Pangt. 10 - BUKO SIPUNENAN

Rurukat panganturat Salomo

¹ Panganturat Salomo. Toga simasiku patuat iate sibaraake pugorakat bagat ukkuinia, tapoi toga simakela patuat iate sibaraake sou bagat inania.

² Pukaioat sibara ka enungan patajuat taanai katukolobatnia, tapoi putopinan masiarauake sirimanua ka kamateiat.

³ Ta iobaake si Tuhan raorik laje sirimau simatopit, tapoi kiddiet bagatda sirimanua sikatai ikatsiliake.

⁴ Kabei simabeili masibaraake pugebakat, tapoi kabei simangamang masibaraake pukaioat.

⁵ Kasei masiruruake kateteret legeu, siagai patuat le nia, kasei merep kateteret pasimoneiat, masibaraake puailaat.

⁶ Panukanan ai ka utet sirimanua simatopit, tapoi ngungun sirimanua sikatai malipputnake patajuat.

⁷ Repdemen katubutda sirimanua simatopit iate sibaraake panukanan, tapoi oninda sirimanua sikatai ibailiu le mabutek.

⁸ Kasei simasiku patuat, masilelekake sangamberi tiboiet, tapoi sitaimakolou putitiboanan, bele le nia geti.

⁹ Kasei simalina paraboat, mariuriu puenunganannia, tapoi kasei simaigi katusoiman enungannia, tuaagai le geti.

¹⁰ Kasei masipeipeiake matania, masibaraake pangoringan, kasei ta makolou putitiboanan, bele le nia geti.

¹¹ Tiboietda sirimanua simatopit iate bakkat purimanuaiat, tapoi tiboietda sirimanua sikatai masilipputnake patajuat.

¹² Lagat baga masibaraake pagolukat, tapoi nuntut baga masitabbo senengamata puseleat.

¹³ Ka bibot sirimanua siagai kolou ai sikut patuat, tapoi bobobo matarek kateitei sirimanua sitaigai patuat.

¹⁴ Sirimanua simasiku patuat masikoiri puagaiat, tapoi ngungunda sirimanua sitaiagai patuat iate katusubuat sipatataiko.

¹⁵ Laggai simaron ka sirimanua simakaio iate pukaioatnia, tapoi sibailiu katusubuat ka sirimanua simalilimai iate pugebakat.

¹⁶ Upat pugagalai sirimanua simaroipo masiambit ka purimanuaiat, puuktungan sirimanua sikatai, masiambit ka jo.

¹⁷ Kasei masipuletsei nganturat, masiailiake enungan purimanuaiat, tapoi kasei masipasibbu paasekat, mapepenangan.

¹⁸ Kasei silipputake lagat baga, pabokoat le ka bibonia; kasei patelei iate sirimanua simakela patuat.

¹⁹ Kabagat igit paninibo bulat babara te pinasabau, tapoi kasei masikeraake bibonia iate simasiku patuat.

²⁰ Jalai sirimanua simatopit kele perak simaeru, tapoi patuat sirimanua sikatai goiso le katukaunannia.

²¹ Bibot sirimanua simaroipo masipalulu migi sirimanua, tapoi sirimanua sitaiagai patuat matei le nia ka taiagana arat.

²² Panukanan Tuhan le sibailiuake kaio, pangoringan ta itutuppai katubunia.

²³ Masigalaike sikatai iate obaketda sirimanua simakela patuat, kele tugalaiake sikut patuat ka sirimanua simaagai.

²⁴ Aponia kalotoakenenda sirimanua sikatai, iate ioraknia, tapoi kiddiet bagatda sirimanua simatopit tususutnake le geti.

²⁵ Ke moi rusa talabari, masuburangan sirimanua sikatai, tapoi sirimanua simatopit iate bongen simatom.

²⁶ Kele cuka ka son samba kujuk ka mata, kisedda te sirimanua sitaimamala ka sirimanua sikoiniakenia.

²⁷ Loto kai Tuhan masipananta puririmanua, tapoi sangamberi rurat sirimanua sikatai tupatete.

²⁸ Kiddiet bagat sirimanua simaroipo ibabailiu geti gorat baga, tapoi kiddiet bagat sirimanua sikatai ibailiu le nia siboboi.

²⁹ Enungan Tuhan iate pukunemanda sirimanua simaroipo patuat, tapoi katusubuat le ka sirimanua sigalaiake sikatai.

³⁰ Sirimanua simatopit ta ipaguguilaknia teret buruburu, tapoi sirimanua sikatai ta ikukudduiji laggai.

³¹ Ngungun sirimanua simaroipo baga masibelaake sikut patuat, tapoi jalai simaboko tujajaja le geti.

³² Bibot sirimanua simatopit iagai siangkaake baga, tapoi ngungun sirimanua sikatai sarat patajuat le iagai.