Neh. 8 - BUKO SIPUNENAN

Si Ezra masibasaake surukat Mose ka sarakyat

¹ Ka laggo sikapitu tai Israel amukuddungan sia ka laggaira sene-senenda. Ka gogoi sara laggo nenda sangamberidra paruru ka Jerusalem, ka ujat ipot Matatbaliu Gugurukat Air.

² Ratiddou bule buko surukat Mose ialania si Imam Ezra, sara sirimanua siagai pagalaiat hukum surukat Mose, sibara kai Tuhan sisege ka tai Israel.

³ Iageti ambitnangan si Ezra buko nenda ka parurukat siberikabaga ka bagania ai taimanteu samba tainanalep samba tailainge simakakebbukat tubu siagai kolou.

⁴ Iageti baranangan ka simansep pat ta'go, ibasaake hukum nenda katubutda si Ezra ka matadda. Sangamberitda masiarepi simakolou.

⁵ Purionangan si Ezra ka langgatan loina silepa galai pakeiet ka paailiat nenda. Isit kai kattoetnia murio le sirimanua nene: Matica, Sema, Anaya, Uria, Hilkia samba Maaseya. Ka isit kaikatsiunia murio: si Pedaya, Misael, Malkia, Hasum, Hasbadana, Zakharia samba Mesulam.

⁶ Langgatan puriokat Ezra nenda mabuak pei le ka kudduatda sirimanua nenda, pat itcorangannia sangamberitda. Ka teteret ai buka buko nenda puriorangan sangamberidra.

⁷ Kuanangan si Ezra, “Umun kai Tuhan, Taikamanua Sipulubeunan!” Sangamberi rakyat masiakkatnake kabei simabuak samba masialegi, “Amen, amen!” Lepa purekkukrangan manindou ka Taikamanua.

⁸ Lepa nenda, puriorangan ka kudduatda senenda, kineneiget piga pa tai Lewi masipakolou hukum nenda ka tubutdra. Tai Lewi nenda iate: Jesua, Bani, Serebya, Jamin, Akub, Sebetai, Hodia, Maaseya, Kelita, Azarya, Jozabad, Hanan samba Pelaya.

⁹ Ngangaakerangan Surukat Taikamanua nenda, senen rubeiat rapakolou pat agairangan kolou sibasaakenen nenda.

¹⁰ Masiarep katubasaat surukat nenda bailiu bulat mangeleinangan bagatda sa rakyat, lepa pusourangan. Iageti gubernur Nehemia samba imam Ezra siagai surukat nenda samba leu tai Lewi sipasokokolouake surukat nenda masikua ka tubut sangamberi rakyat kise, “Gogoi nene gogoi sikokoiakenen kai Tuhan Taikamanuamui, oto bui imareureu bagamui ele musou.

¹¹ Kineneiget toiliakean kam; kom kam samba lo' kam ka bagat angkat baga. Kau kam bagei komen samba anggurmui ka tubutdra sita' anai komen. Gogoi nene gogoi sikokoiakenen kai Tuhanta, oto bui mareureu bagamui. Puangkakat baga siaket Tuhan ka tubumui iate masiparoron kam.”

¹² Tai Lewi leu masipusumi rakyat samba paolerangan masikua, “Bui nupureureu baga ka gogoi sikokoiakenen nene.”

¹³ Ia geti toili sangamberi rakyat addeat mukom samba mulo' sialei masiparubei komen ka tubut sirimanua sabagei. Muangka le sia baga kalulut araagai kolou basaet siarepdra nenda.

¹⁴ Kele ai mapato parururangan sangamberi sautet muntogat, tai Imam samba tai Lewi, lepa ei sia kai Ezra masigelai enungan Surukat Tuhan.

¹⁵ Seserangan ka bagat Surukat Tuhan sikaunia kai Mose, ikoiniake si Tuhan paamian Israel mukuddu ka bagat sapou sigoiso ujut punen pusasapou.

¹⁶ Kalulut nenda ka sangalio Jerusalem ka laggai sabeu samba laggai sigoiso, rasegeake parenta nenda, “Kenan kam ka leleu samba ala kam ran loina cendana, Zaitun, loinat tula, palem samba loina bagei addeat masigalai sapou siripot enungan ka bagat Buko Surukat.”

¹⁷ Lepa eirangan leu et sarakyat masiala ran nenda. Sangamberidra masigalai sapou ka uddut teitei lalepdra simagaktuk, ka ujat lalepnia, ka matat gerat uman Tuhan, ka uja ka bebet matatbaliu Gugurukat Oinan samba ka uja legret Matatbaliu Gugurukat Efraim.

¹⁸ Sangamberi rakyat sitotoili sibara ka kudduat katuribbaiat nenda masigalai sapou nenda, lepa kuddu sia sedda. Nene te bulat siboiki aragalaiake barania ka teteret Josua togat Nun, iageti sangamberidra masanang samba mangka baga le.

¹⁹ Pitu ngagogoi ujunia araglaiake punen. Senen gogoi ibasaake le si Ezra ruang buko Surukat Taikamanua. Ka gogoi sikabalunia galairangan punen pasilepa, siripot enungan hukum.