Pamoil. 7 - BUKO SIPUNENAN

Si 144.000 tai Israel sitoggaiji

¹ Pasat nenda itcokungan epat malaika murio ka epat taiming polak, airapepetpetnake epatnia matat rusa, bui ipuboroi rusa ka polak, ele ka koat ele ka loina.

² Lepa itcokungan sara malaika bagei ottou sibara ka kabelaiat sulu, sipasiaambit toggaiat sibara ka Taikamanua sipuririmanua, pugereinangan sabeu nganga ka matada siepat malaika sipasisisilo gege sibara ka Taikamanua masipakatai polak samba koat,

³ kuarangan, “Ba pakakatai kam boiki polak ele koat ele paloinaloina, teret kukau kai toggaiat ka bukkura sapagugulet Taikamanuanta!”

⁴ Arepkungan ai 144.000 igida sitoggaiji sibara ka sangamberi muntogat bangsa Israel.

⁵ Sibara ka muntogat Juda pulu rua ribu sitoggaiji, ka muntogat Ruben pulu rua ribu, ka muntogat Gad pulu rua ribu,

⁶ ka muntogat Aser pulu rua ribu, ka muntogat Naptali pulu rua ribu, ka muntogat Manase pulu rua ribu,

⁷ ka muntogat Simeon pulu rua ribu, ka muntogat Lepi pulu rua ribu, ka muntogat Isasar pulu rua ribu,

⁸ ka muntogat Sebulon pulu rua ribu, ka muntogat Josep pulu rua ribu, ka muntogat Benyamin pulu rua ribu.

Sirimanua simigi sitaioi tuadde

⁹ Pasat akuitco nenda, itcokungan sangarurukat sirimanua simigi sitaioi iadde nia kasei pa. Sia nene ia te sibara ka senen bangsa samba muntogat samba uma samba nganga, murio ka matat uddenan purimataat samba ka matat Togat Biribiri, sipuleleppei leppei simabulau samba ai katsaila ka kabeira.

¹⁰ Pugereirangan sabeu nganga masikua, “Ka Taikamanuanta sikuddu ka uddenan purimataat le puaragat samba ka Togat Biribiri!”

¹¹ Puriorangan samalaika masigoilik uddenan purimataat samba masigoilik tai baja samba siepat sipuririmanua; purapporangan ka matat uddenan purimataat masipanindogi Taikamanua,

¹² kuarangan, “Amen! Katuumun, pulatsanan, sikut paatuat, pusurakat, pubeunanan, gege, ron ka Taikamanuanta teret buruburu! Amen.”

¹³ Sara ka talagada tai baja masikua ka mataku, “Kasei sia sipuleleppei leppei simabulau nene, samba kaipa arabara?”

¹⁴ Kuakungan ka matania, “Tuanku, ekeu le siagai nia.” Kuanangan ka mataku, “Sia nene, ia te sibebela ka pugejaat baga sabeu; samba arabuian leppeira samba arabulauakean ka logau Togat Biribiri.

¹⁵ Ia te rapuririo ka matat uddenan purimataat Taikamanua masipuuku nia sinago sinoibo ka Umania Sipunenan. Samba nia sikuddu ka uddenan purimataat masisapogi sia.

¹⁶ Taan malalaje samba taan maooggou sia; sulu ele apa pa simaoloi taan irara sia.

¹⁷ Ai le poi ijajago sia Togat Biribiri sikuddu ka talagat uddenan purimataat samba ipaulu sia ka bubuakat oinan purimanuaiat. Samba sangamberi elu ka matada ipoposa Taikamanua.”