Neh. 5 - BUKO SIPUNENAN

Si Nehemia masiropmake simageba

¹ Pasat piga ngagogoi pa' maigi tai Jehudi, taimanteu samba leu tainanalep rataddaake masisoibi pagalaiat sabangsadra.

² Ai sipasikukua, “Togaku maigi, ka kai kuoba kai gandum bule kupurimanua kai.”

³ Ai minca sipasikukua, “besiakekungan masigadaiake mone, monen anggur samba lalepmai addeat masisaki gandum bule bui tumatei kalulut laje.”

⁴ Samba ai sabagei sipasikukua, “Akubalengan kai bulagat addeat masilettuake pajak mone samba monen anggur siteuakenen rimata.

⁵ Ta'pa' kai leu et tai Jehudi? Ta'pa' tatogamai makere le tatogadra tai Jehudi? Kenanen kisedda obaakemaian leu et tatogamai ibailiu paoreijet. Samba leu aian tatogamai siokko tusakiake ibailiu sia paoreijet. Tata' le ronmai kalulut sangamberi mone samba monen anggurmai akubaleakean kai.”

⁶ Masiarep sou bagadra nenda, bailiu pugolukungan simakope,

⁷ samba paatukkungan galaiakenenku. Lepa tekakungan sikebbukat laggai samba saute. Kuakungan, “Nuorei le kam sasarainamui!” Iageti baraakekungan paailiat siberikabaga bule masipasikeli sibabara nenda.

⁸ Samba masikua, “Ka sangamberi rotta atatebuian sasarainanta tai Jehudi sipasisasakiake tubunia ka bangsa bagei. Tapoi kineneiget nubesiake le kam sia rasakiake tubudra ka tubumui, sarapei kam leu et tai Jahudi!” Saute nenda, berisangatete tiboiet ta'amoi araalegi.

⁹ Lepa kuakungan minca, “Galai tubu nenda bulat ta'maeru! Siripokatnia nupurimanua kam ka bagat loto le ka Taikamanua. Ka bagat nenda saggakta sitaiputuTuhan ta anukau kam oggak ka sia rapaloloi sita.

¹⁰ Kaku, sasarainangku, samba saaleiku akubaleakean bulagat samba gandum katubutda sarakyat. Ta'an kutitiddou kai minca.

¹¹ Kauan le nuposa kam utakra sarakyat ka tubumui nenda, kele bulagat ele gandum samba anggur ele tulat zaitun. Toiliake kam mone simaruei, monen anggur, monen zaitun samba lalepdra!”

¹² Alegirangannia saut? nenda, “Panganturat nenda kutututnan te kai geti. Sangamberinia kutotoiliake te kai geti samba ta'an kubebesiake kai rapasilului aponia pa' sibabara ka sia addeakenen utak.” Lepa sogaikungan tai imam samba koiniakekungan saut? nenda musuppa kamatadra tai imam nenda, bule aponia sitiboakenendra nenda bulatnia te ragagalaiake geti.

¹³ Iageti golokkungan akkik tengangku, lepa so'so'akekungannia, sialei kuanen, “Kise te siripokatnia iso'so'ake Taikamanua senen sirimanua sitaioba masigalaiake palelengannia. Sirimanua nenda geti ibailiu le simalilimai, lalep samba sangamberi pukayoatnia iaala te Taikamanua!” Sangamberi siooi ka parurukat masialegi, “Amen!”. Lepa umunakerangan si Tuhan. Iageti saut” nenda galaiakerangan palelengandra.

Aggai bagat Nehemia

¹⁴ Ai bailiuan aku gubernur Jehuda pulu rua ngarura ujunia, iate barania ka rura rua pulu teret rura si ka telu pulurua puparentaat Rimata Artahsasta. Ka ujunia nenda aku samba sasarainangku ta'pei anai akuala kai upakku sibailiu Gubernur.

¹⁵ Sia tai Gubernur sipuboboiki kaku, aibailiuan sia bairanen rakyat, aipoi ratiddou le ka bagat sangagogoi 40 bulagat perak addeat komen samba anggur. Beringan sia leu sangamberi sipugagalai ka puparentaat gubernur leu et rapaoreiji le sarakyat. Tapoi kaku geti ta'kuoba masigalaiake kele nenda, kalulut maloto aku ka Taikamanua.

¹⁶ Sangamberi ronku kubelaake le ka pasigagalai irip laggai nenda samba ta'abara kaku beri goiso polak sibailiu silit besit tubu kenanen bai sangamberi sipasirorop aku ai sia mugalai ka pugagalai nenda.

¹⁷ Sangotu lima pulu tai Jahudi samba sikebbukat laggaira matukle le kupakom sia ka lalepku, ta'pei atuaddeake tairauma sibara ka bangsa-bangsa pabebeakenenmai.

¹⁸ Senen gogoi kupatarek le sangamuneng jaui, enem ngamuneng biribiri simamo'mo samba gougou leu et maigi, samba leu bagei, senen pulu ngagogoi kupatarek le anggur. Kenanen kasedda ta'kuoba masitiddou siripot siloket pugugubernurku, kalulut kuagai bairanenda sarakyat makopean le sane.

¹⁹ Kutiddou oi Taikamanua, repdep le sangamberinia sigalaiakenenku ka bangsa nene samba panukani le aku.