, ibailiunia le nia simeru paraboat.

³³ Loto katubut Tuhan iate nganturat sibaraake sikut patuat, samba epet patutat sisabau puaabeu.