Pangt. 1 - BUKO SIPUNENAN

Ailiakenen nganturat nene

¹ Sangamberi nganturat Salomo togat David, Rimata Israel,

² bule ituagai sikut patuat samba puagai, ituagai kolou katukolobat tiboiet,

³ bule tusilo panganturat sibaraake puaagai, samba leu pubulanan, puroipoat samba putopinan.

⁴ Masikau puaagai ka sirimanua sitaimaagai, samba agai kolou samba leu sikut patuat katubutda sibau tubu.

⁵ Kabagat sangamberi panganturat nene tuppainangan puaagaira simasiku patuat, samba sibara simaagai masisese enungan.

⁶ Ituagai nganturat samba pasikat, tiboiet samba pasiggiratra simasiku patuat.

⁷ Loto ka Taikamanua, iate bakkat puaagai, tapoi sirimanua sitaiagai patuat masipaloloi sikut patuat samba nganturat.

Nganturat samba repdemen

⁸ Ale togakku, arepi nganturat ukkuinu samba bui nupasibbu nganturat inam,

⁹ kalulut nganturatda nenda situppai erut paraboatnu kele kirit simaeru ka ute samba inu ka lolokkatnu.

¹⁰ Ale togakku, ke rana'na ekeu sirimanua sikatai, bui nureddetnia.

¹¹ Ke rakua katubum, “Konan nutut kai, tapamatei, tataiko sirimanua sitaimasele ka sitapaluluat,

¹² kau ibailiu sita kele laggaira tai kabaga sikoilok sia sipuririrmanua, kele situgogorosot ka ratei masikoilok sia simuine;

¹³ Sesettangan bibiletda simakeppu saki, sutaketangan lalepta bibilet siraurau.

¹⁴ Konan nutut kai! Aile tarubei simakere sinangkouta!”

¹⁵ Ale togakku, bui nututake paraboatda, bui nubakkouake rerem ka enunganda.

¹⁶ Kalulut reretda sarat pabalau raailiake sikatai samba reretda muenung simaola bule rapamatei.

¹⁷ Beringan leu uma ta tuguguru kabagat jarik singangaakenen ka matania

¹⁸ tapoi sirimanua sikatai nenda rakau le jarik samba simateiake tubutda saratda – jarikda saratda.

¹⁹ Kisedda te kalepakat purimanuaiatda simaalau baga sibara kapuuktungan sitaimaroipo, sipasiala engan sirimanua ka enungan sikatai.

Nganturat sikut patuat

²⁰ Arepmake kam! Musoga le sikut patuat ka enungan, mugerei le nia ka simauja!

²¹ Musoga le nia ka uddut irip, ka sangamberi matatbaliu gugurukat laggai isegeake tiboietnia:

²² “Pigamoian le, ale kam sirimanua sitaimaagai, pigamoian le nuparimanuaake kam purimanuaiatmui kele kisene, pigamoian le iaili teterenia nupuari kam nupaloloi kam puaagai, samba kam ale, sirimanua simakela patuat nukeraake nganturat simaeru?

²³ Toiliake kam ka paasekatku! Bulatnia te, kuoba masikua bagat patuatku samba masipaagai katubum tiboietku.

²⁴ Kalulut nukeraake kateteret kupusoga, samba taanai sipuukunia kateteret akutotoiake kabeiku,

²⁵ beringan leu nganturatku ta anupuletsei kam samba paasekat ta anusilo kam,

²⁶ oto gagatikungan kam leu et numauju kam, paloloikungan geti kam, ke moi pulotokat sabeu ka kam,

²⁷ kateteret pukaranan baga sabeu kele rura talabari ioi ka kam, kateteret mauju kele kasoubaliok isaksak kam, kateteret pangoringan samba karat baga isaksak kam.

²⁸ Kateteret nenda pusogamuian geti katubukku, tapoi ta akualegi besiakemuian geti nugaba aku tapoi ta anusesese aku.

²⁹ Kalulut ka puaagai malaga bagam samba katubut Tuhan ta maloto ekeu,

³⁰ ta noba masisilo nganturatku, tapoi nukeraake le sangamberi paasekatku,

³¹ komnungan te geti buat sigalainu, maekteknungan kalulut siisiakenennu.

³² Sirimanua sitaimaagai tumateiake le nia geti kalulut oret bagania, sirimanua simakela patuat tusubuake le nia kalulut taimaukut bagania.

³³ Kasei siarepi aku, mukuddu le nia kabagat arau baga tupasikeli le nia ka pugejaat baga.”