Pamoil. 3 - BUKO SIPUNENAN

Ka paamian Sardis

¹ “Samba ka malaikat paamian ka Sardis suratnake: Nene le aikua sibakkati pitu Ketsat Taikamanua samba sipitu panyanyat nene: Kuagai sangamberi galajetnu, tukua ai ekeu muririmanua, oto amateian ekeu!

² Suruake ekeu, paron sipulelegei, simalegere matei; aipoi ta anai beri sara akusese sigalainu simaeru ka matat Taikamanuangku.

³ Oto repdep, kipa sinilonu samba siarepnu, ia te nurereddet samba bauake paatuatnu! Aipoi ke ta mumata ekeu, oikungan kele sipananangkou, ta te nuaagai jam piga kuoi ka tubum.

⁴ Tapoi ka Sardis ai leu piga pa sia sitaipalolit leppeira; sia te kupaeenungake muleppei simabulau, kalulut amateuan poi sia.

⁵ Simamanang, nia te tuleleppeiji leppei simabulau kele nenda; samba ta kupoposa oninia ka buko purimanuaiat, tapoi kumumunengake le oninia ka matat Ukkuiku samba ka matada samalaikania.

⁶ Kasei sibara talinga, kau iarepi sikuat Ketsat ka matada sapaamian!”

Ka paamian Piladelpia

⁷ “Samba ka malaikat paamian ka Piladelpia suratnake: Nene le aikua sipuoni Sipunenan samba Pubulanan, siukkaake panguksik David; ke ibuka, ta anai siooi masiluplupmake; ke iluplupmake, ta anai siooi masibuka nia.

⁸ Kuagai sangamberi galajetnu; itco pei, akubukaakean kekeu matatbaliu, sitaioi raluplupmake kasei pa. Kenanen goiso le ronnu, tapoi anureddetnan tiboietku samba ta anupakele oningku.

⁹ Arep! Ai piga pa sia sibara ka paamian Setan, sioniake tubuna Jahudi, oto taa, boko le, bulat kukokoiniake sia raoi murappo ka matam, samba raagai nuntut bagaku ka tubum.

¹⁰ Kalulut anureddet tiboietku nupuom baga, aku leu kupasisikeli leu ekeu ka gogoi pasisiboat sipuaaili geti ka sangalio polak nene masisibo sia sikuddu ka polak.

¹¹ Maruei le kuoi! Ukkaake le bakkatnu, bui bara kasei pa siala kiritnu.

¹² Simamanang, kubabailiuake nia arigi ka Uman Sipunenan Taikamanuangku, taan bebela nia sedda; suratnakekungan ka tubunia onin Taikamanuangku, samba onin kotat Taikamanuangku, ia te Jerusalem sibau, situgogorosot sibara ka sorga, sibara ka Taikamanuangku, samba oningku sibau leu kususuratnake ka tubunia.

¹³ Kasei sibara talinga, kau iarepi sikuat Ketsat ka matada sapaamian!”

Ka paamian Laodikea

¹⁴ “Samba ka malaikat paamian ka Laodikea suratnake: Nene le aikua si Amen, Sipasimuneng simatopit samba sibulatnia, pasitaddaat sangamberi sibaraakenen Taikamanua.

¹⁵ Kuagai sangamberi galajetnu; ta maleppet ekeu, ta maoloi. Maeru pei le leppet le ekeu, ele oloi!

¹⁶ Oto kalulut kele oloi sulet le ekeu, ta maleppet, ta maoloi, kugegelekngake le ekeu.

¹⁷ Anukua, ‘Makayo le aku, amusukkarangan bibiletku, taan anai simagulai kaku.’ Tapoi ta nuagai sikatai uktuk le ekeu, simasisibbu, simageba, simapeset samba simabulutut.

¹⁸ Oto kunganturu ekeu bule nusaki ka tubuku mas silinaakenen ka api, bule numakayo, samba leppei simabulau, pakeietnu, bui imatoila pububulututnu katuailaatnu; samba leu et tula, masitulaji matam, bule imaitco matam.

¹⁹ Kasei kupununtuki baga, ia te kuaase samba kunganganturu; oto besiake samba bauake paatuatnu!

²⁰ Aian tebai aku muririo ka matatbaliu samba masiluuluu; kasei pa siarep ngangangku samba sibukaake matatbaliu, tugurukungan mei ka tubunia, pukomkungan pasamba nia, samba nia pasamba aku.

²¹ Simamanang, kukakau nia mukuddu ka bebeku ka uddenan purimataatku, keleu aku simamanang samba mukuddu ka bebet Ukkuiku ka uddenan purimataatnia.

²² Kasei sibara talinga, kau iarepi sikuat Ketsat ka matada sapaamian!”