Neh. 9 - BUKO SIPUNENAN

Sarakyat masiseseake jo

¹ Ka gogoi rua pulu epat laggo nene leu et, parururangan tai Israel. Pupuasorangan addeat masipakoinong olei bagatdra ka jo.

² Rasaraake tubutdra ka sangamberi sirimanua sioiake. Sibailiu toggaiat reureu baga, pakeirangan komak goni samba rapakarap abu ka utera. Lepa puriorangan samba seseakerangan sangamberi jodra samba seletda taikebbukatra.

³ Telu ngajam ujunia, arabasaake buko Surukat Tuhan, Taikamanuandra ka tubutra samba telu ngajam leu ujunia araseseake jodra lepa nenda purekkukrangan samba panindourangan kai Tuhan, Taikamanuandra.

⁴ Sedda ai podium pakeietdra tai Lewi samba purionangan ka uddutnia si Jesua, Bani, Kadmiel, Sebanya, Buni, Serebya, Bani samba Kenani. Panindourangan sabeu nganga kai Tuhan, Taikamanuadra.

⁵ Parurukat ka gogoi nenda rataddaake tai Lewi nene: Jesua, Kadniel, Bani, Hasabneya, Serebya, Hodia, Sebanya samba Patahya. Kuarangan, “Purio kam samba umun kam si Tuhan Taikamanuanta! Kau kam pasiumun ka tubuNia, teret buruburu! Umunake kam oniNia sisun pulatcanan, oni simaeru, sisaliu sangamberi umunen!”

Panindogat pasiseseseake jo

⁶ Lepa panindourangan sapaamian Israel kise, “Ekeu le Tuhan, Ekeu le Sisasara! Baraakenungan panyanyat samba sangalio manua, koat samba polak samba sangamberi sibabara ka bagania, lepa akenungan purimanuaiat samba pasikelinungannia. Sangamberi gege ka manua ka tubum le rapurekkuk manindou. Rasuru' le Ekeu samba murekkuk,

⁷ Ekeu le Taikamanua, Tuhan Sisasara. Anupilingan si Abram ka talagat bangsania. Ur ka laggai Babilonia aikaddiuakean, kalulut Ekeu poi amasipaneneinia. Lepa kaunungan ka tubunia oni sibau: Abraham, iate tusogainia ka teteret nenda.

⁸ Nusese le nia mariuriu mutopit samba mureddet ka tubum. Iageti galainungan palelengan simaron pasamba nia. Laggai Kanaan, Het samba Amori, laggai Feris, Jebus samba Girgasi, sangamberi nenda nuoba nukau ka tubunia sibailiu kudduatdra sangamberi sapunuteteunia. Lepa geti sunnakenuangan palelengan nenda ka tubunia, aipoi Ekeu le simaroipo baga samba simariuriu topit.

⁹ Anuitcoan pangoringandra taikebbukatmai siburu. Anuarepman sounia ka Misir samba ka koat Taberau.

¹⁰ Ka tubut rimata Misir anugalai simigi pukerengan, samba leu ka tubut sipugagalai ka pamarenta samba ka sipulalaggai sedda, aipoi nuagai kipa rapaoreiji paamianNu. Iageti tuabeunangan onim teret gogoi nene.

¹¹ Silaakenungan koat, addeat enungandra sapaamianNu, Talipoakenungan sia muenung ka saisai bagat koat simagarak. Sia sipasikukukru paamianNu maloulourangan ka koat simakeru, kele imalelep bukku ka koat sikatai.

¹² Pasamba tanai rusa sipusubbulat nupalulu sia sinago samba sinoibo, samba sinoibo nutoroiji enungandra pasamba obengan sipununuijat.

¹³ Barania ka manua gorosot Ekeu ka leleu Sinai, lepa panibonungan ka matat paamianNu. Kaunungan ukum, aturan samba paneneijat sibulatnia, sineseat samba sibara katukaunan.

¹⁴ Nugelaiake sia masisuru Gogoi SabatNu sipunenan, kaunungan surukatNu kai Mose sisege ka paamianNu.

¹⁵ Ka teteret aramalaje samba ta'aiaili komen, gorosotnakenungan roti sibara ka manua. Ka bukku simaopet, simaron samba simakela Nugurukngake simaron oinan pasiseget oggou. Koiniakenungan sia rakudduiji polak sipalelekNu ka tubunia sialei suppa.

¹⁶ Tapoi taikebbuakatmai mabuak samba makela patuatdra; sangamberi surukatnu ta' aratutnake.

¹⁷ Ta' mareddet sia, sangamberi topitnu kalipogitdrangannia, samba sangamberi pukerengan sigalainu pepe le kapaatuat. Ka buak paatuat pilitdrangan siuteake sia, sipasiabbit sia ka Misir toili bailiu pagugulet. Tapoi ekeu Taikamanua sioba masiappeake le, simaom baga, simakiliu baga samba sisun nuntut baga. Nuntut bagam bulat ta amagulai, ta'anukaddiuake sia.

¹⁸ Galairangan buluat kele tubut jaui. Lepa kuarangan, ‘Nene te Taikamanuamui, sipasiambit kam ka Misir ka kudduat katuribbaiatmui.’ Oi Taikamanua, Ekeu le arapaloloi!

¹⁹ Tapoi ka su'su nenda ta' anukaddiuake sia, kalulut Ekeu poi sisun pukakatet baga. Ta' anuburau tanai rusa sipususubbulat samba obengan sipununuinuijat, ta anutata'ake sisausau enungandra sinago samba sinoibo.

