Pamoil. 5 - BUKO SIPUNENAN

Buko samba Togat Biribiri

¹ Ia geti itcokungan ka kabei sikattoet sikuddu ka uddenan purimataat nenda, sara buko sibara surat ka baga samba ka uddutnia samba sitoggaiji pitu toggaiat.

² Lepa itcokungan sara malaika simagege sipusosoga sabeu nganga masikua, “Kasei simateu masibuka buko nene samba masigolok toggaiatnia?”

³ Tapoi ta anai beri sara ka sorga ele ka polak ele ka tei polak, siooi masibuka buko nenda ele siooi masiitco ka bagania.

⁴ Pusoukungan leu et simakope kalulut ta anai beri sara simateu masibuka buko nenda ele masiitco ka bagania.

⁵ Lepa kuanangan ka mataku sara ka talagada tai baja, “Ba pusosou! Itco, singa ka muntogat Juda, ia te punuteteu David, amamanangan nia, nia te momoi masibuka buko nenda samba sipitu toggaiatnia.”

⁶ Lepa itcokungan ka talagat uddenan purimataat samba siepat sipuririmanua samba ka talagada tai baja, murio sara Togat Biribiri kele silepa jaja; ai pitu bannia, pitu matania: ia te sipitu Ketsat Taikamanua sikoiniakenen ka sangalio polak.

⁷ Oi nia, alanangan nenda buko ka kabei sipukukuddu ka uddenan purimataat.

⁸ Kele aiala buko nenda purapporangan siepat sipuririmanua samba sirua pulu epat tai baja ka matat Togat Biribiri. Senenda tai baja, ai ka kabeira kecapi samba pulokat mas, sibara kumanyang ka bagania: ia te panindogatda sirimanua sipunenan.

⁹ Uraiakerangan urai sibau: “Mateuan ekeu masisilo buko nenda samba masigolok toggaiatnia; atujajaan poi ekeu, samba anukauan logaunu masitebui sia sibara ka senen muntogat samba nganga samba uma samba bangsa bailiu bakkat Taikamanua.

¹⁰ Samba anubailiuakean sia sara purimataat imam masipuuku Taikamanuanta, samba bailiu sia masipaneinei polak nene.”

¹¹ Lepa itcokungan samba arepkungan nganganda samalaika simigi sigoilik uddenan purimataat, sipuririmanua samba tai baja; sipuriribu samba sipujujuta igida,

¹² kuarangan sabeu nganga, “Mateuan Togat Biribiri simateiakenen masisilo gege, kayo, agai, ron, beunan, latsat samba katuumun!”

¹³ Lepa arepkungan sangamberi sipuririmanua ka sorga, ka polak, ka tei polak, ka koat samba sangamberi sibabara ka bagania masikua, “Ka tubut sikuddu ka uddenan purimataat samba ka Togat Biribiri le katuumun, beunan, latsat samba gege teret buruburu!”

¹⁴ Kuarangan siepat sipuririmanua, “Amen!” Samba sia tai baja rappo rapanindou.