Pamoil. 16 - BUKO SIPUNENAN

Pulokat golut Taikamanua

¹ Lepa arepkungan nganga sabeu sibara ka Uman Taikamanua masikua ka sipitu malaika, “Kenan kam, piliake kam pulokat golut Taikamanua ka polak!”

² Einangan leu et malaika siboiki, piliakenangan pulokatnia ka polak; bara ibara appu sikatai samba simalaplap ka sangamberi sirimanua sibara toggaiat tarimeu samba sipurarappo ka tularatnia.

³ Lepa piliakenangan pulokatnia malaika sikarua ka koat; bailiunangan logau koat, kele logau simamatei, mateinangan leu sangamberi sipuririmanua ka bagat koat.

⁴ Lepa piliakenangan pulokatnia malaika sikatelu ka sangamberi bagat oinan samba matat bubuakat, bailiu logau sangamberinia.

⁵ Lepa arepkungan ipanibo malaika sikupkup oinan, “Maroipo le ekeu, Taikamanua sipuririmanua samba siturerere puririmanua, sipunenan le ekeu, kalulut kise pasiuukumnu.

⁶ Kalulut pipiliakera logau sirimanua sipunenan samba tai nabi, anukauan leu sia mulo logau; mateuan kele nene ka sia!”

⁷ Lepa arepkungan nganga sibara ka kudduat pasibuluat masikua, “Oo Tuhan, Taikamanua Sipulugege, sibulatnia samba maroipo pasiuukumnu.”

⁸ Lepa piliakenangan pulokatnia malaika sikaepat ka sulu, samba tukau gege ka sulu ipalaboki sirimanua api.

⁹ Malaborangan sirimanua kalulut kopet oloi api, bailiu raasa onin Taikamanua simagege masibaraake paoreat nenda samba ta rababauake paatuatda masilatsatnake onin Taikamanua.

¹⁰ Lepa piliakenangan pulokatnia malaika sikalima ka uddut uddenan purimataat tarimeu, magepgepnangan purimataatnia, sotrangan leu lilada, kalulut besira,

¹¹ samba raasa Taikamanua ka sorga kalulut besira samba kalulut appuda; tapoi ta rababauake paatuatda ka sigalaira.

¹² Lepa piliakenangan pulokatnia malaika sikaenem ka oinan sabeu, oinan Efrat, magaraknangan oinan, bule imatarek enunganda tai rimata siooi sibara ka kabelaiat sulu.

¹³ Lepa itcokungan telu ketsat sikatai kele kuret bela ka ngungun naga, samba ka ngungun tarimeu samba ka ngungun nabi sipatataju.

¹⁴ Ia te saketsat sanitu sibaraake kiseiet, sieei masitagetnake tai rimata ka sangalio polak, masiruruake sia pasaggak ka gogoi sabeu, ia te gogoi Taikamanua Sipulugege.

¹⁵ “Arep! Momoian le te aku kele sipananangkou. Mauktuk te sia sipumamata samba sipasikeli leppeinia, bui ipuenung simabulutut samba bui raitco sirimanua kailaakenennia.”

¹⁶ Lepa ruruakerangan tai rimata saketsat sikatai ka kudduat kuanenda ka ngangan Ibrani Harmagedon.

¹⁷ Lepa piliakenangan pulokatnia malaika sikapitu ka rusa. Maarepnangan nganga sabeu sibara ka Uman Taikamanua masikua, “Alepaan.”

¹⁸ Pukirisaunangan leu bila samba pugululuunangan leleggu, bara ibara ngeungeu polak sabeu; burut aibara sirimanua ka polak, tapei abara ngeungeu polak sabeu kele nene.

¹⁹ Maragatnangan leu kota sabeu bailiu telu ngarubeiat; mabukkatnangan sangamberi kotara sipuarat sabulungan. Repdepnangan leu Babel sabeu Taikamanua masikau ka tubunia pulokat sisusun anggur golut bagania.

²⁰ Samba sangamberi nusa tata, samba sangamberi leleu taan tusese.

²¹ Bele ibele urat es sabeu sibara ka manua, lima pulu kilogram sanenia isaksak sirimanua; asarangan Taikamanua sirimanua kalulut paoreat urat es nenda, bulat abeu poi paoreat nenda.