Pamoil. 19 - BUKO SIPUNENAN

¹ Pasat nenda arepkungan nganga sabeu kele nganganda sirimanua simigi ka sorga, sipasikukua, “Haleluya! Ka Taikamanuanta le puaragat samba pulatsanan samba gege,

² sineseat samba maroipo poi pasiuukumnia; aipoi aiukuman sipaeelet sabeu, sipakatai polak nene kalulut paelenannia; samba ailumunakean logaura sapaguguletnia ka tubut sipaeelet nenda.”

³ Kuarangan minca sikaruania, “Haleluya! Samba kujuknia mangarai teret buruburu.”

⁴ Purapporangan sirua pulu epat tai baja samba siepat sipuririmanua masipanindogi Taikamanua sikuddu ka uddenan purimataat, kuarangan, “Amen! Haleluya!”

Punen putalimogat Togat Biribiri

⁵ Ia geti maarepnangan nganga sibara ka uddenan purimataat masikua, “Umun kam Taikamanuanta, kam sapaguguletnia, kam sikalotoake nia, sigoiso samba sabeu!”

⁶ Lepa arepkungan kele ngangan sirimanua simakope igi, kele jaat eba samba kele gululuu leleggu sabeu sipasikukua, “Haleluya! Aipoi amurimatangan Tuhan, Taikamanuanta, Sipulugege.

⁷ Kau imaangka samba imagora bagata, samba talatsatnake kam nia, aiailingan poi teterenia putalimogat Togat Biribiri, samba sinanalepnia amatarekngan.

⁸ Samba atukauan ka tubunia juto simaalit baga simakirisau samba simabulau simalina pakeietnia!” [Juto simaalit baga ia te puroipoat sigalaira sia sipunenan].

⁹ Lepa kuanangan malaika ka mataku, “Suratnake: Mauktuk te sia sinogai ka punen putalimogat Togat Biribiri.” Kuanangan minca ka mataku, “Sibulatnia te tiboiet nene sibara ka Taikamanua.”

¹⁰ Purappokungan ka matat malaika masipanindogi nia; tapoi kuanangan ka mataku, “Ba gagalai kise! Aku leu pagugulet le kele ekeu samba sasarainam, sipasisisilo pasimunengan Jesus. Taikamanua le panindogi! Aipoi pasimunengan Jesus ia te ketsat pamoiliananda tai nabi.”

Sipasiuuddeni kuro simabulau

¹¹ Lepa itcokungan tubuka sorga, makoinongnangan sara kuro simabulau; samba sikuddu ka uddutnia muoni: “Simatopit samba Sineseat”, samba maroipo ipasiukum samba ipasaggak.

¹² Matania kele juluu api samba ka utenia ai maigi kirit purimataat samba ka tubunia ai tusurat sara oni taiaagaietda kasei pa, sarat nia le siagai nia.

¹³ Leppeinia sinosoki logau, oninia ia te: “Tiboiet Taikamanua”.

¹⁴ Sangamberi mungkuat saladdu ka sorga masitut nia mukuro simabulau, samba muleppei juto simabulau simalina.

¹⁵ Samba ka ngungunia bela sara lanjau simalauru, pakeietnia masitete tai bangsa. Paneineinangan sia mututura laba; samba ipetsut anggur ka bagat pasipetsunan anggur golut Taikamanua, Sipulugege.

¹⁶ Ka leppei samba ka bakkapatnia ai tusurat oni: “Rimatada tai rimata samba Tuanda tai tuan.”

¹⁷ Lepa itcokungan sara malaika sipuririo ka sulu. Pugereinangan sabeu nganga masikua ka sangamberi uma sitububurut ka manua, “Konan kam se paruru ka punen sabeu Taikamanua,

¹⁸ bule nukom kam akkulara tai rimata, akkulara tai panglima, akkulara simagege, akkulat kuro samba akkulara sangamberi sikudduji kuro samba akkulara sangamberi sirimanua, sipuuja ele sapagugulet, sigoiso ele sabeu.”

¹⁹ Lepa itcokungan tarimeu samba tai rimata ka polak sambada tai saladduda, aparuruan sia raei masisaggangi nenda Sikudduji kuro samba saladdunia.

²⁰ Ia geti labarangan tarimeu samba nabi sipatataju, sibaraake kiseiet ka matat tarimeu, samba kiseiet nenda ikau masipepeake sirimanua sisilo toggaiat tarimeu samba sipanindogi tularatnia. Ribbaiakerangan sia ruada aimuririmanua ka koat api sipujujuluu pagalu belerang.

²¹ Sabagei geti matei sia ka lanjau sibebela ka ngungun Sikudduji kuro; ektek le sangamberi uma masikom akkulara.