Pamoil. 13 - BUKO SIPUNENAN

Rua tarimeu

¹ Lepa itcokungan sara tarimeu muottou ka koat, sipulu ban samba pitu ute; ka ngungun bannia ai pulu kirit purimataat samba ka utenia tusurat oni paasakat.

² Tarimeu siitcoku nenda makere kele tubut arimau, rerenia kele reret baruang samba ngungunia kele ngungun singa. Naga masikau ronnia samba uddenan purimataatnia samba gegenia sabeu ka tubut tarimeu nenda.

³ Kuitco ka sara utenia mauju simapali, tapoi mauju nenda amalengan. Kisei le ka bagada sangalio polak, tutrangan nia.

⁴ Purapporangan ka matat naga, kalulut kakauna gege ka tarimeu. Purapporangan leu ka matat tarimeu, kuarangan, “Kasei simakere ka tarimeu nene? Samba kasei momoi masisaggangi nia?”

⁵ Samba ka tarimeu nenda tukau ngungu masitiboake buak paatuat samba paasakat; samba tukau ka tubunia gege igalaiake nia epat pulu rua ngalaggo burunia.

⁶ Lepa bukanangan ngungunia masiasa Taikamanua, masiasa oninia samba kudduatnia samba sangamberida sikuddu ka sorga.

⁷ Samba tuobaake leu nia masisaggangi sia sipunenan samba masikalaake sia; samba tukau ka tubunia gege masipaneinei senen muntogat samba uma samba nganga samba bangsa.

⁸ Sangamberi sikuddu ka polak nene murappo ka matania, ia te sia sitaitususurat oni ka bagat buko purimanuaiat Togat Biribiri silepa jaja barania ka panandaat polak.

⁹ Kasei sibara talinga, kau iarepmake nia!

¹⁰ Kasei tukokoiake labaket, bulat tulalaba nia; kasei tukokoiake mateiakenen ka son lanjau, bulat tumamateiake nia ka son lanjau. Ka bagat nene te buita imaom samba imatonem bagada sia sipunenan.

¹¹ Lepa itcokungan tarimeu bagei bela ka polak, sirua ban kele ban togat biribiri samba ipanibo kele ipanibo naga.

¹² Sangamberi geget tarimeu siboiki igalaiake ka matania. Sangalio polak samba sangamberi sikuddu ka bagania ikau murappo ka tarimeu siboiki, simamale mauju simapali nenda.

¹³ Samba ibaraake kiseiet sabeu; pat beleakenangan api sibara ka manua ka polak ka matada sangamberi sirimanua.

¹⁴ Pepeakenangan sikuddu ka polak kalulut kiseiet sikau ka tubunia galaiakenennia ka matat tarimeu siboiki nenda. Kuanangan ka sia sikuddu ka polak ragalai tularat masiabeuake tarimeu sipumamauju siorangan lanjau, tapoi ai pei le muririmanua.

¹⁵ Samba tukau leu ka tubunia gege masikau enga ka tularat tarimeu siboiki, bule ioi ipanibo tularat tarimeu nenda, samba masimateiake sangamberi sirimanua sitaipurarappo ka tularat tarimeu nenda.

¹⁶ Sangamberi sirimanua sigoiso samba sabeu, simakayo samba simageba, sipuuja samba pagugulet, ikau toggaiat ka kabeira sikattoet ele ka bukkura.

¹⁷ Ta anai kasei pa siooi masisaki ele masisakiake, sarat sia le sibara toggaiat, ia te onin tarimeu nenda ele angka addeat oninia.

¹⁸ Sene buita anai sikut paatuat. Kasei simaagai, kau iadde angka addeat tarimeu nenda, aipoi angka nenda angka sirimanua. Angkania ia te 666.