Pamoil. 9 - BUKO SIPUNENAN

¹ Lepa piaunangan pipiaunia malaika sikalima, itcokungan sara panyanyat bele ka polak barania ka manua samba rakau ka tubunia panguksik guluggu kamateiat.

² Bukanangan matatbaliu guluggu kamateiat nenda, pangarainangan kujuk sibara ka guluggu kean le kujuk purusuat sabeu, magepgepnangan sulu samba manua kalulut kujuk guluggu.

³ Bela ibela sin ka kujuk ei ka polak, samba tukau gege ka tubuda kele geget telenganga ka polak.

⁴ Samba tukua ka sia bui rapakatai sese ka polak, ele siureman, ele paloinaloina, sarat sirimanua le si ta anai toggaiat Taikamanua ka bukkunia.

⁵ Ta tuobaake ramateiake sirimanua, sarat masipaorei le lima ngalaggo ujunia. Besit paoreat nenda kele laplap isot sirimanua telenganga.

⁶ Ka teteret nenda besiakerangan sirimanua matei, tapoi ta mamatei sia; samba raoba matei, tapoi tuaareu le kamateiat ka tubuda.

⁷ Tubut sin nenda makere kele kuro sitarekngakenen mei pasaggak. Ka utera ai apa pa kele kirit mas, samba matada kele matat sirimanua,

⁸ samba alaira kele alai sinanalep, samba sotda kele sot singa,

⁹ samba rurukatda makere kele leppei laba, samba kappora kele nau kureta sigirit kuro simigi, sipabalau mei ka pasaggangan.

¹⁰ Paipaira kele paipai telenganga samba ai sotnia, samba ka bagat paipaira ai gegeda masibesiki sirimanua lima ngalaggo ujunia.

¹¹ Rimata sipaneinei sia ia te malaika guluggu kamateiat; oninia ka ngangan Ibrani Abadon samba ka ngangan Grika Apolion (tibonannia “Sipasikakatai”).

¹² Apasatnan paoreat siboiki; ai pei le te rua paoreat siooi pasat nene.

¹³ Lepa piaunangan pipiaunia malaika sikaenem; arepkungan nganga sibara ka taiming kudduat pasibuluat mas sikuddu ka matat Taikamanua,

¹⁴ kuanangan ka matat malaika sikaenem siukkaake pipiau, “Belaake tai malaika siepat nenda siappara ka bebet oinan sabeu Efrat.”

¹⁵ Belaakenangan leu siepat malaika sinarekngakenen masimateiake sapartelu ka sangamberi sirimanua ka jam samba gogoi, laggo samba rura sinetereakenen.

¹⁶ Igida saladdu sipukukuro rua ngotu juta; akuarep igida.

¹⁷ Kise le akuitco ka bagat ketsatku pagalaiat kuro samba sikudduji nia: rapakei leppei laba, mabonan kele api samba masurou samba makiniu kele belerang. Utet kuro geti kele utet singa, samba ka ngungunda bela api, samba kujuk samba belerang.

¹⁸ Sibara ka telu paoreat, ia te api, kujuk samba belerang sibebela ka ngungun kuro matei sapartelu sirimanua.

¹⁹ Aipoi geget kuro ai ka bagat ngungunda samba ka bagat paipaira. Paipainia poi kele ulou; ai utenia samba utenia nenda te ikau masibesiki sirimanua.

²⁰ Tapoi sirimanua sipulelegei, sitaimamatei ka paoreat nene, ta leu et rababauake paatuatda ka sigalai kabeira. Ta raariake masipanindogi sanitu samba tularat mas, perak, tembaga, bukku samba loina sitaioi masiitco ele masiarep ele muenung,

²¹ samba ta rababauake paatuatda ka pamamatei, pugagaut, paeelet samba pananangkou.