Neh. 4 - BUKO SIPUNENAN

Nehemia masisaggangi saggakda tai Jehudi

¹ Kele aiarepnia si Sanbalat, kai tai Jehudi ai kupaeeru kai irip laggai bailiu pugolunangan simakope samba taddaakenangan masipaloloi kai.

² Ka matat saaleinia samba saladdudra tai Samaria, kuanangan, “Aponia ragagalaiake tai Jahudi simabesi' purimanuaiat nenda” Raoba leu pa' minca masigalai laggai nene? Rapaatu le te galajet nenda momoi ilepa ka bagat sangagogoi, kenanen sarat kapasipangunguruatnake buluakenen? Momoi leu pa' rapakei bukku simakakasak nenda rabailiuakenia rupit lalep?

³ Lepa ai muririo si Tobia ka bebenia panibonangan leu, “Itco pei bukku rupit lalep sigalaira nenda! Beringan jo'jot leleu momoi ibukkatnakenia!”

⁴ Iageti panindoukungan, “Oi Taikamanua, arepmake pei kipa rapaloloi kai! Bailokngake le paloloiat nene ka tubutdra. Eddangan tuparauraugi sangamberi bibiletdra samba tuambit sia sibailiu tangsiakenen ka laggai sirimanua.

⁵ Bui nuappeake pukakataira samba bui nukalipogi jodra, aipoi arapaloloiat kai ai kai ka talagat masigagalai nene.”

⁶ Kineneiget riuriu le kupaeru kai irip nenda samba taan mauuju sangamberi irip nenda ilepa itupaeru teret iletalaga buaknia, aipoi rapugalai sarakyat ka bagat muinet paatuat.

⁷ Ka teteret Sanbalat, Tobia samba sirimanua sibara ka Amon samba Asdod samba leu et tai Arab masiarep aitupaeru irip laggai Jerusalem nenda memei maeeru samba palobok-lobok ka irip arataddaakean masipatappoli, bailiu bulat makope le golu'ra.

⁸ Pukererangan baga masisaggangi Jerusalem bule rabaraake pugaugaukat.

⁹ Kalulut nenda panindoumaian ka tubut Taikamanuamai samba masijago laggai nenda sina'go samba sinoibo.

¹⁰ Tapoi tai Jehuda taddaakerangan masiuraiake urai sou baga nene: “Ron tubutta tata kalulut pasibairat abbinen, beringan leu et siragatat maigi peile sipususukra. Ta'an amoi tubutta mugalai masipaeru irip laggai nene.”

¹¹ Ai leu raisiake saggakmai masisaggangi sige'ge, lepa mateiakerangan kai bule ipuari pugagalaimai.

¹² Tapoi tai Jehudi sikukuddu ka bebera, mareirei le raoi kakai masipaagai isiatda tai saggak nenda.

¹³ Kalulut nenda parubeikungan leu lanjau, simuinebakkat samba papana ka tubut rakyat, lepa pagalakkungan sia siripokat senesenen muntogatda ka teitei irip laggai, ka kudduat sita'pei alepa tugalai.

¹⁴ Kele akuitco aramaloto sarakyat panibokungan ka matatdra samba ka matat sikebbukat laggai samba ka saute, “Bui numaloto kam ka tubutdra tai saggak! Repdep kam si Tuhan simagege samba simakope ron, samba kau le nupasaggak kam addeat sasarainamui, tatogamui, sinanalepmui samba lalepmui!”

¹⁵ Areprangannia tai sasaggakmai, aagaimai pinaatutdra. Iageti agairangan leu et, Taikamanua aitataakean pinaatutdra nenda. Lepa nenda toili kai minca sangamberimai mugalai masipaeru irip laggai nenda.

¹⁶ Tapoi barania gogoi nenda sangarubeiat pakoinienku le amugalai, samba sangarubeiat minca mujago pasamba muleppei leppei pasaggak samba pamateira sosoat, korabbi samba papana. Sautet rakyat masikau pasopoat simaron ka tubut rakyat,

¹⁷ sipasipeperu irip nenda. Sipasibabairat galajet bangunan masigalaiake galajet nenda sisangasilat kabei, samba sisangasilat kabei bagei masiukkaake pamatei.

¹⁸ Sipugagalai bukku mugalai pasamba pamatei situaapra ka tenga. Sipasiulup terompet toggaiat ai sibabara, mariuriu le ka bebeku.

¹⁹ Lepa panibokungan ka tubut rakyat, sikebbukat laggai samba saut, “Galaiakenen nene amaliongan teret ka sareunan pat pasaragainangan sita ka sanganantat irip nene, senen sirimanua siparereunan le.

²⁰ Oto, ke'nuarep kam ipunau terompet, parurumuian simaruei ka bebemai sene. Taikamanuanta le pasaggak geti addeat ka sita.

²¹ Kise te akupugalai kai barania simansep teret imatoila panyanyat ka manua. Sangarubeiat rakyat masipaeru irip, sangarubeiat bagei mujago pasamba kakabeira simuine bakkat.

²² Ujunia nenda sangamberi sipugagalai pasamba sipasirorop sia, kukoiniake le sia mugogoi ka Jerusalem. Kise te sinoibo ioi kujago kai laggai samba sina'go masipaeru iripnia.

²³ Aku, saaleiku, sapaguguletku samba sipasijajago aku sarat muleppei pugalai le sina'go samba sinoibo. Riuriu le kumatarek kai, senemai ai pamatei ka kabeimai.”