Pamoil. 21 - BUKO SIPUNENAN

Manua sibau samba polak sibau

¹ Lepa itcokungan manua sibau samba polak sibau, aipoi manua siboiki samba polak siboiki atataan, samba koat leu taan anai.

² Samba kuitco kota sipunenan, Jerusalem sibau, tugorosot sibara ka sorga sibara ka Taikamanua, alepaan tarek kele siokko talimouakenen silepa palainge masiailiake simanteunia.

³ Lepa arepkungan nganga sabeu sibara ka uddenan purimataat sipasikukua, “Itco, sapou Taikamanua aian ka talagat sirimanua; sambarangan le sirimanua mukukuddu, bailiunangan sia bangsania, samba nia bailiu Taikamanuanda.

⁴ Posanangan sangamberi elu ka matada, samba kamateiat taan anai, ele reureu baga, ele geri, ele gejat baga taan anai, aipoi sangamberi siboiki atusabauan.”

⁵ Ia geti kuanangan sikuddu ka uddenan purimataat, “Itco pei, sangamberinia le kubauake!” Samba ikua, “Suratnake, aipoi katoneman samba sibulatnia le tiboiet nene.”

⁶ Kuanangan minca ka mataku, “Amuailingan. Aku te Alfa samba Omega, Sipuboboiki samba Sikateitei. Ka simaoggou kukakau lonia oinan taisasakiet sibara ka bubuakat sipuririmanua.

⁷ Simamanang, nia te masiikep sangamberinia nene, bailiu aku Taikamanuania samba nia bailiu togaku.

⁸ Ka sia simaloto geti, sitaimatonem baga, simalolit, sipamamatei, sipaeelet, sipukekerei, sipanindogi buluat, samba sangamberi sipaboboko, rubeiatda ia te ka koat api samba belerang sipujujuluu; nene te kamateiat sikarua.”

Jerusalem sibau

⁹ Lepa oi sara ka sipitu malaika siukkaake sipitu pulokat, sisun sipitu paoreat sikateitei manibo ka mataku, kuanangan, “Konan kupatoila ka matam sinanalep talimouakenen kalaleman Togat Biribiri.”

¹⁰ Lepa sopsopnangan aku Ketsat, ambitnangan aku malaika ka sara leleu sabeu simabuak, sausaunangan ka mataku Jerusalem, kota sipunenan situgogorosot sibara ka sorga, sibara ka Taikamanua.

¹¹ Kota nenda sun pulatsanan Taikamanua ka tubunia. Toronia kele torot permata simakeppu saki, kele permata baiduri pandan, kirisau kele kristal.

¹² Tembok gelinia abeu samba mabuak, samba ai pulu rua matatbaliunia; ka matatbaliu ai pulu rua malaika samba ka uddut matatbaliu tusurat onin sipulu rua muntogat Israel.

¹³ Ka isit kabelaiat sulu telu matatbaliu, ka isit bare telu matatbaliu, ka isit kaiaman telu matatbaliu samba ka isit kabelekat sulu telu matatbaliu.

¹⁴ Gelit kota ai pulu rua bongennia, samba ka uddutnia tutaka ominda sipulu rua apostel Togat Biribiri.

¹⁵ Malaika sipaninibo ka mataku nenda, aiuukkaake tutura kirekat mas pasikireki kota, matatbaliunia samba gelinia.

¹⁶ Tubut kota nenda siepat taiming, nantania makere ka lionia. Kirekinangan nia tutura kirekat ai: 2400 kilometer; nantania samba lionia samba buaknia makere.

¹⁷ Lepa kirekinangan gelinia ai: sangotu epat pulu epat ngaeto siripot kirekat sirimanua, kirekat malaika leu et.

¹⁸ Gelit kota nenda bukku baiduri pandan le; tubut kota geti mas simalina, kele kaca simagirau.

¹⁹ Sangamberi bongen gelit kota tukau sene ngamata permata pulaingeatnia. Bongen siboiki baiduri pandan, bongen sikarua bukku nilam, bongen sikatelu bukku yakut, bongen sikaepat bukku zamrud,

²⁰ bongen sikalima bukku baiduri sepah, bongen sikaenem bukku delima, bongen sikapitu bukku ratna cempaka, bongen sikabalu bukku pirus, sikasiba bukku topas, sikapulu bukku krisopras, sikapulu sara bukku lazuardi, sikapulu rua bukku kecubung.

²¹ Pulu ruania matatbaliu ia te pulu rua mutiara; senen matatbaliu sara mutiara. Enungan kota geti mas simalina, kele kaca simagirau.

²² Uman Taikamanua geti ta anai akuitco ka bagania; aipoi Uman Taikamanua, ia te tubut Tuhan Taikamanua Sipulugege le, samba Togat Biribiri.

²³ Kota nenda ta leu ibebesiake sulu samba laggo masitoroiji nia; aipoi pulatsanan Taikamanua le masitotoroiji nia samba Togat Biribiri ia te alitonia.

²⁴ Sangamberi bangsa muenung ka toronia samba tai rimata ka polak masiambit pulatsananda ka bagania.

²⁵ Matatbaliunia ta tupapatpatnake sanganantat gogoi, aipoi soibo taan babara sedda;

²⁶ samba pukayoat samba pubeunananda tai bangsa raambit ka kota nenda.

²⁷ Tapoi apa pa simalolit, ele sirimanua sigalaiake kasitsitnakenen ele boko, taan tuguguru ka bagania, sarat sia le sitususurat oni ka bagat buko purimanuaiat Togat Biribiri.