Neh. 6 - BUKO SIPUNENAN

Pinatu sikatai ka tubut Nehemia

¹ Sanbalat, Tobia, Gesyem samba sasaggakmai sabagei raarep, ailepa kugalai kai irip samba sangamberi sangaberi loboknia akupetpetnan kai, kenanen, ka teteret nenda ta'pei akukau kai matatbaliu ka matatbaliu gugurukat laggai.

² Iageti si Sanbalat samba Gesyem akerangan pasogaiat ka tubuku bule kuoi masibaraake paailiat pasamba sia ka sara Desa ka Peleu Ono. Tapoi kuagai le obara masimateiake aku.

³ Aipoi nenda, kukau le alegiat nene katubutda, “Ta'momoi kuoi kalulut aipei le galajet siabeu boikiakenenku. Galajet nenda ta' te maririuriu ke' moi aku paaili kakam.”

⁴ Pat aili epat ngaminca araake katubukku pasogaiat kele nenda samba kaukungan alegiat simakere.

⁵ Ka sikalimania oi sara pakoiniet Sanbalat masiake surat sitububuka

⁶ bagania kise: “Si Gesyem masibulatnake kababarania igit ngangan sirimanua ka talagat bangsa-bangsa sene, sipasikukua, sasaraina samba sangamberi tai Jehudi masiisiake paaggarat samba nenda te lulunia nupaeru kam irip laggai. Ikua leu et, ekeu nukau tubum ibailiu rimata ka Jehuda,

⁷ samba aisausauan piga pa' nabi masirioake ekeu ka Jerusalem. Kababarat igit ngangan nenda sesege te katubut rimata. Lulut nenda, konan kam tapatiboiji pagalaiat nenda.”

⁸ Tapoi kukau le alegiet nene, “Sangamberi tiboiet sikuam nenda siboboi le samba pabokoatnu le.”

⁹ Sibodrangan rapalotoki kai bule kuariake kai galajet nenda. Iageti panindoukungan, “Oi Taikamanua paron aku!”

¹⁰ Ka bagat oggak nenda leu et ei aku ka lalep Semaya togat Delaya, punuteteu Mehetabeel, kalulut masaila ioi ka tubuku. Kuanangan ka tubuku, “Konan taei ruata mulipput ka uman Tuhan. Lekreaketangan sangamberi matatbaliunia, aipoi ai sia sioba masimateiake ekeu. Ele ka soibo nene ramateiake ekeu.”

¹¹ Tapoi alegikungannia, “Aku nene ta'sirimanua sioba mututui. Siripot pusisirimanua simaturere, ta'momoi kuguruki Uman Tuhan babara mamatei aku. Ta' kuoba!”

¹² Lepat akupaatu pagalaiat nenda, agaikungannia pananakat Semaya nenda ta' sibara ka Taikamanua, tapoi sibara kai Tobia samba Sanbalat le. Arabulagani le si Semaya bule isegeake patonekat nenda ka tubuku.

¹³ Pinaatudra iate bule kumaloto samba kututnake kasikuadra bailiu majokkungan. Kugalaiake bai kele kisedda bara ka sia oggak masipakatai oningku bailiu aku tiboiet sirimanua.

¹⁴ Panindoukungan, “Oi Taikamanua, repdep le apa sigalaiakenen Tobia samba Sanbalat nenda. Ukumake le sia! Kisedda leu et nabi sinanalep sipuoni Noaja samba tai nabi bagei sioba masipalotoki aku.”

Irip laggai alepaan atupaeru

¹⁵ Aitupaeru irip laggai nenda ujunia 52 gogoi, samba ailepa ka gogoi rua pulu lima laggo Elul.

¹⁶ Ka teteret saggakmai masiarep pagalaiat nenda, maloto ele mailarangan, aipoi sangamberi sirimanua raagai galajet sigalaimai nenda sialei paroman Taikamanua le.

¹⁷ Kineneiget sautera tai Jahudi aipeile sia pasusurat pasamba si Tobia.

¹⁸ Maigi tai Jahudi paalei kai Tobia, kalulutnia poi talikut Sekhaya, togat Arah. Sara pei minca si Johanan, togat Tobia leu mutalimou ka togat Mesulam sinanalep, togat Berekhya.

¹⁹ Kenanen mariuriu igalai surat si Tobia ka tubuku masipalotoki aku, tapoi Sautera tai Jahudi nenda masitiboi kamataku sangamberi putopinan Tobia. Ai leu bagei sangamberi sikuaku, rasegeake leu et ka tubunia.