Pangt. 12 - BUKO SIPUNENAN

¹ Kasei masipununtuki baga nganturat, masipununtuki baga puagaiat; tapoi kasei simalaga baga ka paasekat, iate sita patuat.

² Ioba bagaNia si Tuhan ka sirimanua simatopit, tapoi sipatataju iukumake le.

³ Ta anai berisara sirmanua simariuriu maeru puririmanuiatnia ka pukakatai, tapoi ungat sirimanua simatopit ta ipagegeugeu.

⁴ Sikalalep simatopit iate pulaingean simanteunia, tapoi sibaraake aila iate kele besi' sibuteake tolat simanteunia.

⁵ Isiat sirimanua simatopit iate simaroipo, tapoi ailiakenenda sirimanua sikatai iate patajuat.

⁶ Titiboatda sirimanua sikatai iate pasimatei tapoi titiboatda sirimanua simatopit iate sibaraake katuaraugat.

⁷ Sirimanua sikatai tusappruake bailiu taan babara sia tapoi lalepda sirimanua simatopit mariuriu ipurio.

⁸ Raumun sirimanua kele siripokat pusisikut patuatnia, tapoi sirimanua sitaimaroipo patuat tupaloloi le.

⁹ Maeru peile ibailiu sirimanua sitaiaddeakenen, tapoi ai mugagalai, masikau tubu kele siabeu tiboi tubu, tapoi magulai komen.

¹⁰ Sirimanua simatopit aipasisikeli purimanuaiat tarimeunia, tapoi katet bagatda sirimanua sikatai masipaorei.

¹¹ Kasei masigalai polaknia, maektek geti ka komen, tapoi kasei masikukru bibilet sitapaluluat, iate sirimanua sitaiagai patuat.

¹² Sirimanua sikatai ioba masisilo puuktungan sibara ka sirimanua sikatai, tapoi ungatda sirimanua simatopit sibaraake puuktungan.

¹³ Sirimanua sikatai isere le nia puseleat titiboatnia, tapoi sirimanua simatopit bela nia ka pangoringan.

¹⁴ Senen sirimanua tuektekake ka simaeru kalulut buat sikuania, samba rasilo sili sirimanua sili ka sigalaiakenen kabeinia.

¹⁵ Enungan sirimanua sitaiagai patuat maroipo siripot sipinatunia, tapoi kasei masiarepi nganturat, masiku patuatnia.

¹⁶ Bulat taiagai patuat le sipakoinong besit patuatnia katetere nenda leu et, tapoi simasiku patuat, sitaipuletsei paloloiat.

¹⁷ Kasei masikua pubulanan, iate masipoiliat puroipoat, tapoi simunengake boko masipoiliat patajuat.

¹⁸ Ai sirimanua siputitiboat simalauru kele sipunuan lanjau, tapoi jalaira sirimanua simasiku patuat masibaraake kaalet.

¹⁹ Bibo sipasikua pubulanan mamariuriu teret buruburu, tapoi jalai simapatajuat sangapeipeikat mata le.

²⁰ Patajuat ai ka bagat patuatda sirimaua siisiake sikatai, tapoi singantomanake puerukat sibaraake angkat baga.

²¹ Sirimanua simatopit ta iorak sia gejat baga, tapoi sirimanua sikatai mariuriu iorak sia pangoringan.

²² Sirimanua simapatuat bibo iate kasitsitakenen Tuhan tapoi sirimanua simariuriu topit ioba bagaNia.

²³ Sirimanua simasiku patuat ilipputake le' puaagainia, tapoi sirimanua simakela patuat isogaake le taiagaina patuat.

²⁴ Kabei sirimanua simangamang masiukkaake puaabeu, tapoi taimamala iate sibailiuake sirimanua pagugulet.

²⁵ Pukaranan baga iate sitataake ron patuat, tapoi tiboiet simaeru iate siangkaake bagania.

²⁶ Sirimanua simatopit masisese kudduat pasijagoat tarimeunia, tapoi enungan sirimanua sikatai masipepe tubunia.

²⁷ Sirimanua sitaimamala ta isisilo kukuretnia, tapoi sirimanua simangamang isilo le geti pukaioat simakeppu saki.

²⁸ Ka enungan simaeru ai purimanuaiat, tapoi ka enungan sikatai iate sisege ka kamateiat.