Pamoil. 2 - BUKO SIPUNENAN

Ka paamian Epesus

¹ “Suratnake ka malaikat paamian ka Epesus: Nene le aikua sipasiuukka sipitu panyanyat ka kabeinia sikattoet samba sipueenung ka talagat sipitu pualitoat mas.

² Kuagai sangamberi galajetnu samba saggot tubum samba om bagam. Kuagai taipususumnu ka sirimanua sikatai, tapoi anusibongan sia sikua tubuna apostel, tapoi ta apostel, againungan tebai sipatataju le sia.

³ Maom le bagam samba masiorik ekeu kalulut oningku; samba ta anupuletsei saggo.

⁴ Tapoi kenanen kisedda ai taioobaket bagaku kekeu, ia te kakaddiuakenu nuntut bagam siboiki.

⁵ Oto repdep kipa kerunia kabebelenu. Bauake paatuatnu samba galaiake minca sigalaiakenennu siboiki. Ke ta, oikungan leu kekeu, buraukungan pualitoatnu ka kudduatnia, ke ta nubauake paatuatnu.

⁶ Tapoi ai leu simaeru kekeu, ia te malaga bagam ka sigalaiakenenda sipasitutut si Nikolaus, lagakiet bagaku leu.

⁷ Kasei sibara talinga, kau iarepi sikuat Ketsat ka matada sapaamian! Ka simamanang, kukakau ikom buat loina purimanuaiat sikuddu ka Paradaisot Taikamanua.”

Ka paamian Smirna

⁸ “Samba ka malaikat paamian ka Smirna suratnake: Nene le aikua Sipuboboiki samba Sikateitei, simamatei samba sipuririmanua minca:

⁹ Kuagai gejat bagam samba pugebakatnu – siripokatnia makayo le ekeu – samba paloloiatda sioniake tubuna Jahudi, tapoi ta Jahudi; paamian Sanitu le sia.

¹⁰ Ba kakalotoake gejat baga siooi geti ka tubum. Ibubulukngake te piga pa ka talagamui Sanitu ka bagat penjara bule isibo kam, magejanangan bagamui pulu ngagogoi burunia. Kau numatopit teret matei ai leu kuake kekeu kirit purimanuaiat.

¹¹ Kasei sibara talinga, kau iarepi sikuat Ketsat ka matada sapaamian! Simamanang, taan ioorik apa pa ka kamateiat sikaruania.”

Ka paamian Pergamus

¹² “Samba ka malaikat paamian ka Pergamus suratnake: Nene le aikua sipasiuukka palittei simalauru:

¹³ Kuagai kaipa nukukuddu, ia te ka kudduat purimataat Sanitu; samba maron nuukkaake oningku, samba ta nupakele tonem bagam ka tubuku, beringan ka teteret Antipas, sipasimumuneng aku simatopit simateiakenenda ka matamui, ka pukudduanan Sanitu.

¹⁴ Tapoi ai goiso sitaipasesese ka bagaku galai tubum: ai ka talagamui situtnake nganturat Bileam, sigelaiake si Balak masipepeake tai Israel, bule rakom sibuluakenen ka buluat samba masigalaiake puumunan.

¹⁵ Kisedda leu et ai ka talagamui siukkaake nganturatda situtnake si Nikolaus.

¹⁶ Oto bauake paatuatnu! Ke ta, oikungan leu kekeu simaola masisaggangi sia pasamba palittei ka ngungungku nene.

¹⁷ Kasei sibara talinga, kau iarepi sikuat Ketsat ka matada sapaamian! Ka simamanang kukakau ka sia manna silipputnakenen; samba kupangunguruatnake ka tubunia bukku simabulau, ka bukku nenda tusurat oni sibau, sitaiaagaietda kasei pa, sarat sisilo nia le iagai nia.”

Ka paamian Tiatira

¹⁸ “Samba ka malaikat paamian ka Tiatira suratnake: Nene le aikua Togat Taikamanua sipumamata kele juluu api, samba rerenia kele tembaga simasorobek:

¹⁹ Kuagai sangamberi galajetnu samba nuntut bagam samba tonem bagam samba pasikelatnu samba om bagam. Kuagai sigalainu sikateitei saliu pei le sigalainu siboiki.

²⁰ Tapoi ai sitaipasesese ka bagaku galai tubum kalulut nuobaake sinanalep si Isebel, sipunabi tubuna, masigelaiake samba masipepeake sapaguguletku muumun samba mukom sibuluakenen ka buluat.

²¹ Akukauan oggak ka sia ibauake paatuatnia, tapoi ta ioba masibauake paatuatnia ka puumunannia.

²² Kuriribbaiakean le te nia ka pereman pubesikat, samba sia aleinia paelet kuribbaiake sia ka pugejaat baga sabeu, ke ta rabauake paatuatda ka galai tubut sinanalep nenda.

²³ Samba sipasitututnia kumateiake, bule raagai nia sangamberi paamian, aku le siagai masisinogi atei samba paatuat sirimanua; samba kusiliake ka kam siripot sigalaimui senemui.

²⁴ Tapoi ka kam sabagei ka Tiatira, sitaitutnake nganturat nenda samba sitaigelai kuanenda pagalaiat Setan, kukua ka kam: Ta kuaake apa pa bairanen bagei ka kam.

²⁵ Tapoi apa sibabara ka kam, ukkaake kam simaron teret oi aku.

²⁶ Ka sia simamanang samba sigalaiake galajetku teret kalepakatnia, kukakau ka sia gege masipaneinei sipuarat sabulungan;

²⁷ samba iparentaake sia sibara tutura laba; gatcaakenangan sia kele pario polak – kele gege siniloku sibara ka Ukkuiku –

²⁸ samba kukakau ka sia panyanyat simancep.

²⁹ Kasei sibara talinga, kau iarepi sikuat Ketsat ka matada sapaamian!”