Pangt. 11 - BUKO SIPUNENAN

¹ Pasikilo sitaimaroipo iate kasitsitakenen Tuhan, tapoi ioba bagania ka bukku pasikilo sipasesese.

² Ke moi buak patuat, moi leu et asat baga, tapoi sikuat patuat ai ka sirimanua simaepe patuat.

³ Sirimanua simatopit ipalulu le nia putopinan, tapoi sipatataju ipakatai le nia pabokoatnia.

⁴ Ka gogoi pasiukuman, taanai katukaunannia pukaioat, tapoi katubulanan masibelaake sirimanua ka kamateiat.

⁵ Enungan sirimanua simatopit igaktukake le' pubulanannia, tapoi sirimanua sikatai bele le nia ka pukakatainia.

⁶ Sirimanua simaroipo baga ibelaake le nia pubulanannia, tapoi sipatataju ilaba le nia alau bagania.

⁷ Ke matei sirimanua sikatai, matei leu et karonietnia, samba karonietda sirimanua sikatai ibailiu le siboboi.

⁸ Sirimanua simatopit tuarauake le nia ka pangoringan, lepa siliakenangannia sirimanua sikatai.

⁹ Kabagat ngungun sirimanua sikatai isubuake pasasambania, tapoi sirimanua simatopit tuaraua le nia kalulut puaagai.

¹⁰ Ke maeru purimanuaiatda sirimanua simatopit, mangkanangan bagat laggai, samba ke matei sirimanua sikatai, pugereirangan sirimanua simigi.

¹¹ Panukanan katubutda sirimanua simaroipo patuat iate masituppai erut laggai, tapoi ngungunda sirimanua sikatai masipakatainia.

¹² Kasei masipasiloloi saaleinia, iate sitaiagai arat, tapoi sirimanua simaagai, ta maigi putitiboatnia.

¹³ Kasei sioba patiboi, masipaagai pakeleat, tapoi kasei simaom baga, masilabbu pakaroat.

¹⁴ Ke taanai sipuute, makatainangan leu laggai, tapoi ke maigi sipangangantru, baranangan leu puaraugat.

¹⁵ Bulat mageja baga te sirimanua sipasilului utakda sabagei, kasei masipulagaki baga pasilulului, maarau le nia.

¹⁶ Sinanalep simaeru patuat isilo le puaabeu; beringan sara sipaorei isilo le pukaioat.

¹⁷ Sirmanua simaanggai baga igalai le simaeru katubunia, tapoi sirimanua sikatai ipaoreiji le tubunia.

¹⁸ Sirimanua sikatai masigalai uktuk siboboi, tapoi kasei masikarapake pubulanan, isilo le puukutungan simatom.

¹⁹ Kasei mariuriu kabagat pubulanan sibulatnia, masiailiake purimanuaiat, tapoi kasei masikukru sikatai, masiailiake kamateiat.

²⁰ Sirimanua sitaimaroipo patuat iate kasitsitakenen Tuhan, tapoi sirimanua simalina patuat ioba bagaNia enungannia.

²¹ Bulatnia te, sirimanua sikatai ta bebela ka ukuman, tapoi reddenan sirimanua simatopit tuarauake le geti.

²² Kele pasubangsubang mas ka mongan asak sakkoilo, kisedda te sinanalep simalainge tubu sikatai paraboat.

²³ Kiddiet bagatda sirimanua simatopit masibaraake angkat baga, tapoi ngenaenda sirimanua masibaraake ukuman.

²⁴ Ai sipasirurubei bibilet, tapoi ituppai le kayo, ai sipasingongoi, tapoi ituppai le gebania.

²⁵ Kasei maigi masikau panukanan, tukau le sipususukkra, kasei masikau lo, tukau geti lo nia.

²⁶ Kasei masikera gandum, ratelei le nia sirimanua, tapoi panukanan tugorosot le ka utera sipasisasakiake gandum.

²⁷ Kasei masikukru kaerukat, masibesiake raobania sirimanua, tapoi kasei masikukru pukakatai isaksak le geti nia pukakatai.

²⁸ Kasei masikatonemi pukayoatnia bele le geti nia, tapoi sirimanua simatopit mutu'tu le geti nia kele buluk sibau.

²⁹ Kasei masipakatai pulalalepnia, tata le geti sangamberinia, sirimanua sitaiagai patuat ibailiu le geti pagugulet sirimanua simasiku patuat.

³⁰ Puuktunganda sirimanua simatopit iate loina purimanuaiat, samba kasei simasiku patuat, masiala patuat sirimanua.

³¹ Ke rasilo sili sirimanua simatopit ka polak, sarapei sirimanua sikatai samba sijo.