²⁰ Ka bagat Ketsat paerukatNu gelaiakenungan sia. Komrangan manna samba lo'rangan oinan simemetnia.

²¹ Epat pulungarura ujunia ka simatangeu, anupatarek komendra. Bibiletdra ta' amakatai, reredra ta' amabesi samba mugo.

²² Anukau ka tubutdra kamanangan ka igit purimataat samba bangsa ka pasongan polakra. Hesybon laggai Rimata Sihon, rakudduiji. Basan laggai Rimata Og ralaggaiji.

²³ Bailiuakenungan sapunuteteura kele igit panyanyat ka manua. Kaunungan ka sia polak pulaggaiatdra, polak sipalelekNu ka tubut taikebbukatra.

²⁴ Sapunuteteura masikudduiji laggai Kanaan, sipulaggai sedda nukalaake. PaamianNu nukau gege mugalai siobat bagania ka tubut bangsa-bangsa Kanaan samba tai rimatania.

²⁵ PaamianNu masioppu irip pujagoat, polak simagabru samba lalep sun le pukayoat. Sangamberi uggungan samba bubuakat oinan alarangannia, monen anggur, loinan zaitun samba buat kaju bagei. Mamo'mo le sia kalulut pukokom komen siobat bagadra. Sangamberi siakeNu simaeru rananam le.

²⁶ Tapoi paamianNu mugege samba ta'an arareddet ekeu, rapuarak ukum samba aturanNu, masimateiake tai nabi sipasirerepdepmake sia samba sikoiniake sia toili ka tubum, Taikamanuandra. Oi Tuhan, mareirei le rapaloloi ekeu.

²⁷ Iageti segeakenungan sia ka saggakdra ka tugrut tubu rapasiikep samba rapaoreiji sia. Tapoi ka bagat pugejaat baga siorak sia, pusogarangan ka tubum masitiddou paroman. Ai ekeu ka manua arepinungan sia, ka sun nuntut bagam nualegi sia. Nukau saute samba saladdu masibelaake sia ka saggakdra.

²⁸ Tapoi kele ai maaman minca laggainia, majorangan minca. Iageti Kaunungan sia ka tubut saggak rapaoreiji sia. Tapoi, ka teteret ararepdep samba ai sun olei bagadra, pusogarangan ka tubum masitiddou ituarauake sia. Iageti ai Ekeu ka manua arepinungan, samba ropmakenungan sia minca. Aipoi manuntu poi bagam ka tubutdra samba bulat makiliu bagam.

²⁹ Nuteka sia bule rareddet surukatNu, tapoi ka buak paatuatdra ta'rasilo ukumnu. Ke'bai raenungake surukatnu, bulat makolou le geti puririmanuandra. Makela le patuatdra, ta'raoba masiarepi, ta'raoba masireddet.

³⁰ Senen rura nuommake le masiparepdep sia, ka tubut tai nabi, Ketsatnu manibo katubutdra. Tapoi paamianNu nenda rapetpet le talingandra, lepa kaunungan sia ka tai bangsa ka sangalio laggai.

³¹ Tapoi kalulut kopet beunan nuntut bagam, ta'anukaddiuake ele nupakatai sia. Kirenangan ekeu le Taikamanua sita'anai pakerekatnia, abeu le nuntut bagam, sisun pukakatet baga!

³² Oi Taikamanua, Taikamanuamai simagege! Taikamanua siabeu samba simakope ron! Ka bagat riuriu topit nuungkaake sangamberi palelengan, sangamberi palelenganNu Nusunnake samba Nugalaiake. Barania ka teteret tai rimata Asyur rapaoreiji kai teret kineneiget, maigi pangoringan akuenungi kai. Tai rimatamai, imam, nabi samba sikebbukat, ia leuet taikebbukat samba rakyat, sangamberida amangorikngan. Bui nukalipogi sangamberi pangoringan nenda! Bui Nupepeakenia ka paatuatNu!

³³ SigalaiakenenNu maroipo, nuukum le kai si jo. Mariuriu le topitNu kenanen kai sisun paloloiat le.

³⁴ Taikebbukatmai, rimata, imam samba sikebbukat, masipasabau ukumNu samba masiputatania. Sangamberi surukat samba patekakat siakenu, ta'arapuletsei, ta' leuet araarepmake.

³⁵ Anukau ka tubutdra tai rimata sipaneneinei paamianNu, ka teterat arakuddu ka polak simalio samba simagabru ka kudduat sikauNu. Tapoi ta'arakaddiuake puririmanua sikatai, ta'raoba masipaguguletnake tubu samba manindou ka tubum.

³⁶ Iageti kineneiget kai nene ibailiu le pagugulet, ka polak siakeNu sibailiu pusaka. Polak nene magabru, sun le buania, siripokatnia sibailiu komen sisegeake bagamai.

³⁷ Sangamberi sibaraakenen polak nene bui ta'tukau ka tubutdra tai rimatat laggai. Sibara gege nenda nurioake masipaneinei paamianNu, sibailiu ukuman kalulut jomai ka tubum. Muparenta le sia ka siobat bagadra, ka tubumai samba ka tarimeumai. Aipoi nenda mangorik le kai kineneiget, sun le puokkiman tubu samba reureu baga!”

Rakyat masiteken palelengan

³⁸ Mubongen ka sangamberi sipuaaili nenda, kai rakyat Israel masigalai palelengan simaron samba sinuratnakenen, samba tukau metereira sautemai, sia tai Lewi samba tai imammai.